Read Nhengatu Atu 23 Bible Online

Atu 23 - Nhengatu bible

Atu 23

¹Asui kirimbawa umaa aintarese kuaita serakuenawaita, asui unyee ainta supe: —Semuita, puranga sepia irumu hawata Deus umaa ate uyi ara.

²Asui kua saserdutita ruixawa serawaa Anania umundu aintaunupa Paulu iyuru upe kuaita upuamuwaita suaki.

³Asui Paulu unyee ixupe arama: —Inde umanuwaa kuera yawewaa murutinga iarupi, inde rewapikawaa rembeu serese puxi ipupe kua Deus nyenga kuximawara, nyãse inde resaisu kua Deus nyenga kuximawara sesewara rexari aintaunupa ixe.

⁴Asui kuaita upuamuwaita suaki aintaunyee ixupe: —Maitaa repurungita puxi sese kua Deus uxariwaa saserdutita ruixawa?

⁵Asui Paulu usuaxara ae: —Tihakuawa aete saserdutita ruixawa, nyãse aintaumpinima: "Terembeu puxi sese kua umunduwaa miraita."

⁶Asui Paulu ukuawa irumu pitera rupi sadusewita kuaita serakuenawaita, asui pitera rupi farizewita yuiri, asui unyee ainta supe: —Semuita, farizeu ixe, farizeu raira ixe, asui kuiri pembeu serese sesewara kua yasaruwaa hamaa, sesewara yuiri yapuamu manusawa sui.

⁷Asui umbeu rire kua inyenga, asui aintaumaramunya kuaita farizewita sadusewita irumu, asui mukuĩ aintaumanduarisawa kuaita miraita.

⁸Nyãse kuaita sadusewita aintaumbeu tiyapuamu manusawa sui, aintaumbeu yuiri tiyamaa anju nẽ espiritu yuiri, maa kuaita farizewita aintaumanduari aikue ainta.

⁹Asui aintausasemu turusu, asui aintaunyee yepeyepe umpinimawaita farizeu suiwaraita, aintaunyee: —Tiyawasemu puxuwera sese kua apigawa; yakuawa será yepe anju u yepe espiritu upurungita irumu supiwa.

¹⁰Asui aintaipiaiwa aintaupurungita, asui kua kumandanti usikie yawaite umanduari aintaupartiri kua Paulu, asui umundu suraraita aintaurasu Paulu miraita pitera sui, aintaurasu arama ae suraraita ruka kiti.

¹¹Asui nyã pituna Yaneruixawa upuamu suaki unyee ixupe: —Reiku santa, nyãse kuaye rembeuwaa yawe seresewara Jeruzalẽ kiti, yawete yuiri rembeu kuri seresewara Ruma kiti.

¹²Asui kuemana aintauyumuatiri kuaita judewita asui aintaumbeu tikuri aintaumbau tikuri aintauu yuiri senundere aintauyuká kua Paulu.

¹³Asui siya kuaita uputariwaita uyuká usasawa kuarenta apigawaita.

¹⁴Asui aintausu aintapiri kuaita saserdutita ruixawa serakuenawaita yuiri asui aintaunyee ainta supe: —Yayumbeu nyenga kirimbawa irumu, tikuri yau tiyambau yuiri tiramere yayuká kua Paulu.

¹⁵Kuiri penye aintayuiri kuaita serakuenawaita pepurandu kumandanti uxari arama perasu penye arama ae pepurandu arama pesendu puranga sese kua inyenga, asui pruntu kuri yande yayuká arama ae senundere usika pepiri.

¹⁶Maa kua Paulu rendira membira usendu kua aintanyenga asui uwike suraraita ruka kiti umbeu Paulu supe arama panye kua usenduwaa.

¹⁷Asui Paulu usenui yepe kapitão unyee ixupe: —Rerasu kua kurumiwasu kumandanti ipiri nyãse uputari umbeu yepe nyenga ixupe arama.

¹⁸Asui upisika ae ipu irumu urasu ae ipiri kua kumandanti, upurandu ae: —Kua prezu serawaa Paulu usenui ixe upurandu ixe harasu arama nepiri kua kurumiwasu, nyãse uputari umbeu yepe nyenga inde arama.

¹⁹Asui kua kumandanti upisika ipu asui urasu ae yepenyu asui upurandu ae: —Maataa reputari rembeu ixe arama?

²⁰Asui unyee: —Kuaita judewita aintauputari aintaupurandu inde wirande rerasu arama Paulu aintapiri kuaita serakuenawaita, aintauputari aintaupurungita irumu puranga piri.

²¹Teremunya kuaye aintauputariwaa yawe, nyãse kuarenta apigawaita usaruwaa ae nyãse aintauyumbeu timaa kuri aintaumbau tiyuiri aintauu senundere aintauyuká ae pruntuana ainta kuiri aintausaru inde rembeu arama ainta supe arama remundu kuri ae.

²²Asui kua kumandanti uxari usu kua kurumiwasu, asui umbeu ixupe tiarama umbeu awa supe kua umbeuwaa kumandanti supe.

²³Asui usenui mukuĩ kapitão umundu arama ainta: —Peyumukaturu duzentu surara, asui setenta usu kavalu rese, asui duzentu urasuwaita lansa, aintausu arama Sezareya kiti nuvi ura pituna rame.

²⁴Pemukaturu yuiri kavalu Paulu supe arama, perasu arama ae puranga ipiri kua guvernaduru Felix.

²⁵Asui umpinima ixupe yepe papera yawewaa resewara:

²⁶—Ixe Klaudiu Lizia inde arama inde Felix, inde guvernaduru puranga, reiku puranga.

²⁷Kuaita judewita aintaumprezu kua apigawa asui kuaji aintauyuká ae hasu irumu aintapiri aintairumu kuaita suraraita, asui hayurawa ae nyãse Rumawara ae.

²⁸Asui haputari hakuawa satambika maa resewarataa aintaumbeu puxi sese harasu ae aintapiri kuaita serakuenawaita.

²⁹Ape hakuawa aintaumbeu puxi sese nyãse tiuruyari Deus nyenga kuximawara, maa tiumunya puxi yayuká arama ae u yamprezu arama ae.

³⁰Asui hasendu irumu aintauputari aintauyuká ae uyumimisawa upe, asui hamundu nepiri ae, asui hambeu ainta supe arama umbeuwaita puxi sese, aintaumbeu arama resendu maa resewarataa puxi aintaumaa ae.

³¹Asui kuaita suraraita aintaurasu Paulu pituna rame ate Antipatride kiti aintaumunya kuaye kumandanti umunduwaa yawe.

³²Asui wirande kiti kuaita suraraita aintauyuiri usika aintaruka kiti, asui aintauxari kuaita usuwaita kavalu rese aintaurasu Paulu.

³³Asui aintausika Sezareya kiti aintauxari kua papera ixupe kua guvernaduru, asui aintauxari yuiri ixupe kua Paulu.

³⁴Asui uleri rire kua papera upurandu usendu mayewaa tetama suitaa uri. Asui ukuawa uri Silisia sui ae.

³⁵Unyee ixupe arama: —Hasendu kuri inde arama aintausika rame kuri kuaita umbeuwaita puxi nerese. Asui umundu aintausaru ae puranga Erudi suraraita ruka upe.