Read Nhengatu Rumawaraita 10 Bible Online

Rumawaraita 10 - Nhengatu bible

Rumawaraita 10

¹Semuita, sepia sui haputari ainta, hapurandu Deus irumu aintarese umukaturu arama ainta.

²Nyãse hapuderi hambeu aintarese aintauputari Deus kirimbawa maa timaa aintaukuawa mayetaa.

³Tiaintaukuawa mayetaa puranga ainta Deus umaa, asui aintauputari puranga ainta aintaukuawasawa irumu, asui timaa aintauxari aintapia Deus purangasawa rese.

⁴Upawasawa Deus nyenga kuximawara aete Kristu, asui puranga arama umaa panye kuaita uruyariwaita ae.

⁵Muize umpinima kuera, awa umunya panye purangasawa kua Deus nyenga kuximawara umbeuwaa upakate kuri ae sesewara.

⁶Maa kua yaruyarisawa purangasawa umbeu: —Terepurandu nepia upe, awataa kuri usu iwaka kiti umuye arama Kristu?

⁷U awataa kuri uwiye tiipi kiti usupiri arama Kristu umanuwaita sui?

⁸Nyãse unyee: —Kuayentu nesui kua nyenga, apete ae neyuru upe, nepia upe yuiri kua uruyarisawa nyenga yambuewaa penye.

⁹Rembeu rame neyuru irumu neruixawa Jesus, asui reruyari rame nepia upe Deus usupiri ae manusawa sui umukaturu kuri inde.

¹⁰Nyãse yanepia irumu yaruyari puranga arama umaa yande; asui yaneyuru irumu yambeu sese kua salvasão.

¹¹Nyãse aintaumpinima: "Mayewaa uruyari ae tikuri utiĩ ae."

¹²Nyãse umbaa uparawaka judewita greguita sui, nyãse aintaruixawa ae panye ainta, nyãse uxari turusu purangawaa ainta supe panye kuaita upuranduwaita irumu.

¹³Nyãse panye kuaita upuranduwaita yaneruixawa irumu umukaturu kuri ainta.

¹⁴Maitaa maa aintaupuderi aintaupurandu irumu kua tiwa aintauruyari? Asui maitaa maa aintaupuderi aintauruyari kua tiwa aintausendu sese? Asui maitaa maa aintausendu ae tirame awa umbue ainta?

¹⁵Maitaa maa aintaumbue ainta tirame awa umundu ainta? Yawe aintaumpinima: "Purangawaita aintaipi kuaita umbuewaita nyenga purangawaa."

¹⁶Maa timaa panye aintauruyari kua nyenga purangawaa nyãse Izaia umbeu kuera: "Seruixawa, awataa uruyari kua yambuewaa?"

¹⁷Ape, aintauruyari sesewara kua umbuewaa, asui kua umbuewaa Kristu nyenga ae.

¹⁸Maa hapurandu: —Maitaa tiserá aintausendu? Ẽẽ aintausenduana, aintausendu aintanyenga panye mundu kiti, aintanyenga usikana panye kua mundu kiti.

¹⁹Hapurandu xinga: —Maitaa timaa kuaita israelitaita ukuawa sese? Nyãse Muize umbeuana: "Haxari kuri pemuasi amu mira, haxari kuri kuaita miraita tiwaita ukuawa umpiaiwa penye."

²⁰Asui Izaia tiusikie umbeu: "Aintauwasemuana ixe kuaita tiwaita kuera uputari ixe, hambeuwana aintaukuawa serese kuaita tiwaita kuera uputari ukuawa serese."

²¹Maa umbeu aintarese kuaita israelitaita: —Muiri ara hamukame ainta supe seipu kuaita miraita tiwaita uputari uruyari kuaita umuruanyanawerawaita.