Read Nhengatu 1 Kurintuwaraita 13 Bible Online

1 Kurintuwaraita 13 - Nhengatu bible

1 Kurintuwaraita 13

¹Hapurungita rame ixe aintanyenga rupi panye apigawaita anjuita yuiri, tikuri maa arama ixe arama ainta supe amuita tirame hagustari ainta, nyãse puxi senyenga usika aintaapisa kuara upe kuaye sinu kirimbawawaa yawe, feru yawe yuiri yanupa irumu ae tirame maa hagustari ainta.

²Hakuawa rame hatitika puranga Deus nyenga, hakuawa rame panye iwasuwaa yakuawa, panye yuiri yamanduarisawa, haxari rame sepia Deus rese kirimbawa hamburi arama kuri kua iwitera, tenyuntuwara maa ixe tirame hagustari amuita.

³Haxari rame pirasua supe panye semaa, haputari rame maa aintausapi ixe, timaa nungara haganyari tirame hagustari amuita.

⁴Kua gustarisawa uxari tiyanepiaiwa yande, uxari yuiri puranga yayumaa, tiuxari yamuasi, timaa uxari yamanduari puranga yanerese, timaa yuiri uxari yamanduari yakuawa piri amuita sui.

⁵Kua gustarisawa tiuxari puxi yasuaxara amuita, tiuputari aintaumunya kuaye yaputariwaa yawe, timaa uxari ipiaiwawaa yande, tiuputari yamuruanyana yaneruanyanaita.

⁶Kua gustarisawa tiuxari suuriwaa yande puxuwerasawa resewara, maa uxari suuri yanepia aintaumunya rame puranga.

⁷Kua gustarisawa uxari yapurara aintairumu; uxari yaruyari panye; uxari yasaru uikupuku; maantu puxuwerawa uri sese uaguentari irumu.

⁸Kua gustarisawa tikuri upawa; maa kua nyenga aintautitikawaa upawa kuri; kua amuita nyenga upawa yuiri kuri; ukuawasawa yuiri upawa kuri.

⁹Nyãse tire puranga yakuawa, tiyuiri puranga yatitika.

¹⁰Maa mairame kuri uri kua purangawaa, ape kua tiwa puranga upawa kuri.

¹¹Taina ramere ixe hapurungita kuaye taina yawe, hayusaã kuaye taina yawe, hamanduarisawa kuaye taina yawe, asui tuyuwe rameana ixe haxari sesui taina ukuawasawa.

¹²Nyãse kuiri yamaa pitunawasu upe kuaye yamaawaa waruwa upe, maa yamaa kuri suaxara kuayentuana. Kuiri yakuawa kuaira maa yakuawa kuri panye kuaye ukuawa yawe serese.

¹³Ape yawewarawate kuri aintauiku kuaita musapiri; uruyarisawa, usarusawa gustarisawa yuiri, maa puranga piri aintasui aete kua gustarisawa.