Read Nhengatu Atu 22 Bible Online

Atu 22 - Nhengatu bible

Atu 22

¹Unyee: —Penye semuita sepayaita yuiri kuiri pesendu panye penye mayetaa hambeu seresewara.

²Asui aintausendu upurungita ainta supe ebreu nyenga rupi aintaukiririntu. Asui umbeu ainta supe:

³—Ixe judeuwaa ixe, hanaseri Tarsu kiti Silisia upe maa hayukiriari kua peretama upe, asui kua Gamaliel umbue ixe sese kua Deus nyenga kuximawara yaneramunyaita uxariwaa yande arama, asui kirimbawa hamanduari hamunya puranga Deus supe maye peyawe uyi ara.

⁴Hamuruanyana kua pee ate hayuká mira asui hamprezu ainta, hamburi ainta kadeya kiti panye apigawaita kunyaita yuiri.

⁵Aintaupuderi aintaumbeu seresewara kua saserdutita ruixawa kuaita yuiri serakuenawaita. Asui aintaumundu ixe arama papera aintaumpinimawaa serumuaraita supe Damasku kiti, asui hasu akiti hapukuari arama apewaraita harasu ainta Jeruzalẽ kiti hampurarakari arama ainta.

⁶Asui hasu irumu pee rupi kuayentu Damasku sui, yandara rame kurasi, asui kutara yepe turi sendiwaa turusuwaa umuturi serese iwaka sui.

⁷Asui hawari iwi rese, asui hasendu yepe nyenga upurungita ixe arama: —Saulu, Saulu, marantaa remuruanyana ixe?

⁸Asui hapurandu ae: —Awataa inde seruixawa? Asui usuaxara ixe: —Ixete Jesus Nazare suiwara kua remuruanyanawaa.

⁹Asui kuaita apigawaita serumuaraita aintaumaa kua turi umuturi maa timaa aintausendu kua upurungitawaa ixe arama.

¹⁰Asui hapurandu ae: —Seruixawa, maataa kuri hamunya? Asui Yaneruixawa unyee ixe arama: —Repuamu, resu Damasku kiti, nyãse akiti kuri aintaumbeu inde arama maataa remunya arama.

¹¹Asui tihapuderi hamaa nyãse kua turi kirimbawa umuturi serese, asui aintaupisika seipu rese aintaurasu ixe Damasku kiti.

¹²Ape yepe apigawa serawaa Anania, puranga uruyari Deus nyenga kuximawara rese, puranga aintaumbeu sese panye kuaita judewita apewaraita.

¹³Asui uri sepiri upuamu seruaki, unyee ixe arama: —Inde semu Saulu, remaa mukuĩsawa. Asui nyã urate hamaa mukuĩsawa, asui hamaa ae.

¹⁴Asui unyee ixe arama: —Kua yaneramunyaita Deus uxari rekuawa uparawaka inde rekuawa arama maitaa uputari neirumu, uxari yuiri remaa kua Purangawaa, resendu yuiri inyenga.

¹⁵Nyãse rerikute rembeu sesewara aintausendu arama panye kuaita apigawaita, rembeu yuiri sese kua remaawaa resenduwaa yuiri.

¹⁶Kuiri marantaa resarure? Repuamu rexari aintaubatizari inde, asui remuyasuka nepuxuwerasawa nesui resenui resewara sera rese.

¹⁷Asui hayuiri rire Jeruzalẽ sui hawike templu upe, asui hamaa seruixawa sekerupiwaa upe hambeu irumu Deus.

¹⁸Asui hamaa kua umbeuwaa ixe arama: —Resu kutara Jeruzalẽ sui nyãse tikuri aintausuanti kua nyenga kua rembeuwaa seresewara.

¹⁹Asui hanyee ixupe: —Seruixawa, aintaukuawa ixe hamprezu ainta, hanupa ainta sinaguga upe kuaita uxariwaita aintapia nerese.

²⁰Asui aintaumburi irumu Estevão ruwi kua umbeuwaa neresewara, ixe yuiri hawapika hamaa haxari aintauyuká ae. Asui ixete hasaru aintarupaita kuaita uyukáwaita ae.

²¹Asui unyee ixe arama: —Resuana, nyãse hamundu kuri inde apekatu kiti aintapiri kuaita tiwaita judeu.

²²Asui yawe aintausendu ixupe, asui aintausasemu aintaunyee: —Petiari kua apigawa kua mundu sui nyãse tipuranga pexari upaka ae.

²³Asui kirimbawa aintausasemu, asui aintaumusaka aintarupa aintaumburi ainta apekatu kiti, asui aintaumburi iwi iwate kiti.

²⁴Asui kua kumandanti umundu aintaurasu Paulu suraraita ruka kiti, asui umundu aintaupurandu ae aintaunupa irumu ae aintaukuawa arama maa resewarataa aintaipiaiwa ixupe kua miraita.

²⁵Asui aintaupukuari rire tupasama irumu Paulu upurandu Kapitão irumu kua uikuwaa suaki: —Maitaa periku permisão penupa arama yepe Rumawara tiramere pepurandu pesendu kuri irumu?

²⁶Asui kua kapitão usendu irumu unyee: —Usikari kua kumandanti, asui unyee ixupe: —Maataa kuri remunya irumu, nyãse kua apigawa Rumawara ae?

²⁷Asui kua kumandanti usika ipiri asui unyee ixupe: —Rembeu hasendu, maitaa Ruma suiwara sera inde? Asui Paulu unyee ixupe: —Ẽẽ Rumawara ixe.

²⁸Asui kua kumandanti unyee ixupe: —Hapagari turusu sedinyeru irumu Ruma suiwara arama ixe. Asui Paulu unyee ixupe: —Ixe hanaseri hamaa ara Rumawara sui.

²⁹Asui aramete aintauyuiri isui kuaita unupawaita ae xikuti irumu. Asui kua kumandanti usikie usendu irumu Rumawara kua Paulu nyãse ae umundu aintaupukuari ae.

³⁰Asui wirande kiti uputari ukuawa puranga maa resewarataa aintaumbeu puxi sese kuaita judewita, asui uyurawa ae, asui umundu aintauyumuatiri panye kuaita saserdutita ruixawaita yuiri, serakuenawaita yuiri, asui aintaumundu aintaururi Paulu yuiri, asui uxari upuamu aintaumaa ae panye.