Read Nhengatu Atu 4 Bible Online

Atu 4 - Nhengatu bible

Atu 4

¹Asui aintaupurungitawaa upe aintauiku ainta supe kuaita miraita aintauri aintapiri kuaita saserdutita asui kua templu kapitão yuiri asui kuaita sadusewita yuiri.

²Aintaipiaiwa nyãse aintaumbue kuaita miraita Jesus resewara yapaka kuri manusawa sui.

³Asui aintaupisika ainta asui aintaumprezu ainta ate wirande kiti nyãse pitunana ainta.

⁴Maa siya kuaita usenduwaita kua nyenga aintauxari aintapia sese, asui kuajintu sinku mili aintasiyasawa kuaita apigawaita uruyariwaita.

⁵Asui wirande kiti aintauyumuatiri Jeruzalẽ kiti kuaita serakuenawaita kuaita tuyuweita yuiri kuaita umpinimawaita yuiri

⁶Aintairumute kua saserdutita ruixawa serawaa Anasi, asui Kaifa, Juão yuiri, Alexandre yuiri kuaita saserdutita ruixawa sumuaraita.

⁷Asui aintauxari aintaupuamu aintapiterupi, asui aintaupurandu ainta: —Awa kirimbawasawa irumutaa awa rera resetaa pemunya kua pemunyawaa?

⁸Asui teresemu Pedru Espiritu Santu irumu umbeu ainta supe: —Penye umunduwaita kuaita miraita, penye yuiri penye tuyuweita,

⁹Pepurandu rame yande kuiri sese kua purangawaa yamunyawaa ixupe kua yepe alejadu mayetaa purangana ae kuiri,

¹⁰Haxari pekuawa muiri penye panye kuaita israelitaita yuiri, purangana ipira upe kua apigawa pemaawaa muiri penye sera rese kua Jesus Kristu Nazare suiwara, kua penupawa uyari kurusa rese kua Deus usupiriwaa manusawa sui, sera rese purangana ae kua pemaawaa.

¹¹Kua Jesus aete kua ita pemburiwaa pesui penye pemunyawaita uka, asui kuiri aintaumunya uka santawaa sese.

¹²Tiyamaa amu umukaturuwaa isui nyãse tiyamaa amu rera ike iwaka wirupi aintapiterupi kuaita miraita umukaturu aramawaa yande.

¹³Asui aintaumaa irumu tiaintausikie Pedru Juão yuiri aintaukuawa tiaintauyumbue eskula upe yepewasute ainta aintairumu kuaita amu miraita, asui aintaakayemu aintaumaa nyãse aintaukuawa aintauwata kuera Jesus irumu.

¹⁴Asui aintaumaa irumu kua apigawa aintaumukaturuwaa upuamu aintaruaki timaa nungara aintaupuderi aintausuaxara.

¹⁵Asui aintaumundu aintausu aintasui kuaita serakuenawaita, asui aintaupurungita aintapawa.

¹⁶Aintauyumbeu aintapawa: —Mayetaa maa yamunya ainta supe kuaita apigawaita? Nyãse panye kuaita Jeruzalẽ upewaita aintaukuawa aintaumunya yepe milagri asui timaa yapuderi yayumimi sese.

¹⁷Purangate yamutawa ainta tiarama awa supe aintaumbeu sese kua sera yawaite sesewara uyumusaĩ turusu piri aintapiterupi kuaita miraita.

¹⁸Asui aintausenui ainta, asui aintaumundu ainta tiarama aintaumbeu tiarama yuiri aintaumbue Jesus rera rese.

¹⁹Maa Pedru Juão yuiri aintausuaxara ainta, aintaunyee: —Penyete pembeu yasendu, maitaa puranga Deus umaa yaruyari rame penyenga inyenga sui?

²⁰Nyãse timaa yapuderi yapitu yapurungita sese kua yamaawaa yasenduwaa yuiri.

²¹Asui aintaumutawa ainta mukuĩsawa asui aintauxari aintausu nyãse tiaintaukuawa maye aintauxari arama aintaupurara aintaresewara kuaita miraita nyãse muiri ainta aintaumee purangawaa Deus supe sesewara kua usasawawaa.

²²Asui kua apigawa aintaumunyawaa sese kua milagri urikuana kuarenta akayu.

²³Asui aintauyurawa rire ainta aintausu aintapiri kuaita aintaimuita asui aintaumbeu ainta supe kua aintaumbeuwaa ainta supe kuaita saserdutita ruixawaita kuaita tuyuweita yuiri.

²⁴Asui aintausendu irumu ae yepewasu aintaumee purangawaa Deus supe, aintaumbeu: —Inde Yaneruixawa Deus, inde remunyawaa iwaka iwi yuiri parana yuiri panye kuaita uikuwaita ipupe yuiri.

²⁵Indete rembeu Espiritu Santu irumu iyuru sui kua yaneramunya Davi kua inde aramawaa: —Marantaa aintaipiaiwa kuaita miraita? Marantaa aintaumanduari tenyuntu kuaita miraita?

²⁶Kuaita serakuenawaita kua mundu upe aintaupuamu suaxara, kuaita umunduwaita aintauyumuatiri yaneDeus ruaxara suaxara yuiri kua uparawakawaa.

²⁷Nyãse supiwa aintauyumuatiri kua tetama upe suaxara kua neraira Jesus purangawaa, panye Erudi panye Punsiu Pilatu yuiri aintairumute kuaita tiwaita judeu kuaita israelitaita yuiri.

²⁸Aintaumunya arama muiri kua neipu uxariwaa panye kua reputariwaa rexari aintaumunya.

²⁹Kuiri inde yaneruixawa remaa maye aintauputari aintaumutawa yande, asui rexari tiarama aintausikie kuaita inde aramawaita aintaumbeu arama nenyenga.

³⁰Resupiri neipu remukaturu arama mãsiweraita, remunya arama yuiri tirewaita yamaa milagrita yuiri sera rese kua Jesus neraira purangawaa.

³¹Asui aintaupurandu rire Deus irumu uriri kua uka aintauyumuatiriwaa ape, asui teresemu ainta Espiritu Santu irumu asui tiaintausikie aintaumbeu Deus nyenga.

³²Asui yepewasu aintaumanduariwaa kuaita siyawaita uruyariwaita, asui tiawa aintapiterupi umbeu iyarapawate panye imaa, maa yepewasu aintayara pawate panye.

³³Asui kirimbawa kuaita apustuluita aintaumbeu yaneruixawa Jesus usemu manusawa sui, asui turusu piri Deus grasa uiku aintarese panye.

³⁴Nyãse nẽ yepe aintapiterupi uwatari ixupe imaa, nyãse muiri kuaita urikuwaita aintakupixawa aintaruka yuiri aintauvenderi ainta, asui aintaurasu sikuyara.

³⁵Asui aintauxari ae apustuluita ipi ruaki, asui aintaupartiri ainta supe kuaye uwatariwaa yawe ainta supe aintayaweyawe.

³⁶Asui Juze apustuluita aintaumuserukawaa Barnabe, yawesawa sera suuriwaa raira, levita ae, uriwaa Xipri sui,

³⁷Uvenderi ikupixawa asui urasu sikuyara uxari arama ae apustuluita ipi ruaki.