Read Nhengatu Rumawaraita 15 Bible Online

Rumawaraita 15 - Nhengatu bible

Rumawaraita 15

¹Yande kirimbawawaa yaruyari yarikute yawaguentari aintairumu kuaita pituawaita uruyari, maa timaa yayumusuuri arama yande pawantu.

²Ape yarikute yaneyaweyawe yamusuuri yanemu puranga arama uiku uyukiriari arama.

³Nyãse timaa yuiri Kristu uyumusuuri aepawa, maa kuaye aintaumpinimawaa yawe: "Aintapuxuwerasawa kuaita umuruanyanawaita inde uwari serese."

⁴Nyãse panye kua aintaumpinimawaa aintaumpinima ae yayumbue aramawaa ipupe, ape yaiku resewara santa suuri resewara yuiri yande irumu kua aintaumpinimawaa yariku arama kuri kua yasaruwaa.

⁵Haputari maa kua Deus urikuwaa pasiensia kua umusuuriwaa yuiri uxari yepewasu pemanduari kuaye Kristu Jesus uxariwaa yawe.

⁶Yepewasu arama penye pepia irumu peyuru irumu yuiri pemee purangawaa Deus supe ipaya kua yaneruixawa Jesus Kristu.

⁷Ape pesuanti amuita kuaye Kristu usuantiwaa yawe yande yamee arama purangawaa Deus supe.

⁸Ape hambeu penye arama usirkunsidariwaita ixupe aramawaa kua Kristu uxari arama aintaukuawa supiwa Deus, aintaukuawa arama supiwa umbeuwaa ainta supe kuaita yaneramunyaita.

⁹Aintaumee arama purangawaa Deus supe kuaita tiwaita judeu nyãse pirasua umaa ainta supe, kuaye aintaumpinimawaa yawe: "Ape hamee kuri purangawaa inde arama aintapiterupi kuaita tiwaita judeu, hanyengari kuri purangawaa nerera supe."

¹⁰Aintaumpinima yuiri: "Peyumusuuri penye tiwaita judeu aintairumu kuaita imiraita."

¹¹Aintaumpinima yuiri: "Pemee purangawaa Yaneruixawa supe muiri penye tiwaita judeu, pemee ixupe purangawaa panye penye miraita."

¹²Izaia umbeu yuiri: "Uri kuri kua Jese rapu, upuamu kuri aintaruixawa arama ae kuaita tiwaita judeu, irumute kuri aintausaru aintaumaa mundu nunkawaa upawa kuaita tiwaita judeu."

¹³Haputari maa kua Deus usaruwaa umaa umuteresemu penye suuriwaa irumu timaaresesawa irumu yuiri peruyari resewara ae, periku arama kuri turusu pesaruwaa ikirimbawasawa irumu kua Espiritu Santu.

¹⁴Asui, semuita, ixepawate hakuawa perese teresemu penye purangawaa irumu, teresemu penye ukuawasawa irumu, pekuawate pembue amuita.

¹⁵Maa hampinima penye arama yepeyepe nyenga kirimbawa piri pemanduari arama aintarese, sesewara kua purangasawa uxariwaa ixe arama kua Deus.

¹⁶Upurakisara arama ixe ixupe kua Kristu Jesus aintapiterupi kuaita tiwaita judeu sese kua Deus nyenga purangawaa, suuri arama kuri usuanti ainta aintauxariwaita ixupe kuaita tiwaita judeu Espiritu Santu umukaturu rire ainta.

¹⁷Ape sese kua Kristu Jesus hapuderi hambeu purangawaa sese kua semuraki Deus supe.

¹⁸Anyunte hapuderi hambeu purangawaa sese kua Kristu umunyawaa senyenga irumu hamunyawaita irumu yuiri haxari arama aintauruyari kuaita tiwaita judeu.

¹⁹Asui Espiritu Santu kirimbawasawa irumu hamunya milagri, asui hamunya yuiri kua tiwaita yapuderi yamunya yanekirimbawasawa irumu, asui yuiri hambue ainta panye kua nyenga purangawaa Kristu rese, panye Jeruzalẽ upe panye aintarendawa yaweyawe ate Iliriku kiti.

²⁰Ape kirimbawa haputari hambue kua nyenga purangawaa tiwa upere aintaumbue ainta supe Kristu rese tiarama hambue sese kua aintaumbuewaa.

²¹Maa kuaye aintaumpinimawaa yawe: "Aintaumaa kuri kuaita tiwaitare aintaukuawa sese, aintaukuawa kuri sese kuaita tiwaitare usendu sesewara."

²²Yawewaa resewara tihapuderi hasu hamaa pepiri.

²³Maa kuiri timaa kiti hambue ike. Nyãse siya viaji haputari hamaa pepiri.

²⁴Hamanduari hamaa kuri penye hasuwaa upe Espanya kiti, asui penye kuri pemundu ixe akiti hayumusuuri rire peirumu kutarantu.

²⁵Maa kuiri hasure Jeruzalẽ kiti hawajudari arama kuaita uruyariwaita.

²⁶Nyãse kuaita Maseduniawaraita Akaiawaraita yuiri suuri aintaumuatiri aintamaa ainta supe kuaita pirasuawaita aintapiterupi kuaita uruyariwaita Jeruzalẽ upe.

²⁷Suuri aintaumunya ae nyãse aintaudeveri ainta supe, aintauriku rame purangawaa Espiritu rese kuaita tiwaita judeu aintairumu kuaita judewita, ape aintaurikute aintawajudari yuiri ainta kua mundu yara irumu.

²⁸Asui hamee rireana ainta supe kua aintaumuatiriwaa ainta supe, ape hamaa kuri pepiri hasuwaa upe Espanya kiti.

²⁹Nyãse hakuawa hamaa irumu pepiri Kristu kuri uabensuari ixe turusu.

³⁰Kuiri hapurandu penye semuita sesewara kua yaneruixawa Jesus Kristu, sesewara yuiri kua Espiritu gustarisawa pepurandu kirimbawa Deus irumu ixe yuiri hapurandu serese,

³¹Umukaturu arama ixe aintasui kuaita tiwaita uruyariwaita Judeya upe, suuri arama ainta uruyariwaita usuanti kua semuraki Jeruzalẽ kiti.

³²Ape, Deus uputari rame hayuiri pepiri suuri hapitu peirumu puranga.

³³Haputari Deus uiku peirumu panye penye, kua uxariwaa timaarese penye. Amem.