Read Nhengatu Rumawaraita 5 Bible Online

Rumawaraita 5 - Nhengatu bible

Rumawaraita 5

¹Ape purangawaa Deus umaa yande yaxari resewara yanepia sese, asui timaarese yaiku Deus irumu sesewara kua yaneruixawa Jesus Kristu.

²Ipupe yuiri yawike arama purangawaa kiti sese kua yaikuwaa kirimbawa sese, asui suuri yasaru yamaa Deus purangasawa.

³Maa tiirumupawa, maa suuri yande yuiri yapurara irumu, nyãse yakuawate yapurara rame uxari yaiku kirimbawa xinga.

⁴Yaiku rame santa puranga kuri yamanduarisawa, asui puranga rame yamanduarisawa yasaru kuri yamaa.

⁵Ape yasaru rame yamaa tikuri sasiyara yande, nyãse Deus uyusena ugustarisawa yanepia upe irumu kua Espiritu Santu uxariwaa yande arama.

⁶Nyãse umanu kua Kristu sangawa upe aintaresewara kuaita puxuwerawaita pitua ramere yande.

⁷Iwasu yepe umanu yepe purangawaa resewara, ape amu rame suuri yepe apigawa umanu arama yepe apigawa purangawaa resewara.

⁸Maa Deus uxari yakuawa ugustari yande umanu resewara kua Kristu yaneresewara puxuwerawaita pukusaware yande.

⁹Ape umukaturu yande suwi irumu yaeskapari arama Deus ipiaiwasawa sui.

¹⁰Nyãse suanyanaita ramere yande umukaturu yande irumu umanu resewara kua Taira, ape kuiri umukaturuwaita yande umukaturu yande upakawaa resewara.

¹¹Maa tiaenyu, maa suuri yuiri yande Deus rese sesewara kua yaneruixawa Jesus Kristu kua umukaturuwaa yande kuiri.

¹²Ape kuaye pekadu uwike kua mundu kiti yepe apigawa irumu, asui pekadu resewara manusawa usika yawete yuiri kua manusawa uwari aintarese panye kuaita apigawaita nyãse aintaumunya aintapekadu panye ainta.

¹³Pekadu uiku kua mundu upe senundere Deus uxari kua inyenga kuximawara, maa tiumbeu aintapekadu rese mame tiyamaa kua Deus nyenga kuximawara.

¹⁴Maa manusawa uiku aintapiterupi Adão uyupiru rame ate Muize aramete uiku aintapiterupi yuiri kuaita umunyawaita aintapuxuwerasawa tiwa Adão puxuwerasawa yawe. Adão rangawa kua uriwaa sakuera.

¹⁵Maa kua prezenti sikuyaraimawaa timaa yawe ae kua puxuwerawa. Umanu rame siya yepe apigawa puxuwerasawa resewara, siya xinga uriku Deus purangasawa, asui siyawaa supe arama kua prezenti uxariwaa ipurangasawa resewara irumu kua yepe apigawa serawaa Jesus Kristu.

¹⁶Asui kua prezenti sikuyaraimawaa timaa ae yawe yepe apigawa puxuwerasawa umunyawaa yawe. Nyãse kua gustarisawa uri yepe pekadu rakuera uxari tiarama aintaueskapari ainta, maa kua prezenti sikuyaraimawaa uriwaa siyawaita aintapekadu rakuera uxari purangawaa yawe Deus umaa ainta.

¹⁷Manusawa uiku rame aintapiterupi yepe apigawa puxuwerasawa resewara, turusu kuri aintauiku upakawaa kiti irumu kua apigawa Jesus Kristu panye kua usuantiwaa kua purangawaa kua prezenti sikuyaraimawaa purangawaa.

¹⁸Ape kuaye yepe apigawa puxuwerasawa uxari tiarama aintaueskapari panye kuaita apigawaita, yawete yuiri yepe apigawa umunya purangawaa uxari aintaueskapari panye apigawa aintaupaka arama kuri.

¹⁹Yawete yuiri yepe apigawa tiresewara uruyari uxari aintaumunya aintapuxuwerasawa kuaita siyawaita, yawete yuiri purangawaa Deus umaa kuaita siyawaita uruyari resewara kua yepe apigawa.

²⁰Asui uriana kua Deus nyenga kuximawara asui umuturusu aintapuxuwerasawa, ape rame turusu aintapuxuwerasawa, ape yuiri turusu piri isui kua Deus purangasawa.

²¹Ape yawe pekadu uxari umanu ainta, yawete yuiri ipurangasawa uxari puranga Deus umaa ainta aintauriku arama mundu nunkawaa upawa sesewara kua yaneruixawa Jesus Kristu.