Read Nhengatu Rumawaraita 7 Bible Online

Rumawaraita 7 - Nhengatu bible

Rumawaraita 7

¹Semuita, kuiri hakuntari penye arama penye pekuawaita kua mundusawa, maitaa tipekuawa kua mundusawa umundu kuaita apigawaita aintaupakare ainta.

²Ape kua mundusawa umbeu sese kua kunya urikuwaa imena, urikute uiku imena irumu upaka ramere ae, maa umanu rameana isui ae anyunte uyurawa ae isui kua mundusawa umbeuwaa sese.

³Ape warixiwaa yakuawa kua kunya uiku rame amu apigawa irumu imena sui upaka ramere kua imena, maa umanu rameana imena uyurawa ae mundusawa sui, ape umendari rame mukuĩsawa tikuri warixiwaa ae.

⁴Ape yawete yuiri semuita, Kristu ipira upe pemanu penye Deus nyenga kuximawara sui iyara arama kuri penye kua usemuwaa umanuwaita sui, ape kuri yariku arama yaneiya Deus supe.

⁵Nyãse yaiku ramere kuaye yanepira uputariwaa yawe, asui kua Deus nyenga kuximawara umbaka kua yanepira uputari, asui anyunte kua yanepira rakanga umunya uxari yamanu yande.

⁶Maa kuiri yaeskapari yande Deus nyenga kuximawara sui, yamanuana yande isui kua umprezuwaa yande tiarama yamunya maye Deus nyenga kuximawara umunduwaa yawe maa yaiku sese kua pisasuwaa espiritu rese.

⁷Maitaa kuri yambeu? Maitaa puxuwerawa kua Deus nyenga kuximawara? Umbaa. Tihakuawa sepekadu tirame maa umbeu ixe arama ae kua Deus nyenga kuximawara, timaa hakuawa puxuwerawa yamuasi tirame maa Deus nyenga kuximawara umbeu ixe arama: "Teremuasi."

⁸Maa kua pekadu uwasemu purangawaa sese kua Deus nyenga kuximawara umunduwaa, asui uxari hamunya panye puxuwerawa, tirame maa yariku Deus nyenga kuximawara umanuwaa maa kua pekadu.

⁹Kuxima tiramere usika kua Deus nyenga kuximawara hapakate ixe, asui usika kua inyenga kuximawara umbaka sepekadu, asui hamanu ixe.

¹⁰Asui kua Deus nyenga kuximawara umunduwaa umbeu ixe arama kua mundu tiwa upawa uxari hakuawa hamanu ixe.

¹¹Nyãse kua pekadu uwasemu purangawaa sese kua Deus nyenga kuximawara umunduwaa anyunte uganani ixe asui uyuká ixe.

¹²Ape purangawaa kua Deus nyenga kuximawara umunduwaa, asui kua umbeuwaa purangawaa, satambika umbeu, purangawaa ae.

¹³Maitaa kua purangawaa uxari hamanu ixe? Umbaa. Upuraki resewara sepira upe kua pekadu uxari hamanu ixe irumu kua purangawaa, asui irumu yuiri kua Deus nyenga kuximawara umunduwaa hakuawate puxuwerawa kua pekadu panye sui.

¹⁴Nyãse yakuawate puranga Espiritu uxariwaa kua Deus nyenga kuximawara, maa ixe sepira supe arama ixe, pekadu upiripana ixe ixupe arama.

¹⁵Nyãse tihakuawa marantaa hamunya kua hamunyawaa. Nyãse tihamunya kua haputariwaa hamunya, asui hamunya kua tiwa hagustari.

¹⁶Ape hamunya rame kua tiwa haputari hamunya anyunte hakuawa purangawaa kua Deus nyenga kuximawara.

¹⁷Ape timaa ixe kua hamunyawaa kua puxuwerawa maa umunya ae kua pekadu uikuware sepira upe.

¹⁸Nyãse hakuawa tiyamaa purangawaa sepira upe, hakuawa haputari hamunya purangawaa maa tihapuderi hamunya ae.

¹⁹Nyãse tihamunya kua purangawaa haputariwaa hamunya, maa hamunya kua puxuwerawa tiwa haputari hamunya.

²⁰Ape hamunya rame kua tiwa haputari hamunya timaa ixe hamunya ae, maa umunya ae kua pekadu uikuware sepia upe.

²¹Ape hawasemu yepe mundusawa nyãse haputari irumu hamunya purangawaa anyunte puxuwerawa uiku sepia upe.

²²Nyãse hayumusuuri sepia upe sesewara kua Deus nyenga kuximawara uxariwaa yande arama.

²³Asui hawasemu yepe mundusawa sepira rakangaita upe umunya kera hamanduarisawa mundusawa ruaxara, asui umprezu ixe kua pekadu mundusawa uikuware sepira rakangaita upe.

²⁴Apigawa pirasuawaa ixe. Awataa kuri uyurawa ixe isui kua sepira uxariwaa hamanu ixe?

²⁵Hamee purangawaa Deus supe, Jesus Kristu yaneruixawa resewara. Ape kua Deus nyenga kuximawara uxari prezu hamanduarisawa, maa pekadu mundusawa umprezu sepira.