Read Nhengatu Rumawaraita 1 Bible Online

Rumawaraita 1 - Nhengatu bible

Rumawaraita 1

¹Ixe Paulu upurakiwaa Jesus Kristu supe, kua Deus hapuraki ixupe sepia upe kua nyenga purangawaa Taira rese, serese maye hapurandu perese yawewaa usenuiwaa ixe umunduwaa ixe, uparawaka ixe hambeu arama kua Deus nyenga purangawaa.

²Kua Deus nyenga kuximawara umbeuwaa aintayuru sui utitikawaita nyenga purangawaa rese.

³Sese kua Taira, kua unaseriwaa umaa kua ara Davi rimiariru sui.

⁴Asui kirimbawa uxari yakuawa Deus raira ae sese kua Espiritu purangawaa asui upuamu manusawa sui aete kua yaneruixawa Jesus Kristu.

⁵Sesewara uxari yande arama purangawaa uxari yuiri umunduwaita yande sera rese yaxari arama aintauruyari ae panye kuaita tiwaita judeu.

⁶Penye yuiri aintasuiwara kuaita usenuiwaita Jesus Kristu yaraita arama ainta.

⁷Hampinima penye arama panye Deus ugustariwaita Ruma upewaita, penye usenuiwaita iyaraita arama penye, haputari uxari purangawaa penye arama, haputari yuiri uxari timaaresesawa penye arama yanepaya Deus irumu, kua yaneruixawa Jesus Kristu yuiri.

⁸Hayupiru hamee purangawaa seDeus supe arama Jesus Kristu rupi perese panye nyãse panye kua mundu upewaita aintausendu peruyari puranga.

⁹Nyãse kua Deus hapuraki ixupe sepia sesewara kua inyenga purangawa taira rese ukuawate serese maye hapurandu perese yawewarawate.

¹⁰Hapurandu irumu yawewarawate uxari arama hasu hamaa pepiri.

¹¹Nyãse turusu haputari hamaa penye, haputari haxari penye arama purangawaa Espiritu irumu peiku arama santa.

¹²Suuri arama kuri yayumaa sesewara kua yaruyariwaa, penye, ixe yuiri.

¹³Semuita, haputari pekuawa siya viaji haputari hamaa pepiri maa tire hapuderi hayuiri hapuu arama pepitera sui yepeyepe kuaye hapuuwaa yawe aintapitera sui kuaita amuita tiwaita judeu.

¹⁴Nyãse harikute hambue panye greguita panye amu miraita yuiri, panye ukuawaita, panye tiwaita ukuawaita yuiri.

¹⁵Ape mayentu hapuderi suuri ixe hambue arama penye arama kua nyenga purangawaa penye peiku Ruma upe yuiri.

¹⁶Tihariku tiĩsawa sesewara kua nyenga purangawaa nyãse aete Deus kirimbawasawa umukaturu arama panye kuaita uruyari ae, uyupiru kuaita judewita asui kuaita greguita yuiri.

¹⁷Nyãse kua nyenga purangawaa uxari yakuawa purangawaa kua Deus yaruyari resewara ae kirimbawa, yawe aintaumpinima kuera: "Upaka kuri kua purangawaa uruyari resewara."

¹⁸Ipiaiwa Deus umaa iwaka sui panye tiwaita uruyari panye aintapuxuwerasawa kuaita apigawaita uputariwaita umuserana kua inyenga supiwa aintapuxuwerasawa irumu.

¹⁹Nyãse yawewaa irumu yapuderi yakuawa Deus rese, aintaukuawate nyãse Deus uxari aintaukuawa ae.

²⁰Nyãse kua mundu uyupirungawa suiwara aintaukuawa Deus rese kua tiwa yamaa, panye ikirimbawasawa tiwa upawa, panye yuiri umundusara, uyukuawa yakuawa sese aintairumu kuaita umunyawaita. Asui kuaita apigawaita tiaintaupuderi aintaumbeu tiwaita ukuawa ainta.

²¹Aintaukuawa pukusawa Deus rese timaa aintaurespetari ae Deus yawe, tiyuiri aintaumee ixupe purangawaa, maa aintaumutenyuntu aintaumanduarisawa asui aintaumupitunawasu aintapia puxuwerawa.

²²Aintaumbeu ukuawaita ainta ape tiwaita ukuawaita ainta.

²³Aintauxari ipurangasawa kua Deus tiwa upawa, aintausikari arama apigawaita kuaita upawaita sangawa kuera, aintarangawa yuiri kuaita wiraita, suuita yuiri, buyaita yuiri.

²⁴Asui Deus uxari kuaita apigawaita panye ikiawaa supe arama, aintaumunya arama kuaye aintapia uputariwaa yawe, aintaumunya arama tenyuntu aintapira irumu aintapawa.

²⁵Asui aintautrukari kua Deus nyenga supiwa gananisawa irumu, aintaumee purangawaa umunyawaita supe, aintaupuraki yuiri ainta supe isui kua umunyawaa ainta, kua yameewaa ixupe purangawaa yawewarawate, amem.

²⁶Sesewara Deus uxari ainta panye puxuwerawa supe, asui kuaita kunyaita aintaumunya amu kiti aintapira irumu isui kua Deus uxariwaa aintaumunya.

²⁷Yawete yuiri kuaita apigawaita aintakuereana aintaumunya kunya irumu kuaye Deus uxariwaa yawe, asui yepewasute aintauyumaa aintawarixisawa aintapawa kuaita apigawaita aintaumunya tenyuntu asui muiri ainta aintaupurara aintapira upe, aintapuxuwerasawa resewara.

²⁸Tiresewara aintauputari aintaumanduari Deus, sesewara Deus uxari puxuwera aintaumanduariwaa aintaumunya arama tenyuntu.

²⁹Teresemu ainta panye puxuwerawa irumu, suuri aintaumunya aintapuxuwerasawa, umuasiwaita ainta, puxuwera aintapia, teresemu ainta umuasisawa irumu, aintauyuká mira, aintauyakawa, aintauganani, puxuwera ainta, aintaukuntari puxi amu rese,

³⁰Gananiwera ainta amu rese, ipiaiwa aintaumaa Deus, aintaumusasiyara amuita, purangawaita yawe aintauyusaã, aintaumuserana amuita, aintauputari aintauyupiru siya puxuwerawa, tiaintauruyari aintapayaita,

³¹Tiwaita ukuawaita ainta, tiwaita ukuawa umanduari ainta, tiaintaugustari amuita, timaa pirasua aintaumaa amuita.

³²Aintaukuawate Deus umbeuwaa aintaukuawate aintaukanyemu kuri isui sesewara kua aintaumunyawaa puxuwerawa, asui aintaumunya ae, asui suuri aintaumaa kuaita umunyawaita puxuwerawa kuaye aintaumunyawaa yawe.