Read Nhengatu 1 Kurintuwaraita 1 Bible Online

1 Kurintuwaraita 1 - Nhengatu bible

1 Kurintuwaraita 1

¹Ixe Paulu, ae yuiri yanemu Susteni. Kuxima usenui ixe kua Deus uxari arama Jesus Kristu umundu ixe.

²Ainta supe kuaita Deus ingreja puraita Kurintu upewaraita, kuaita ixupe aramawaita aintauiku resewara Jesus Kristu ipia upe, aintairumu kuaita upuranduwaita yaneruixawa Jesus Kristu irumu, aintaruixawa yaneruixawa yuiri.

³Yanepaya Deus uxari ipurangasawa penye arama uxari timaaresesawa yuiri, irumu kua yaneruixawa Jesus Kristu.

⁴Hamee perese purangawaa seDeus supe yawewarawate, sesewara kua purangawaa Deus uxari penye arama Jesus Kristu resewara.

⁵Kristu resewara uxari rikuwaa penye, uxari pepurungita puranga, uxari ukuawasawa purangawaa pepia upe.

⁶Ape kua nyenga purangawaa Kristu rese uiku pepia upe.

⁷Sesewara periku panye Espiritu uxariwaa pepia upe pesaru pukusawa kua yaneruixawa Jesus Kristu uri.

⁸Umukaturu arama penye ate upawa kuri kua ara, tiarama kuri umbeu perese pepekadu pepuamu kuri irumu umaa kua yaneruixawa Jesus Kristu.

⁹Deus umunya kuri kuaye umbeuwaa yawe, aete kua usenuiwaa penye pegustari arama Taira, kua yaneruixawa Jesus Kristu.

¹⁰Kirimbawa hambeu penye arama penye semuita sera rese kua yaneruixawa Jesus Kristu, hambeu penye arama tiarama pemanduari amu kiti amuita sui, maa yepenyu arama pemanduari, yepenyu arama pepurungita.

¹¹Nyãse kuaita Klue ruka puraita aintaumbeu ixe arama peresewara peyuyakawa penye perumuaraita irumu.

¹²Nyãse yawe aintaunyee yepeyepe pesuiwara: —Paulu yara ixe, amuita umbeu Apulu yara ixe, amuita umbeu Sefa yara ixe, amuita umbeu Kristu yara ixe.

¹³Maitaa siya kua Kristu? Maitaa aintaunupa Paulu uyari kurusa rese peresewara? Maitaa aintaubatizari penye Paulu rera rese?

¹⁴Hamee purangawaa nyãse tihabatizari penye, anyunte Krispu, Gaiu yuiri,

¹⁵Tiarama nẽ awa umbeu habatizari penye serera rese.

¹⁶Habatizari Estefanu ruka puraita yuiri, tihamanduari sã habatizari amu.

¹⁷Nyãse timaa Kristu umundu habatizari arama miraita, maa umundu hambue arama kua nyenga purangawaa. Timaa hambue ainta hakuawasawa irumu tiarama hamutenyuntu kua Kristu umunyawaa yande arama kurusa rese.

¹⁸Nyãse kuaita uyusupariwaita aintaumanduari tenyuntu kua yambeuwaa kurusa rese, maa kua nyenga kurusa rese yande arama yande umukaturuwaita Deus kirimbawasawa ae.

¹⁹Nyãse yawe aintaumpinima kuxima: "Haxari kuri aintaukuawasawa ukanyemu kuaita ukuawaita, haxari kuri aintaukuawa tenyuntuwara aintaumanduarisawa."

²⁰Mametaa kua ukuawawaa? Mametaa kua umpinimawaa? Mametaa kua uputariwaa ukuawa kua ara? Maitaa timaa Deus uxari tenyuntuwara kua mundu ukuawasawa?

²¹Timaa Deus uxari aintaukuawa ae aintaukuawasawa irumu kuaita mundu upewaraita, maa irumu kua inyenga yambuewaa, yande tiwaita ukuawa, Deus uputari umukaturu kuaita uxariwaita ipia sese.

²²Kuaita judewita aintauputari aintaumaa yamunya milagri, asui greguita uputari ukuawa panye ukuawasawa.

²³Maa yambue sese kua Kristu aintaunupawaa kurusa rese, maa timaa judewita aintaukuawa mayesawataa kua nyenga, asui greguita aintaumanduari tenyuntuwara kua nyenga.

²⁴Maa kuaita Deus usenuiwaita aintasuiwara kuaita judewita greguita yuiri yambue ainta Kristu rese, Deus kirimbawasawa ae, Deus ukuawasawa ae yuiri.

²⁵Ape kua Deus akangaiwasawa puranga piri apigawaita ukuawasawa sui. Asui Deus pituasawa kirimbawa piri apigawaita kirimbawasawa sui.

²⁶Pemaa maye Deus usenuiwana penye, semuita, timaa usenui siya ukuawaita apigawaita ukuawasawa irumu, timaa yuiri siya kirimbawawaita timaa yuiri siya rikuwaita.

²⁷Maa Deus usenuiwana tiwaita ukuawa uxari arama aintaumutiĩ arama kuaita ukuawawaita, usenuiwana kuaita pituawaita aintaumutiĩ arama kuaita kirimbawawaita.

²⁸Deus uparawaka kuaita pirasuawaita, uparawaka kuaita aintaumburiwaa, kuaita tiwaita yamanduariwaa yuiri umukuaira arama kuaita yamanduariwaa.

²⁹Uparawaka yawewaa tiarama yepe umanduari puranga ae ukuawasawa irumu Deus umaa.

³⁰Maa iyaraita arama penye Kristu Jesus rese, uxari yande arama Kristu ukuawasawa, uxari yande arama ipurangasawa, uxari Deus supe arama yande, uxari Kristu upiripanawaita yande umuyuiri arama yande ixupe arama.

³¹Ape kuaye aintaumpinimawaa yawe kuxima: "Kua uputari umbeu puranga sesepawa, urikute umbeu puranga sese kua Yaneruixawa."