Read Nhengatu Atu 8 Bible Online

Atu 8 - Nhengatu bible

Atu 8

¹Asui kua Saulu puranga umaa aintauyuká Estevão. Asui nyã ara upe aintauyupiru aintaumuruanyana turusu kuaita ingreja puraita Jeruzalẽ upe, asui panye aintaumusaĩ Judeya kiti Samaria kiti yuiri, anyunte kuaita apustuluita aintauiku Jeruzalẽ upe.

²Asui yepeyepe apigawaita uruyariwaita aintaurasu Estevão ipira kuera iwi kuara kiti asui aintauyaxiu turusu.

³Maa Saulu umuaiwa kuaita ingreja puraita, uwike muiri uka usiki apigawaita kunyaita yuiri asui umburi ainta kadeya kiti.

⁴Asui kuaita uyusaĩwaita aintauwata aintaumbue kua nyenga.

⁵Filipe usu yepe tetama Samaria kiti umbeu Kristu rese.

⁶Asui kuaita miraita siyawaita yepewasu aintauruyari Filipe umbeuwaa aintausendu irumu ae, aintaumaa irumu yuiri milagrita umunyawaita.

⁷Nyãse kuaita demuniwita ikiawaita aintausasemu kirimbawa aintausemu irumu aintasui kuaita urikuwaita ainta, asui purangana siya kuaita membekawaita kuaita alejaduita yuiri.

⁸Asui suuri kuaita miraita nyã tetama upe.

⁹Apete yepe paye serawaa Simão tetama upe uxari aintausikie aintaumaa ae kuaita Samaria upewaita, umanduari puranga piri ae aintasui.

¹⁰Aintausendu ixupe panye, panye tainaita panye tuyuweita yuiri aintaumbeu kua apigawa Deus kirimbawasawa ae, aintaumuseruka ae kirimbawasawa turusuwaa.

¹¹Asui aintausendu ixupe nyãse uikupuku uxari aintausikie aintaumaa ipayesawa resewara.

¹²Maa aintauxari aintapia sese kua inyenga purangawaa Filipe umbeuwaa ainta supe, sese maye aintaruixawa arama kuri kua Deus sera rese yuiri kua Jesus Kristu, asui aintauxari ubatizari ainta kuaita apigawaita kunyaita yuiri.

¹³Asui Simão yuiri uxari ipia asui ubatizari rire usu Filipe irumu asui umaa panye kuaita —Tiwaitare umaa panye milagrita yuiri umunyawaita.

¹⁴Asui kuaita apustuluita Jeruzalẽ upe aintausendu aintausuanti Deus inyenga Samaria kiti asui aintaumundu aintapiri Pedru Juão yuiri.

¹⁵Asui aintauri aintaupurandu aintarese aintauriku arama kua Espiritu Santu.

¹⁶Nyãse umbaare uwiye aintarese, anyunte aintaubatizari ainta sera rese kua yaneruixawa Jesus.

¹⁷Asui aintauxari aintaipu aintarese, asui aintauriku kua Espiritu Santu.

¹⁸Asui Simão umaa irumu aintauriku kua Espiritu Santu apustuluita uxari resewara aintaipu aintarese uputari umee dinyeru ainta supe.

¹⁹Umbeu: —Pexari ixe arama yuiri kirimbawasawa aintauriku arama kuri Espiritu Santu kuaita kuri haxariwaita seipu aintarese.

²⁰Maa Pedru umbeu ixupe: —Nedinyeru ukanyemu kuri neirumu nyãse remanduari repuderi repiripana kua Deus uxariwaa sikuyaraimawate.

²¹Tirepuderi reajudari yande sese kua muraki nyãse timaa purangawaa remanduarisawa Deus umaa.

²²Ape sasiyara remanduari kua nepuxuwerasawa, asui repurandu yaneruixawa irumu uputari rame maa umburi nesui kua remanduarisawa nepia upe.

²³Nyãse hakuawa irawawaa remanduarisawa, asui nepuxuwerasawa umprezure inde.

²⁴Asui Simão usuaxara ainta supe, umbeu: —Pepurandu serese yaneruixawa irumu tiarama uwari serese kua pembeuwaa.

²⁵Asui kuaita apustuluita aintaumbue rire sese kua aintausenduwaa aintaumaawaa yuiri Jesus irumu aintaumbeu rire yuiri yaneruixawa rese aintauyuiri Jeruzalẽ kiti, asui aintausuwaa upe aintaumbue kua nyenga purangawaa siya tetama mirita supe Samaria kiti.

²⁶Asui yepe Yaneruixawa anju umbeu Filipe supe: —Resuana kurasi usemuwaa iarukanga kiti pee rupi urasuwaa yande Jeruzalẽ sui Gaza kiti kampu upewaa ae. Asui upuamu usu.

²⁷Asui yepe eunuku Etiupia suiwara upurakiwaa ixupe kua kunya Kandase Etiupia upewaraita ruixawa ae, aete usaruwaa panye maa iyaraita sipiwasuwaita, uri upurandu Deus irumu Jeruzalẽ kiti.

²⁸Uyuiriwaa upe uwapika ikaru upe uleri uiku kua utitikawaa Izaia umpinimawaa.

²⁹Asui Espiritu umbeu Filipe supe: —Remusuaki nyã karu asui resu irumu.

³⁰Asui Filipe uyana ipiri asui usendu uleri uiku kua utitikawaa umpinimawaa Izaia, asui upurandu ae: —Maitaa rekuawa mayesawa kua releriwaa?

³¹Asui usuaxara ae umbeu: —Maitaa maa hapuderi hakuawa mayesawataa ae tirame awa umbeu hasendu? Asui usenui Filipe uyupiri arama irumu ikaru kiti.

³²Aete kua uleriwaa Deus nyenga upe: "Aintaurasu ae kuaye uvelya yawe aintaurasuwaa aintauyuká aramawaa kiti, asui kuaye uvelya yawe ukiririntu uiku aintaipu upe aintaumunuka irumu isui sawa, timaa upirari iyuru.

³³Aintausaisu isui nyenga satambikawaa aintaumuwira kiti irumu ae. Awataa upuderi ukuawa kuaita upakawaita arame? Nyãse aintaumuyuiri sikuesawa kua mundu sui."

³⁴Asui kua eunuku umbeu Filipe supe: —Hapurandu inde, rembeu hasendu awa resetaa umbeu kua utitikawaa, maitaa umbeu sesepawate u amu rese?

³⁵Asui Filipe uyupiru umbue ae, umbeu ixupe mayesawataa kua uleriwaa Deus nyenga upe, asui umbeu ixupe Jesus rese.

³⁶Asui aintausuwaa upe pee rupi aintausika yepe parana rimbiwa upe, asui kua eunuku umbeu: —Remaa kua parana marantaa tirepuderi rebatizari ixe kuiri?

³⁷Asui Filipe umbeu ixupe: —Hapuderi reruyari rame panye nepia upe. Asui usuaxara ae, umbeu: —Haruyari Deus raira kua Jesus Kristu.

³⁸Asui umundu upitu kua ikaru, asui aintauye parana kiti kuaita mukuĩwaita. Asui Filipe ubatizari kua eunuku.

³⁹Asui aintausemu rire parana sui yaneruixawa Espiritu urasu Filipe, asui kua eunuku tiana umaa ae, asui usu sapee rupi suuri.

⁴⁰Asui aintauwasemu Filipe Azutu kiti, asui uwata umbue kua nyenga purangawaa panye tetama mirita kiti ate usika Sezareya kiti.