Read Nhengatu 1 Kurintuwaraita 11 Bible Online

1 Kurintuwaraita 11 - Nhengatu bible

1 Kurintuwaraita 11

¹Pemunya kuaye hamunyawaa yawe nyãse hamunya kuaye Kristu umunyawaa yawe.

²Semuita, hambeu peresewara purangawaa nyãse pemanduari ixe yawewarawate, nyãse pemunya kuaye hambuewaa yawe penye.

³Maa haputari pekuawa arama apigawaita akanga kua Kristu, asui kunyaita akanga aintamena, asui Kristu akanga Deus.

⁴Umunya tenyuntu iakanga supe kua apigawa uyumimi iakanga upurandu rame Deus irumu utitika irumu Deus nyenga yuiri.

⁵Maa kunya tirame uyumimi iakanga upurandu irumu Deus utitika yuiri, umunya tenyuntu iakanga supe aintayawe kuaita aintaumunuka aintaawa aintasui panye.

⁶Tirame uyumimi iakanga veu irumu, puranga umunuka isui iawa. Utiĩ rame kua kunya umunuka iawa pexari uyumimi iakanga veu irumu.

⁷Timaa apigawaita uyumimi iakanga nyãse Deus yawe ainta, Deus purangasawa ainta maa apigawa purangasawa kuaita kunyaita.

⁸Nyãse timaa Deus umunya apigawa kunya suiwara, maa umunya kunya apigawa suiwara.

⁹Nyãse yuiri timaa Deus umunya apigawa kunya resewara, maa umunya kunya apigawa resewara

¹⁰Ape aintauyumimi arama aintaakanga kuaita kunyaita aintaresewara kuaita anjuita umaawaita ainta supe.

¹¹Ape timaa apigawa uiku kunya sui yawete yuiri kunya tiuiku apigawa sui nyãse yaneruixawa rese yepewasu ainta.

¹²Kuxima Deus umunya kunya apigawa sui, asui apigawaita usemu umaa kua ara kunyaita sui, maa Deus suiwara kua panye maa.

¹³Penyete pembeu yasendu, maitaa puranga aintaupurandu Deus kuaita kunyaita tirame aintauyumimi aintaakanga?

¹⁴Tiserá pekuawasawa uxari pekuawa umutenyuntuwara kua apigawa urikuwaa iawa ipukuwaa.

¹⁵Maa kua kunya suuri umaa iawa ipukuwaa nyãse Deus uxari ixupe arama iawa ipupekawa yawe.

¹⁶Amu umanduari rame apekatu yanesui tiyapuderi yaxari umunya apekatu isui kua yamunyawaa, tiyuiri Deus ingreja uxari aintaumunya apekatu yamunyawaa sui.

¹⁷Asui tihambeu purangawaa peresewara sesewara kua hambeuwaa kuiri, nyãse peyumuatiri irumu timaa pemunya puranga maa pemunya puxuwerawa.

¹⁸Pemunya puxuwerawa peyumuatiri irumu, hasendu peresewara timaa yepewasu pemanduari, asui supiwa kua hasenduwaa.

¹⁹Aintaukuawa supiwa aintaumanduarisawa kuaita yepeyepe perumuaraita, nyãse tiyepewasu aintaumanduarisawa kuaita yepeyepe pesuiwaraita.

²⁰Peyumuatiri irumu timaa pembau supiwa kua yaneruixawa Seya,

²¹Peyumuatiri irumu pembau amuita sui anyunte, yepeyepe upurara yumãsi, yepeyepe aintaukau uiku.

²²Maitaa penye? Maitaa tipepuderi pembau peruka upe? Marantaa pemutenyuntu kua Deus ingreja? Maitaa peputari pemutiĩ arama kuaita tiwaita uriku timbiu? Maitaa kuri hambeu penye arama? Maitaa hambeu puranga penye arama sesewara kua pemunyawaa? Timaa kuri hambeu puranga penye arama.

²³Kua hambeuwaa penye arama aete kua Yaneruixawa umbeu ixe arama. Nyã pituna aintaumprezu runde ae, Yaneruixawa upisika yepe pão;

²⁴Uabensuari rire kua pão umpena ae, unyee: "Aete sepira kua, ukanyemu kuri peresewara, pembau ae pemanduari arama ixe."

²⁵Aintaumbau rire Jesus upisika yepe kupu, unyee: "Kua kupu aete nyenga pisasua seruwi upe, pemunya kuaye pemanduari arama ixe mairame peu ae."

²⁶Yawewarawate kuri irumu kua pão kupu yuiri pemukame aintaumaa mayetaa umanu kua peruixawa ate mairame uri yuiri.

²⁷Umbau rame yaneruixawa pão, uu rame ikupu sui yuiri kua tiwa uputari uxari ipekadu uriku ipuxuwerasawa sese nyãse umutenyuntu kua yaneruixawa ipira suwi yuiri.

²⁸Ape pexari aintaumanduari aintapia upe aintayaweyawe kuaita miraita aintaumbau arama kua pão aintauu arama kua kupu sui yuiri.

²⁹Umbau rame, uu rame yuiri kua tiwa ukuawa mayesawataa ipira aintaumunya ixupe puxi kua umbauwaa uuwaa yuiri.

³⁰Ape sesewara pitua siya pesuiwara, aintauriku mãsi yuiri ainta; sesewara umanu pesuiwara yepeyepe.

³¹Yambeu rame yanepekadu yandepawate tikuri Deus umbeu yanepekadu rese.

³²Yaneruixawa uxari yapurara yanepekadu resewara tiarama yakanyemu isui aintairumu panye kuaita mundu puraita.

³³Ape semuita, peyumuatiri irumu kuri pembau arama, perikute pesaru aintauri kuaita perumuaraita.

³⁴Pexari umbau suka upe kua sasi ixupe yumãsi yawaite pemunya penye arama puxi peyumuatiri irumu. Hambeu kuri penye maa xinga haputari hambeu penye arama hasu irumu hamaa pepiri.