Read Nhengatu Rumawaraita 16 Bible Online

Rumawaraita 16 - Nhengatu bible

Rumawaraita 16

¹Kuiri hambeu penye arama puranga sese kua yanerendira Febe kua upurakiwaa ingreja upe Senkreia upe.

²Pesuanti arama ae puranga yaneruixawa rese kuaye uruyariwaita yawe, peajudari ae panye maa rese kuaye uputariwaa yawe kuri peirumu, nyãse uajudariana siya mira ixe yuiri uajudari.

³Kuekatu Prisila supe Akila supe yuiri kuaita uajudariwaita ixe Jesus Kristu rese,

⁴Yawaite yaneruanyana uyuká ainta seresewara, asui hamee ainta supe purangawaa maa timaa ixenyu maa panye yuiri kuaita ingreja puraita tiwaita judeu.

⁵Kuekatu ainta supe yuiri kuaita ingreja puraita uyumuatiriwaita aintaruka upe. Kuekatu ixupe yuiri kua hagustariwaa Epenetu kua uyupiruwaa uxari ipia Kristu rese Azia upe.

⁶Kuekatu ixupe kua Maria kua upurakiwaa turusu penye arama.

⁷Kuekatu Adruniku supe Junias supe yuiri kuaita seanamaita aintaumprezuwaita ainta seirumu, kuaita Jesus umunduwaita aintaumaa puranga ainta, aintauxariwaita aintapia Kristu rese senundere.

⁸Kuekatu Ampliatu supe kua hagustariwaa seruixawa rese.

⁹Kuekatu Urbanu supe kua uajudari yande Kristu rese, kuekatu ixupe yuiri kua Estaki kua hagustariwaa.

¹⁰Kuekatu Apele supe kua pekuawawaa sese puranga ae Kristu rese. Kuekatu ainta supe kuaita Aristubulu ruka puraita.

¹¹Kuekatu seanama Erudião supe. Kuekatu ainta supe kuaita Narsizu ruka puraita kuaita uikuwaita yaneruixawa rese.

¹²Kuekatu ixupe kua Trifena ixupe yuiri kua Trifusa kuaita upurakiwaita yaneruixawa supe. Kuekatu yuiri ixupe kua Perside kua aintaumanduariwaa sese puranga upuraki yuiri turusu yaneruixawa supe.

¹³Kuekatu Rufu supe kua yaneruixawa uparawakawaa, ixupe yuiri kua imaya semaya yawewaa.

¹⁴Kuekatu Asinkritu supe, Flegunte supe yuiri, Ermes supe yuiri, Patruba supe yuiri, Ermas supe yuiri, ainta supe yuiri kuaita uyumuatiriwaita aintairumu.

¹⁵Kuekatu Filulugu supe julia supe yuiri, kuekatu Nereu supe sendira supe yuiri kuekatu Ulimpa supe ainta supe yuiri panye kuaita uyumuatiriwaa aintairumu.

¹⁶Pesuanti peanamaita, pebejari aintaruwa. Panye kuaita Kristu ingrejaita aintaumundu penye arama kuekatu.

¹⁷Hapurandu penye semuita, pemaa pesui kuaita uxariwaita puxi peyumaa, kuaita umunyawaita puxuwera pepiterupi, aintaumuruanyana kua nyenga peyumbuewaa sese, petirika aintasui.

¹⁸Nyãse kuaita yawewaa timaa aintaupuraki Kristu supe kua yaneruixawa, maa aintaupuraki ainta supe aramapawa, asui nyenga suuriwaa irumu aintauganani aintapia upe kuaita tiwaita umaa puranga aintasui.

¹⁹Nyãse panye kuaita amuita aintaukuawa perese peruyari puranga, ape suuri ixe sesewara, haputari pekuawa penye sese kua purangawaa, maa haputari tipekuawa sese panye puxuwerawa.

²⁰Asui kua Deus uxariwaa timaarese penye kutara kuri ukamirika peipi wira kiti kua Yurupari. Yaneruixawa Jesus purangasawa uiku peirumu.

²¹Timuteu kua uajudariwaa ixe umundu kuekatu penye arama, kuaita yuiri Lusiu, Jazum, Suzipatru aintaumundu yuiri kuekatu penye arama.

²²Ixe Tersiu hampinimawaa kua papera hamundu kuekatu penye arama yaneruixawa rese.

²³Gaiu umundu penye arama kuekatu, kua usuantiwaa ixe suka upe, usuanti yuiri panye kuaita ingreja supe aramawaa. Erastu kua usaruwaa dinyeru tetama upe umundu penye arama kuekatu, asui ae yuiri yanemu Kuatrusa umundu penye arama kuekatu.

²⁴Yaneruixawa Jesus Kristu purangasawa uiku peirumu panye penye. Amem.

²⁵Kuiri kua upuderiwaa umukirimbawa penye kuaye umbeuwaa yawe kua nyenga purangawaa hambuewaa kua umbuewaa Jesus Kristu rese, kuaye uxariwaa yawe yakuawa kua aintaumpinimawaa kuximare,

²⁶Maa kuiri uxari yakuawa ae, asui panye kuaita miraita aintaukuawa ae aintaumpinimawaa irumu kuaita utitikawaita kuaye umunduwaa yawe kua Deus tiwa upawa aintaumunya arama kuaye uputariwaa yawe aintauruyari resewara ae panye mundu kiti.

²⁷Ixupe kua Deus yepenyuwaa, kua ukuawawaa panye yamee purangawaa Jesus Kristu rese yawewarawate. Amem.