Read Nhengatu Atu 5 Bible Online

Atu 5 - Nhengatu bible

Atu 5

¹Maa yepe apigawa serawaa Anania irumute kua ximiriku serawaa Safira uvenderi yepe ikupixawa.

²Asui ukuawa pukusawa kua ximiriku uyumimi ainta supe sikuyara suiwara, asui urasu simirera uxari arama ae apustuluita ipi ruaki.

³Asui Pedru umbeu ixupe: —Anania marantaa Yurupari umuteresemu nepia reganani arama Espiritu Santu supe reyumimi arama inde arama nekupixawa rikuyara suiwara?

⁴Maitaa tineyara ae tipukusaware revenderi ae? Asui maitaa timaa neyara sikuyara revenderi rire ae? Marantaa reganani nepia upe? Tireganani apigawa supe maa Deus supe.

⁵Asui Anania usendu irumu kua nyenga uwari iwi upe umanu ae. Asui aintausikie muiri kuaita usenduwaita sese.

⁶Asui kuaita kurumiwasuita aintaupuamu aintaupupeka ipira fazenda irumu, asui aintaurasu aintaumburi iwi kuara kiti ae.

⁷Asui kuajintu musapiri ura rire uri kua Anania rimiriku, timaa ukuawa maye kua usasawawaa.

⁸Asui Pedru usu ipiri upurandu ae unyee: —Rembeu hasendu, maitaa pekampu rikuyara kua peruriwaa yande arama? Asui usuaxara ae: —Ẽẽ aete.

⁹Asui Pedru unyee ixupe: —Marantaa yepewasu peganani pesaã kua yaneruixawa Espiritu? Aintaipi kuaita umburiwaita nemena, aintauiku ukara kiti aintaurasu kuri yuiri inde.

¹⁰Asui aramete uwari Pedru ipi ruaki umanu ae. Asui aintauwike kuaita kurumiwasuita aintaumaa umanuana ae, asui aintaurasu ae aintaumburi iwi kuara kiti imena irumu.

¹¹Asui aintausikie muiri kuaita ingreja puraita panye kuaita usenduwaita yuiri sese maye usasawa.

¹²Asui kuaita apustuluita aintaumunya siya tiwaitare yamaa siya milagrita yuiri miraita umaa. Asui aintauyumuatiri yepewasu kupiara kiti serawaa Salumão.

¹³Asui kuaita amuita aintausikie aintauyumuatiri aintairumu maa panye kuaita miraita aintaurespetari ainta.

¹⁴Asui siya miraita aintauxari aintapia Kristu rese, siya apigawaita siya kunyaita yuiri.

¹⁵Asui aintaurasu kuaita imãsiwaita ukara kiti aintakama upe tupe rese yuiri aintausaru Pedru ianga usika aintarese yepeyepe usasawa upe.

¹⁶Asui aintauri siya miraita tetama sui Jeruzalẽ ruakintuwaita aintaururi kuaita mãsiwerawaita, kuaita urikuwaita yuiri demuniu ikiawaita, asui purangana panye ainta.

¹⁷Asui upuamu aintaruaxara kua saserdutita ruixawa kuaita yuiri sadusewita panye sumuaraita, aintaumuasi kirimbawa.

¹⁸Asui aintaupisika kuaita apustuluita asui aintauxari ainta kadeya upe.

¹⁹Maa pituna rame yepe yaneruixawa anju upirari kadeya rukena asui urasu ainta ukara kiti, ape umbeu ainta supe:

²⁰—Pesu pepuamu templu upe pembeu arama ainta supe kuaita miraita panye kua nyenga upakawaa.

²¹Asui aintausendu rire kua umbeuwaa aintausu kuema aintaumbue templu upe. Asui usika irumu kua saserdutita ruixawa uyumuatiri aintairumu kuaita serakuenawaita kuaita israelitaita ruixawaita yuiri asui aintaumundu amuita aintausu kadeya kiti aintauyuka arama ainta kadeya sui.

