Read Nhengatu Rumawaraita 8 Bible Online

Rumawaraita 8 - Nhengatu bible

Rumawaraita 8

¹Ape kuiri timaa puxi Deus umaa ainta kuaita uikuwaita Kristu Jesus upe.

²Nyãse kua Espiritu mundusawa upakawaa Kristu Jesus rese uyurawana inde isui kua pekadu mundusawa uxariwaa yamanu yande.

³Nyãse Deus umunyana kua tiwa upuderi umunya kua Deus nyenga kuximawara nyãse yanepira umpitua kua inyenga, asui umundu Taira retewaa ipira irumu yanepira puxuwerawa yawe, yanepekadu resewara yuiri, asui Deus puxi umaa yanepekadu Kristu ipira upe.

⁴Yamunya arama yanepira upe kua purangawaa uputariwaa yamunya kua Deus nyenga kuximawara, yande tiwaita yamunya kuaye yanepira uputariwaa yawe, maa yamunya kuaye Espiritu uputariwaa yawe.

⁵Nyãse kuaita umunyawaita kuaye aintapira uputariwaa yawe aintaumanduari aintapira resentu, maa kuaita umunyawaita kuaye Espiritu uputariwaa yawe aintaumanduari kua Espiritu rese.

⁶Yamanduari rame yanepira rese anyunte uxari yamanu yande, maa yamanduari rame kua Espiritu anyunte uxari yapakate yande timaarese yuiri yande.

⁷Nyãse kua umanduari ipira rese Deus ruanyana ae, nyãse tiumunya kuaye Deus nyenga kuximawara uxariwaa yamunya, nyãse tiupuderi umunya ae.

⁸Ape kuaita umunyawaita kuaye aintapira uputariwaa yawe tiaintaupuderi aintaumusuuri Deus.

⁹Uiku rame pepia upe kua Espiritu Deus uxariwaa, tipemunya kuaye pepira uputariwaa yawe, maa kuaye Espiritu uputariwaa yawe. Awa tiuriku Kristu Espiritu timaa Kristu yara ae.

¹⁰Ape Kristu uiku rame pepia upe umanu pepira pepekadu resewara, maa upakate pepia purangawaa resewara.

¹¹Uiku rame pepia upe iEspiritu kua usupiriwaa Jesus manusawa sui, ape kuri kua usupiriwaa Kristu Jesus manusawa sui umbaka kuri pepira umanuwaa irumu kua Espiritu uikuwaa pepia upe.

¹²Ape semuita yadeveriwaita yande maa tiyanepira supe arama yamunya arama kuaye uputariwaa yawe.

¹³Nyãse pemunya rame kuaye pepira uputariwaa yawe pemanu kuri penye, maa pemukanyemu rame Espiritu irumu kuaita pepira umunyawaita pepakate kuri penye.

¹⁴Nyãse panye kuaita Deus Espiritu urasuwaita Deus rairaita ainta.

¹⁵Nyãse tiperiku kua espiritu uxariwaa pesikie arama yuiri, maa periku kua Espiritu uxariwaa Deus rairaita penye, asui irumu yambeu: —Yanepaya, yanepaya.

¹⁶Asui kua Espiritu umbeu yanepia irumu Deus rairaita yande.

¹⁷Ape tairaita rame yande ixupe aramawaita yande, Deus supe aramawaita yande, asui ixupe aramawaita yande Kristu irumu, yapurara rame irumu umbeu kuri yanerese puranga irumu yuiri.

¹⁸Nyãse hakuawa supiwa sikuyaraimawaa kua yapurarawaa kuiri isui kua purangasawa yamaa aramawaa kuri.

¹⁹Kirimbawa panye kuaita Deus umunyawaita usaruwaita umaa mayetaa kuri aintauiku ipurangasawa rese kuaita tairaita.

²⁰Nyãse uxari aintaupurara panye kuaita umunyawaita, timaa aintaupurara aintauputarisawa resewara, maa sesewara kua uxariwaa aintaupurara.

