Read Nhengatu Atu 9 Bible Online

Atu 9 - Nhengatu bible

Atu 9

¹Maa kua Saulu umutawa ainta kuaita yaneruixawa umbuewaita uputari uyuká ainta, asui usu ipiri kua saserdutita ruixawa.

²Asui upurandu irumu urdẽ ainta supe kuaita usaruwaita sinaguga Damasku upe, urasu arama prezu Jeruzalẽ kiti panye kuaita uwasemuwaita usuwaita yaneruixawa rapee rupi, muiri apigawaita kunyaita yuiri.

³Asui usuwaa upe uiku pee rupi kuayentu Damasku sui kutara yepe turi umuturi sese iwaka sui.

⁴Asui uwari iwi upe, asui usendu yepe nyenga umbeu ixupe: —Saulu, Saulu, marantaa remuruanyana ixe?

⁵Asui Saulu upurandu: —Awataa inde seruixawa? Asui umbeu ixupe: —Ixete Jesus kua remuruanyanawaa.

⁶Maa repuamu resu tetama kiti, akiti kuri aintaumbeu inde arama mayetaa kuri remunya aramawaa.

⁷Kuaita usuwaita irumu aintaupita aintaupuamu aintaukiririntu aintausendu kua nyenga maa timaa nungara aintaumaa.

⁸Asui Saulu upuamu iwi sui upirari sesa maa tiupuderi umaa. Asui aintawajudari ae aintaipu irumu aintaurasu ae Damasku kiti.

⁹Asui musapiri ara tiumaa, asui timaa uu nẽ umbau yuiri.

¹⁰Ape Damasku upe yepe aintaumbuewaa serawaa Anania. Asui yaneruixawa umbeu ixupe ikerupiwaa upe: —Anania. Asui usuaxara ae: —Xukuite ixe, Seruixawa.

¹¹Asui Yaneruixawa umbeu ixupe: —Repuamu resu pee rupi serawaa Satambikawaa Juda ruka kiti, resikari yepe apigawa serawaa Saulu Tarsu suiwara nyãse upurandu Deus irumu.

¹²Umaawana yepe apigawa serawaa Anania uwike uka upe uxari ipu sese umaa arama mukuĩsawa.

¹³Maa Anania usuaxara ae umbeu: —Seruixawa hasenduana siya miraita irumu sese nyã apigawa, umunya turusu puxi ainta supe kuaita neyaraita Jeruzalẽ upe.

¹⁴Asui kuiri urikuana urdẽ aintauxariwaa kuaita saserdutita ruixawaita umprezu arama panye kuaita usenuiwaita nerera rese.

¹⁵Maa Yaneruixawa umbeu ixupe: —Resuana, nyãse haparawakawaa ae urasu arama serera ainta supe kuaita tiwaita judeu aintaruixawaita supe yuiri, ainta supe yuiri kuaita Israel rimiariruita.

¹⁶Nyãse hamukame umaa arama muiritaa kuri urikute upurara serera resewara.

¹⁷Asui Anania usu uwike uka kiti uxari ipu sese umbeu: —Semu Saulu, Yaneruixawa Jesus kua remaawaa reyuiriwaa upe pee rupi umundu ixe remaa arama mukuĩsawa, teresemu arama inde Espiritu Santu irumu.

¹⁸Asui aramete uwari sesa sui pirá pirera yawewaa, asui upuderiana umaa mukuĩsawa. Asui upuamu asui uxari ubatizari ae.

¹⁹Asui umbau rire, kirimbawana uyusaã.

²⁰Asui uikure yepeyepe ara Damasku upe aintairumu kuaita aintaumbuewaita asui umbue sinaguga upe Jesus rese, umbeu: —Deus raira ae.

²¹Asui aintaakayemu aintausendu panye kuaita usenduwaita ae, aintaunyee: —Maitaa tiserá aete kua apigawa umutawawaa ainta kuaita usenuiwaita Jesus rera rese Jeruzalẽ upe? Asui tiserá ae yuiri uri kua kiti upukuari arama urasu arama ainta saserdutita ruixawaita piri?

