Read Nhengatu Rumawaraita 13 Bible Online

Rumawaraita 13 - Nhengatu bible

Rumawaraita 13

¹Panye apigawaita aintaurikute aintauruyari aintanyenga kuaita umunduwaita ainta kuaita tuixawaita, nyãse tiyamaa kuaita umundusara ainta tiwaita Deus uxari, asui kuaita umunduwaita penye kuiri Deus uxari aintaumundu.

²Ape awa umuruanyana kuaita umunduwaita yande umuruanyana yuiri kua Deus uxariwaa ainta, asui kuaita umuruanyanawaita ainta aintaupurara kuri.

³Kuaita umunyawaita puranga tiaintausikie aintasui kuaita umunduwaita ainta, maa kuaita umunyawaita puxi aintausikie. Maitaa reputari teresikie inde. Ape remunya puranga asuiwana aintaumbeu puranga nerese.

⁴Nyãse Deus uxari ae puranga arama reiku. Maa remunya rame puxi resikie kuri nyãse timaa retentu urasu sese espada uyuká aramawaa rupiara. Nyãse Deus uxari ae uxari arama upurara kua umunyawaa puxi.

⁵Ape yarikute yaruyari ae, timaa yasikiewaa resewara yapurara, maa yanepia umbeu resewara yande arama.

⁶Sesewara yuiri pepagari impustu, nyãse Deus uxari ainta umundu arama penye ape aintamuraki ae.

⁷Pemunya ainta supe puranga aintayaweyawe kuaye aintauputariwaa yawe, kua uputariwaa pepagari ae perikute pepagari ixupe, kua uputariwaa peirumu impustu pexari ixupe impustu, kua uputariwaa pesikie isui perikute pesikie isui, kua uputariwaa yawaite pemaa ixupe yawaite kuri pemaa ixupe.

⁸Tepedeveri amu supe, maa pedeveri kua gustarisawa, nyãse, kua ugustariwaa imu umunyate kuaye Deus nyenga kuximawara umbeuwaa yawe,

⁹Yawe umundu yamunya: "Teremunya warixi nerimiriku sui, tereyuká mira, teremunda, teremuasi," ape rame amu yamunya arama yapuderi yambeu ainta yepe nyenga irumu: "Perikute pegustari peimuita kuaye peyugustariwaa yawe penyepawate."

¹⁰Kua ugustariwaa imu tiumunya ixupe puxi, ape uruyari Deus nyenga kuximawara ugustari resewara ae.

¹¹Hambeu penye arama ukuawaitana kua ara, usikana perangawa pepaka arama penye tipusi sui, nyãse kuxima yayupiru yaruyari apekature yanerunde yayumukaturu arama yande maa kuiri kuayentuana yanerunde ae.

¹²Pituna usasawana yanesui kuayentuana ara arama yande. Ape yamburi yanesui kuaita yamundeuwaa yanerese kuaita yamunyawaita pitunawasu upe asui yamundeu yanerese kuaita yamunya aramawaa kera Deus mukawa irumu.

¹³Yarikute yawata aintayawe kuaita uwatawaita ara upe, timaa yawata aintayawe kuaita uikuwaita festa puxuwerawa upe, timaa yau kawĩ, tiyuiri warixi yande, timaa yuiri yamunya kuaye yanepira uputariwaa yawe, timaa yuiri yamaramunya, timaa yuiri yamundari,

¹⁴Maa pemundeu perese yaneruixawa Jesus Kristu, tepemunya kua puxuwerawa pepira uputariwaa umunya.