²¹Nyãse usaru uyurawa arama ainta panye kuaita umunyawaita isui kua ukanyemuwaa, uyurawa kuri ainta puranga kuaye aintayawe kuaita Deus rairaita.

²²Nyãse yakuawate panye umunyawaita aintaujemeri aintaupurara ate kuiri.

²³Maa tiaintanyu kuaita umunyawaita, maa yande yuiri yande yariku kua Espiritu kuiri, yepewasute yajemeri yanepia upe yasaru irumu usuanti yande taira yawe umukaturu arama yanepira.

²⁴Umukaturu yande yasaru resewara ae. Tiyasaru yamaa kua yamaawaa. Ape maitaa maa yasaru kua yamaawaa.

²⁵Maa yasaru rame yamaa kua tirewaa yamaa, yasaru uikupuku yasaru arama yamaa ae.

²⁶Yawete yuiri kua Espiritu uajudari yande pituawaita, nyãse tiyakuawa yapurandu Deus irumu puranga, maa kua Espiritu upurandu yanerese inyenga irumu tiwa yapuderi yakuawa.

²⁷Asui kua ukuawawaa yanepia upe ukuawa yuiri umanduarisawa kua Espiritu, ape kua Espiritu upurandu aintarese kuaita purangawaita kuaye Deus uputariwaa yawe.

²⁸Nyãse yakuawate Deus umunya purangawaa panye umunyawaita irumu ainta supe kuaita ugustariwaita ae, kuaita usenuiwaita kuaye Deus uputariwaa yawe.

²⁹Nyãse kuaita ukuawaita sese aintaunaseri rundere ainta, uxari aintauiku maye Taira yawe, aintaimu tuyuwewaa ae, ainta supe arama kuaita siyawaita imuita.

³⁰Asui kuaita uxariwaita ixupe aramawaa usenui yuiri ainta, asui kuaita usenuiwaita purangawaa yawe umaa ainta, asui kuaita umaawaita purangawaa yawe uxari ainta supe arama ipurangasawa.

³¹Ape maitaa kuri yambeu sese? Yaneirumu rame Deus awataa kuri upuderi umuruanyana yande?

³²Asui kua tiusaisu yanesui Taira retewaa maa uxari yaneresewara ae yande panye, maitaa kuri tiuxari yande arama yuiri panye maantu irumu?

³³Awataa kuri umbeu puxi aintarese kuaita Deus uputariwaita? Deus kua uxariwaa purangawaa ainta.

³⁴Awataa umbeu kuri puxi aintarese? Kristu kua umanuwaa, aete kua upuamuwaa manusawa sui, asui aete uwapikawaa Deus katusawa sui, asui upurandu yuiri yanerese.

³⁵Awataa kuri upuderi utiari yande Kristu gustarisawa sui? Maitaa purarasawa upuderi utiari yande? U sasiyarasawa, u umuruanyanasawa, u yumãsi, u tiresewara yariku rupa, u yawaitesawa, u espada será?

³⁶Yawe aintaumpinima: "Yagustari resewara inde aintauputari aintauyuká yande muiri ara. Asui aintaumaa yande uvelya aintauyuká aramawaita yawe."

³⁷Asui kirimbawa yamuserana panye kua puxuwerawa irumu kua ugustariwaa yande.

³⁸Nyãse hakuawate timanusawa upuderi utiari yande Deus gustarisawa sui, tiyuiri upakasawa nẽ anjuita yuiri, nẽ serakuenawaita yuiri, nẽ kuiriwaraita yuiri, nẽ kuaita yuiri yamaawaita kuri, nẽ kirimbawawaita yuiri.

³⁹Nẽ iwatesawa yuiri, nẽ tiipisawa yuiri, nẽ mayewaita kuaita umunyawaita upuderi kuri utiari yande isui kua Deus gustarisawa uiku kua Kristu Jesus yaneruixawa upe.