²²Maa kuaita guardaita aintausika rame kadeya kiti tiaintauwasemu ainta, asui aintauyuiri aintaumbeu panye.

²³Aintaumbeu: —Yawasemu uyumusikindawa santa kua kadeya rukena, asui kuaita usaruwaita aintausaru puranga ukena, maa yapirari irumu ukena nẽ awa yamaa ape.

²⁴Asui usendu irumu aintanyenga usikie usendu kua templu kapitão kuaita yuiri saserdutita ruixawa tiaintaukuawa mayetaa kuri usu usemu.

²⁵Asui amu usika umbeu ainta supe: —Kuaita pemburiwaita kadeya upe aintaumbue aintauiku miraita templu upe.

²⁶Asui kua kapitão kuaita yuiri guardaita aintausu aintapiri aintaurasu ainta merupiara nyãse aintausikie miraita sui, yawaite aintauyuká ainta ita irumu.

²⁷Asui aintaurasu rire ainta aintauxari ainta serakuenawaita umaa. Asui kua saserdutita ruixawa upurandu ainta, umbeu:

²⁸—Yambeuwana penye kirimbawa tiarama pembue sera rese, maa pemuteresemu panye Jeruzalẽ irumu kua pembuewaa asui peputari pexari yanerese suwi kua apigawa.

²⁹Asui Pedru usuaxara ainta kuaita yuiri amu apustuluita: —Yarikute yaruyari Deus nyenga apigawaita nyenga sui.

³⁰Asui aintaDeus kuaita yaneramunyaita usupiri Jesus manusawa sui kua peyukáwaa kurusa rese.

³¹Maa Deus usupiri ae ikatusawa upe tuixawa arama ae umukaturu aramawaa ae, uxari arama sasiyara aintaumanduari aintapuxuwerasawa kuaita israelitaita umburi arama aintasui aintapekadu.

³²Asui yande yamaa ae, kua yuiri kua Espiritu Santu Deus uxariwaa ainta supe kuaita uruyariwaita ae.

³³Asui aintausendu irumu kua nyenga ipiaiwa ainta asui aintauputari aintauyuká ainta.

³⁴Asui yepe farizeu aintasuiwara kuaita serakuenawaita serawaa Gamaliel, umbuewa ae panye kuaita miraita aintaurespetari ae usemu upuamu umundu aintauxarire aintausu kuaita apigawaita.

³⁵Asui unyee ainta supe: —Penye israelitaita, pemaa katu pesui pemunyawaa ainta supe kuaita apigawaita.

³⁶Nyãse kuxima yepe Teuda uputari aintaruixawa ae, asui aintauyumuatiri suaki kuaji kuatrusentu apigawaita, maa ukanyemu asui panye kuaita usuwaita sakakuera aintauyumusaĩ asui nemaa arama ainta.

³⁷Asui arire upuamu yepe Juda Galileya suiwara aintaupapari irumu aintasiyasawa kuaita miraita panye, asui siya usu sakakuera, asui ae yuiri ukanyemu asui aintauyumusaĩ panye kuaita usuwaita sakakuera.

³⁸Kuiri hambeu penye: —Tepepisika kuaita apigawaita, pexarire ainta, nyãse ukanyemu kuri kua aintaumbuewaa aintaumunyawaa yuiri apigawaita suiwara rame ae.

³⁹Maa Deus suiwara rame ae tikuri pepuderi pemukanyemu ae, yawaite maa pemuruanyana Deus. Asui aintaumunya kuaye umbeuwaa yawe.

⁴⁰Asui aintausenui kuaita apustuluita asui aintaunupa ainta asui aintaumundu tiarama ainta, umbeu sera rese kua Jesus, asui aintauxari aintausuu

⁴¹Asui aintausu serakuenawaita sui, suuri ainta aintaupuderi arama aintaupurara Jesus rera resewara.

⁴²Asui muiri ara aintaumbue templu upe uka upe yuiri tiaintakuere, aintaumbeu Kristu kua Jesus.