Read Nhengatu Rumawaraita 12 Bible Online

Rumawaraita 12 - Nhengatu bible

Rumawaraita 12

¹Ape semuita hapurandu penye, nyãse pirasua Deus umaa penye, pexari Deus supe pepira kuaye upakawaa yawe, purangawaa yawe suuri arama Deus umaa, yawe perikute pemanduari ae.

²Tepemunya aintayawe kuaita mundu puraita, maa petrukari pemanduarisawa pisasua yawe pekuawa arama maye uputari peirumu puranga suuriwaa kua Deus.

³Ape hambeu penye arama irumu kua ipurangasawa uxariwaa ixe arama tiarama pemanduari peresepawa turusu isui kua purangawaa, maa pemanduari satambika perese kuaye Deus uxariwaa yawe peruyari peyaweyawe.

⁴Nyãse kuaye yanepira urikuwaa yawe sakanga, maa tiyepewasu aintamuraki aintayaweyawe,

⁵Yawete yuiri yande, siya yande maa yepenyute Kristu ipira yande, asui sakangaita yande panye amuita irumu.

⁶Ape yariku kua Espiritu uxariwaa irumu kuaye uxariwaa yawe yande arama ipurangasawa, uxari rame yatitika yarikute yatitika kuaye yaruyariwaa yawe.

⁷Uxari rame yapuraki yarikute yapuraki ixupe, uxari rame yambue yarikute yambue puranga,

⁸Uxari rame yambeu aintapekadu yarikute yambeu puranga, uxari rame yamee pirasuawaita supe yanemaa yarikute yaxari turusu, uxari rame yamundu amuita yarikute yamundu aintaukuawasawa irumu, asui uxari rame pirasua yamaa amuita yarikute yamunya ae suuri.

⁹Pegustari amuita supiwa, puxi pemaa panye puxuwerawa, peiku santa purangawaa rese.

¹⁰Pegustari amuita kuaye peyugustariwaa yawe penyepawate. Pesikie peyumaa amuita irumu.

¹¹Tepeyatima pepuraki, pexari Espiritu umuaku penye pepia upe, pepuraki yaneruixawa supe.

¹²Peyumusuuri sesewara kua pesaruwaa pemaa, pemuturusu pepia pepurara irumu, tepekuere pepurandu irumu.

¹³Peajudari kuaita uruyariwaita watari rame ainta supe maantu, suuri pesuanti mira.

¹⁴Pepurandu aintarese puranga kuaita umuruanyanawaita penye, pepurandu aintarese puranga maa tepembeu aintarese puxuwera.

¹⁵Peyumusuuri aintairumu kuaita suuriwaita, peyaxiu aintairumu kuaita uyaxiuwaita.

¹⁶Pexari yepewasu pemanduariwaa peyaweyawe, tepemanduari purangawaita penye amuita sui, maa pirasua peyumaa, tepemanduari ukuawaita penye amuita sui.

¹⁷Tepemunya puxi sikuyara ixupe kua umunyawaa penye arama puxi, pesikari kirimbawa pemunya puranga aintaumaa panye kuaita miraita.

¹⁸Pepuderi rame perikute tiarama maa rese peiku aintairumu kuaita miraita panye.

¹⁹Penye hagustariwaita, tepesikari pemunya ainta supe puxi sikuyara kua aintaumunyawaa penye arama puxi, maa pexari Deus ipiaiwa umaa ainta supe nyãse yawe aintaumpinima: "Ixete kuri hapagari ainta supe sikuyara, yawe umbeu yaneruixawa."

²⁰Maa neruanyana upurara rame yumãsi remee umbau arama, iisi rame remee uu arama, nyãse remunya rame yawe yawesawa remuatiri kuri tatapunya sendiwaa iakanga rese.

²¹Terexari puxuwera umuserana inde, maa remuserana puxuwerawa purangawaa irumu.