Read Nhengatu 1 Kurintuwaraita 12 Bible Online

1 Kurintuwaraita 12 - Nhengatu bible

1 Kurintuwaraita 12

¹Kuiri semuita, tihaputari tiwaita ukuawa penye aintarese kuaita Espiritu Santu uxariwaita yanepia upe.

²Pekuawate kuxima tirame pekuawa penye aintauganani penye peruyari arama idulu kuaita tiwaita upurungita kuaita aintaurasuwaa kuera penye.

³Ape haputari pekuawa arama timairame upuderi umbeu puxi Kristu rese kua urikuwaa Deus Espiritu ipia upe. Tiawa upuderi umbeu: —Seruixawa Jesus, tirame maa Espiritu Santu uxari umbeu yawe.

⁴Siya kuaita Espiritu uxariwaita yande arama, maa yepenyute kua Espiritu.

⁵Siya yanemuraki yaneruixawa supe maa yepenyute kua yaneruixawa.

⁶Siya yapuderi yapuraki ixupe kua Deus maa aete kuri uxari yanepia upe yakuawa arama mayetaa yapuraki ixupe muiri yande.

⁷Uxari muraki ainta supe aintayaweyawe irumu kua Espiritu, puranga arama aintauiku muiri ainta.

⁸Uxari yepe upurungita ukuawawaa yawe irumu kua Espiritu, uxari yuiri amu ukuawa umbeu nyenga purangawaa irumu kua Espiritu.

⁹Uxari yuiri amu uxari ipia sese uruyari kirimbawa irumu kua Espiritu, uxari yuiri amu umburi mãsi Espiritu irumu.

¹⁰Uxari yepe umunya milagri, uxari amu utitika, uxari amu ukuawa espirituita rese. Uxari amu umbeu arama amuita nyenga, uxari amu umbeu mayesawataa kua amuita nyenga.

¹¹Yawe uxari aintaumunya irumu kua Espiritu, aete uxari aintaukuawasawa aintayaweyawe kuaye uputariwaa yawe.

¹²Yepenyute kua yanepira maa siya kua yanepira rakangaita, maa yanepira panye kuaita yanepira rakangaita yawete yuiri Kristu ipira yande panye.

¹³Nyãse yepenyu Espiritu irumu yayubatizari, yepenyute Kristu ipira yande panye, judewita, tiwaita judeu yuiri, prezuita yuiri, tiwaita prezu yuiri uxari yau panye kua Espiritu yepenyu.

¹⁴Timaa yepenyu uriku sakanga kua yanepira maa siyawaa ae.

¹⁵Yaneipi umbeu rame: "Timaa ixe neipu ape timaa nepira yara ixe." Timaa ikuere yanepira rakanga ae umbeu resewara yawe.

¹⁶Yaneapisa kuara umbeu rame: "Timaa ixe nerese ape timaa nepira yara ixe." Timaa ikuere nyãse yanepira rakanga ae.

¹⁷Yaneresa rame panye yanepira, maitaa maa yapuderi yasendu? Yaneapisa kuara rame panye yanepira, maitaa maa yapuderi yasetuna yanetiĩ upe?

¹⁸Maa Deus uxari panye yanepira rakangaita panye kuaye uputariwaa yawe.

¹⁹Yepenyu rame maa yanepira rakangaita mametaa kua yanepira.

²⁰Maa siya yanepira rakangaita, maa yepenyute kua yanepira.

²¹Kua yaneresa tiupuderi umbeu ixupe kua yaneipu: "Timaarese nesui ixe." Tiyuiri yaneakanga upuderi umbeu yaneipi supe: "Tihaputari penye."

²²Maa kua yanepira rakangaita pituawaa ainta tiyapuderi timaarese yande aintasui.

²³Maa yarespetari kuaita yanepira rakangaita tiwaita puranga. Asui kuaita yanepira rakangaita yayumimiwaita yarikute yamukaturu ainta puranga yanerupa irumu.

²⁴Tiyayumimi panye yanepira rakangaita purangawaita, maa Deus uxari imuraki iwasuwaita kua yanepira rakanga yayumimiwaa miraita sui.

²⁵Yepewasu arama yanepira rakangaita uiku, aintauwajudari arama aintairumu yepewasu.

²⁶Upurara rame yepe yanepira rakanga aintaupurara kuri irumu panye yanepira rakanga. Puranga rame uiku yepe yanepira rakanga suuri kuri irumu panye.

²⁷Kuiri Kristu ipira penye, ape ipira rakangaita panye peyaweyawe.

²⁸Deus uyupiru uxari apustuluita aintauwajudari ingreja upe, asui uxari kuaita utitikawaita inyenga, asui umbuesaraita, asui umunyawaita milagri, asui umburiwaita mãsi, asui uxari yepeyepe uajudari amuita, asui uxari usarusaraita, asui uxari yepeyepe aintaumunya panye maa ixupe, asui upurungitawaita amu nyenga rupi.

²⁹Maitaa Deus uxari apustuluita muiri penye. Maitaa panye pekuawa petitikawaa Deus nyenga rese. Maitaa umbuesaraita muiri penye. Maitaa muiri penye pemunya milagri.

³⁰Maitaa uxari panye miraita umburi mãsi. Maitaa panye pepurungita amuita nyenga rupi. Maitaa panye pekuawa mayesawataa kuaita amuita nyenga.

³¹Ape, pesikari kirimbawa kua Espiritu Santu uxariwaa penye arama, asuiwana hambue penye amu pee rese puranga piri isui.