Read Nhengatu Rumawaraita 4 Bible Online

Rumawaraita 4 - Nhengatu bible

Rumawaraita 4

¹Asui maitaa hambeu sese kua urikuwaa kua yaneramunya Abraão?

²Nyãse puranga rame Deus umaa Abraão umunyawaita resewara, ape upuderi umbeu purangawaa sesepawate, maa tiDeus ixupe arama.

³Maitaa umbeu kua aintaumpinimawaa? Yawe umbeu: "Abraão uxari ipia Deus rese ape purangawaa yawe Deus umaa ae."

⁴Asui kua upurakiwaa umbaa sikuyaraimawaa kua upurakiwaa kua upurakiwaa rikuyara, maa uganyariwaa ae.

⁵Maa kua tiwa upuraki maa uxari ipia sese kua umukaturuwaa kuaita puxuwerawaita, purangawaa yawe umaa ae uxari resewara ipia sese.

⁶Yawe Davi umbeu yuiri: "Suuri kuri kua apigawa purangawaa Deus umaa ae imuraki sui.

⁷Suuri kuri kuaita uperduariwaita aintasui aintapuxuwerasawa, aintayuiri kuaita uyumimiwaa isui aintapekadu.

⁸Suuri kuri kua apigawa tiwa yaneruixawa Deus umaa sese ipekadu."

⁹Maitaa suuri anyunte kuaita usirkunsidariwaita u aintayuiri kuaita tiwaita usirkunsidariwaita? Nyãse yambeu: —Purangawaa yawe Deus umaa Abraão uruyari resewara ae.

¹⁰Mairametaa purangawaa Deus umaa ae, u usirkunsidari rire ae u senundere usirkunsidari ae? Umbaa sakakuera ae, maa senundere usirkunsidari ae.

¹¹Uxari ixupe arama kua sirkunsizão umukame arama purangawaa umaa ae uruyari resewara ae senundere usirkunsidari ae. Aintapaya arama ae panye kuaita purangawaita umaa aintauruyari resewara ae kuaita tiwaita usirkunsidari.

¹²Aintapaya yuiri ae kuaita usirkunsidariwaita, kuaita urikuwaita kua sirkunsizão uruyariwaita kuaye uruyariwaa yawe kuera kua yaneramunya Abraão senundere usirkunsidari.

¹³Kua Deus umbeuwaa Abraão supe ximiariruita supe yuiri aintayara arama kuri kua mundu, umbaa aintaumunya resewara kuaye Deus nyenga kuximawara umbeuwaa maa umaa resewara purangawaa yawe aintauruyari resewara ae.

¹⁴Aintayara kuri kua mundu kuaita umunyawaita kuaye Deus nyenga kuximawara umbeuwaa, asui anyunte retentu kuri kua yaruyariwaa, asui sikuyaraimawaa yuiri kuri kua umeewaa.

¹⁵Nyãse kua Deus nyenga kuximawara irumu yuiri ipiaiwasawa, mame tiyamaa Deus nyenga kuximawara ape tiyamunya puxuwera.

¹⁶Sesewara yarikute yaruyari, umbeuwaa peiku arama puranga sese kirimbawa ae ainta supe panye kuaita ximiariruita, umbaa anyunte kuaita uikuwaita Deus nyenga kuximawara rese maa aintayuiri kuaita uruyariwaita kuaye Abraão uruyariwaa yawe, nyãse aete yanepaya muiri yande.

¹⁷Kuaye aintaumpinimawaa yawe: "Haxari aintapaya arama inde kuaita miraita siyawaita." Umaawaa upe kua Deus uxariwaa ipia sese, kua uxariwaa aintaupaka kuaita umanuwaita, kua uxariwaa yamaa panye kuaita tiwaita yamaa.

¹⁸Abraão usaru umaa kua tiwa yapuderi yamaa, ukuawa ipia upe aintapaya kuri ae kuaita siyawaita miraita kuaye Deus umbeuwaa yawe ixupe: —Yawe kuri kuaita nerimiariruita.

¹⁹Umbaa pitua uruyari umanduari irumu yawaite pituasawa uyuká ipira, nyãse urikuana sem akayu asui waimiana yuiri kua Sara.

²⁰Umbaa mukuĩ umanduarisawa Deus umbeuwaa rese uruyari resewara ae, maa uyumukirimbawa uxari irumu purangawaa Deus supe.

²¹Kirimbawa umanduari Deus upuderi umunya ixupe kuaye umbeuwaa yawe.

²²Ape uruyari resewara purangawaa yawe Deus umaa ae.

²³Asui tianyunte Abraão resewara aintaumpinima sese puranga Deus umaa ixupe.

²⁴Maa yaneresewara yuiri. Puranga kuri umaa yande arama yande yaxari yanepia sese kua usupiriwaa yaneruixawa Jesus manusawa sui.

²⁵Kua aintauyukáwaa yanepuxuwerasawa resewara kua usupiriwaa manusawa sui puranga resewara umaa yande.