Read Nhengatu Atu 24 Bible Online

Atu 24 - Nhengatu bible

Atu 24

¹Asui sinku ara rire uri kua saserdutita ruixawa serawaa Anania aintairumu kuaita serakuenawaita asui yepe upurungitasara serawaa Tertuliu, asui aintaumbeu guvernaduru supe sesewara kua Paulu.

²Asui aintausenui rire Paulu, arame Tertuliu uyupiru umbeu puxi sese kua Paulu, umbeu: —Inde Felix purangawaa inde, rexari timaarese yaiku puranga, rekuawa resewara remunya puranga rexari yaiku puranga panye yande miraita.

³Asui suuri yamaa inde sesewara kua remunyawaa yanerendawa yaweyawe.

⁴Asui tihaputari hapurungita turusu, ape hapurandu inde resendu yande arama kuaira nepia purangawaa sui.

⁵Nyãse yakuawate puxuwera kua apigawa umuapatuka panye kuaita judewita uyumusaĩwaita panye kua mundu kiti, asui aete kirimbawa aintairumu kuaita nazarenuita.

⁶Asui uputari yuiri umuaiwa yanetemplu, asui yapisika ae yambeu arama sese kuaye Deus nyenga kuximawara umbeuwaa yawe.

⁷Asui uri yanepiri kua kumandanti Lizia uyuka yaneipu sui ae kirimbawasawa irumu.

⁸Asui umundu aintauri nepiri kuaita umbeuwaita sesewara, asui inde kuri repurandu resendu ae, ape repuderi rekuawa sese panye kua yambeuwaa sese puxi.

⁹Asui kuaita judewita aintawajudari ae sesewara kua umbeuwaa, aintaumbeu supiwa ae.

¹⁰Asui kua guvernaduru umukame ipu uxari arama Paulu ukuawa arama upuderi upurungita, asui Paulu unyee: —Hakuawate siya akayu resaru kuaita miraita, ape suuri hambeu seresewara resendu arama.

¹¹Kuaye rekuawate harikuana duzi ara hasu rire Jeruzalẽ kiti hamee arama purangawaa Deus supe.

¹²Asui tiaintauwasemu ixe hamuserana amuita, tiyuiri hayumpiaiwa miraita irumu, nẽ sinaguga upe nẽ aintarendawa upe yuiri.

¹³Tiyuiri aintaupuderi aintaumukame remaa supiwa panye kua aintaumbeuwaa serese.

¹⁴Maa hambeu inde arama, hasu kua pee rupi, kua aintaumbeu tenyuntuwara ae, hamanduari kua yaneramunyaita aintaDeus, haruyari Deus nyenga kuximawara umbeuwaa panye; aintaumpinimawaa kuaita aintaumpinimawaita kuaita utitikawaita.

¹⁵Asui aintayawe aintausaru hasaru yuiri Deus usupiri manusawa sui kuaita purangawaita puxuwerawaita yuiri.

¹⁶Ape kirimbawa haputari puranga sepia yawewarawate Deus umaa apigawaita umaa yuiri.

¹⁷Asui siya akayu rire hayuiri haxari prezenti pirasuawaita supe semiraita pitera rupi haxari yuiri Deus supe.

¹⁸Asui hamunya irumu ae hayumukaturu rire serimutara aintauwasemu ixe yepeyepe judewita Azia upewaita, tiyamaa siya miraita tiyuiri aintauyumpiaiwa ainta.

¹⁹Puranga maa aintauri nepiri aintaumbeu arama inde arama serese aintauputari rame aintaumbeu puxi serese.

²⁰U rexari kuaita apigawaita umbeu inde arama maataa puxi aintauwasemu serese hapuamu irumu serakuenawaita umaa.

²¹Yepenyute hamunya hapuamu irumu aintapiterupi, hasasemu kirimbawa: —Kuiri pembeu puxi serese sesewara kua yapuamuwaa manusawa sui.

²²Asui Felix uxari aintausaru aintaumbeu sese nyãse ukuawate puranga sese kua pee, unyee ainta supe: —Uri irumu kua kumandanti Lizia hasendu kuri penye arama panye.

²³Asui kua tuixawa umbeu yepe kapitão supe umprezure kua Paulu umunya arama ixupe puranga, tiupuderi usaisu sumuaraita uajudari ae.

²⁴Asui yepeyepe ara rire uri kua Felix ximiriku irumu, judeu ae serawaa Druzila, asui umundu aintausenui ipiri kua Paulu, asui usendu irumu kua yaruyariwaa Kristu Jesus rese.

²⁵Asui umbeu ixupe arama Deus purangasawa rese, mayetaa yapuderi tiyaxari yanepia upe puxuwerawa, asui umbeu yuiri ixupe arama Deus umbeu kuri aintapekadu panye, asui iakayemu kua Felix. Asui umbeu ixupe: —Kuiri resuanare asui mairame kuri hapuderi hasenui yuiri inde.

²⁶Asui umanduari Paulu uxari kuri ixupe dinyeru, asui siya viaji usenui ae upurungita arama irumu.

²⁷Asui mukuĩ akayu rire Pursiu Festu uiku Felix uikuwaa kuera upe, asui uputari resewara puranga aintaumaa ixupe kuaita judewita Felix uxarire prezu kua Paulu.