Read Nhengatu Rumawaraita 6 Bible Online

Rumawaraita 6 - Nhengatu bible

Rumawaraita 6

¹Asui maitaa kuri yambeu? Maitaa yaikure yanepuxuwerasawa rese yariku arama turusu ipurangasawa?

²Umbaa. Maitaa maa yaikure yanepuxuwerasawa rese yande umanuwaitana isui?

³Maitaa tipekuawa aintaubatizari yande Kristu Jesus rese aintaubatizari yande manusawa upe?

⁴Ape batizmu irumu yayumimiwana Kristu irumu manusawa upe, ape kuaye Kristu upuamuwaa yawe manusawa sui yanepaya purangasawa irumu yawete yuiri yawata pisasuwaa upe.

⁵Nyãse yamanu rame irumu kuaye iyawe yapuamu yuiri kuri irumu maye iyawe.

⁶Nyãse yakuawana yamanduarisawa kuximawara uyari irumu kurusa rese umukanyemu arama kua yanepira puxuwerawa tiarama yaxari yanepuxuwerasawa supe aramawaita yande.

⁷Nyãse kua umanuwaa ueskapariana ae ipuxuwerasawa sui.

⁸Ape yamanu rameana yande Kristu irumu yakuawate yapakate yuiri kuri irumu.

⁹Nyãse yakuawa Kristu usemuana manusawa sui timaa kuri umanu mukuĩsawa yuiri, tikuri manusawa upuderi upisika ae.

¹⁰Ape umanu ae yepe viaji, umanu ae pekadu resewara, asui upakate ae, upaka ae Deus supe arama.

¹¹Yawete yuiri penye pemanduari perese pemanu penye pepuxuwerasawa sui, maa pepakate penye Deus supe irumu kua Jesus Kristu.

¹²Tepexari pepuxuwerasawa umundu penye pepira ukanyemuwaa upe pemunya arama kuaye uputariwaa yawe.

¹³Ape tiyuiri pexari pepira rakanga umuaiwa penye pemunya arama puxuwerawa, maa peyuxari penyepawate Deus supe kuaye aintayawe upuamuwaita manusawa sui; asui pexari pepira rakanga Deus supe pemunya arama purangawaa.

¹⁴Ape tikuri pepuxuwerasawa umundu penye nyãse timaa peiku Deus nyenga kuximawara rese maa peiku ipurangasawa rese.

¹⁵Asui maitaa kuri yaiku? Maitaa kuri yamunya yanepuxuwerasawa nyãse timaa yaiku Deus nyenga kuximawara rese maa yaiku ipurangasawa rese? Umbaa.

¹⁶Maitaa tire pekuawa ixupe aramawaita penye kua peputariwaa peruyari, u peruyari pepuxuwerasawa pemanu arama penye, u peruyari Deus puranga arama kuri umaa penye?

¹⁷Maa hamee purangawaa Deus supe arama nyãse kuxima pepuxuwerasawa supe aramawaita penye maa kuiri peruyari pepia sui pepia upe kua nyenga yambuewaa penye arama.

¹⁸Asui uyurawana penye pepuxuwerasawa sui, kuiri purangawaa supe arama penye.

¹⁹Kuiri hapurungita kuaye apigawa yawe nyãse pituare Penye. Nyãse kuaye pexariwaa yawe pepira rakanga puxuwerawa supe arama ainta pemunya arama turusu pepuxuwerasawa, yawete yuiri kuiri pexari pepira rakanga purangawaa supe arama ixupe aramawaita penye.

²⁰Nyãse pepuxuwerasawa supe arama irumu ramere penye timaa purangawaa uputari upisika penye.

²¹Maataa peganyari aintairumu kuaita pemunyawaita kuera kua pemaawaa puxi kuiri? Anyunte uxari pemanu penye.

²²Asui kuiri uyurawa irumu penye pepuxuwerasawa sui Deus supe aramawaitana penye, peganyari pemanduarisawa purangawaa, asui arire periku kuri mundu nunkawaa upawa.

²³Manusawa kua yanepuxuwerasawa rikuyara, maa kua prezenti sikuyaraimawaa Deus uxariwaa yande arama aete kua mundu tiwa upawa irumu kua Kristu Jesus yaneruixawa.