²²Maa Saulu umbue kirimbawa piri, asui umukiriri kuaita judewita uikuwaita Damasku upe umbeu resewara Kristu kua Jesus.

²³Asui Saulu umbue ainta siya ara asui kuaita judewita aintauyumuatiri uyumimisawa upe aintauyuká arama ae.

²⁴Maa Saulu usendu sesewara. Aintausaru tetama rukena upe ara rame pituna rame yuiri aintauyuká arama ae.

²⁵Maa kuaita aintaumbuewaita aintaurasu ae pituna rame aintauxari ae sextu upe aintaumuye ae kurara kupe sui.

²⁶Asui usika irumu Jeruzalẽ kiti uputari uiku aintairumu kuaita aintaumbuewaita maa aintausikie isui nyãse tiaintauruyari sã uruyariwaa ae.

²⁷Maa Barnabe uxari uwike irumu, asui urasu ae aintapiri kuaita apustuluita asui umbeu ainta supe maye umaa yaneruixawa pee rupi, asui umbeu ainta supe maye yaneruixawa umbeu ixupe maye yuiri umbue tiutiĩ Jesus rera rese Damasku upe.

²⁸Asui uiku aintairumu Jeruzalẽ upe uwata uyukuawa aintapiterupi, tiutiĩ umbue yaneruixawa rera rese.

²⁹Umbeu ainta supe: —Kuaita greguita asui uyusuaxara aintairumu, maa aintauputari aintauyuká ae.

³⁰Asui imuita Kristu rese aintausendu sesewara asui aintaurasu ae Sezareya kiti, asui aintaumundu ae usu Tarsu kiti.

³¹Asui timaarese panye kuaita ingreja puraita panye Judeya kiti Galileya kiti panye Samaria kiti yuiri, asui aintauyukiriari puranga, aintauwata puranga yaneruixawa umaa, asui kua Espiritu Santu umusuuri ainta, asui siyapiriana kuaita ingreja puraita.

³²Asui Pedru umaa aintapiri panye, asui usu yuiri umaa aintapiri kuaita uikuwaita Lida kiti.

³³Akiti uwasemu yepe apigawa serawaa Eneia imembeka ae, urikuana uitu akayu uyenu ikama upe.

³⁴Asui Pedru umbeu ixupe: —Eneia, Jesus Kristu umukaturu inde, repuamu remukaturu nekama. Asui aramete upuamu.

³⁵Asui panye kuaita Lida upewaita panye yuiri Saruna upewaita aintaumaa ae, asui aintautrukari aintaumanduariwaa yaneruixawa rese.

³⁶Aikue yepe kunya aintaumbuewaa Jupi upe serawaa Tabita yawesawa Durka, umunya turusu purangawaa, uajudari kuaita amuita yawewarawate.

³⁷Asui nyã ara upete mãsi upisika ae asui umanu, asui aintaumuyasuka rire ipira aintauxari ae yepe ukapi iwatewaa kiti.

³⁸Asui Lida uiku kuayentu Jupi sui; kuaita aintaumbuewaita aintausendu Pedru resewara asui aintaumundu mukuĩ apigawaita aintaumbeu arama ixupe: —Reyuiriana yanepiri kutara.

³⁹Asui Pedru upuamu usu aintairumu. Asui usika irumu aintaurasu ae ukapi iwatewaa kiti. Asui panye kuaita viuvaita aintaupuamu suaki aintauyaxiu, asui aintaumukame umaa panye rupa Durka umunyawaita uiku ramere aintairumu.

⁴⁰Maa Pedru umusemu ainta panye asui uyurinipia upurandu Deus, asui uyereu ipira banda kiti umbeu: —Tabita, repuamu. Asui upirari sesa, asui umaa irumu Pedru uyusikie uwapika.

⁴¹Asui upisika ae ipu irumu usupiri ae, asui usenui panye kuaita Deus iyaraita, kuaita yuiri viuvaita, asui uxari upakare ae ainta supe.

⁴²Asui sesewara usika aintapiri panye Jupi kiti, asui siya miraita aintauxari aintapia yaneruixawa rese.

⁴³Asui Pedru uiku siya ara Jupi kiti yepe apigawa irumu serawaa Simão upurakiwaa suu pirera.