Read Nhengatu 1 Kurintuwaraita 14 Bible Online

1 Kurintuwaraita 14 - Nhengatu bible

1 Kurintuwaraita 14

¹Pesikari pegustari amuita supiwa, pepurandu Deus uxari penye arama kua Espiritu uxariwaa, pesikari kirimbawa petitika arama inyenga.

²Nyãse kua upurungitawaa amu nyenga rupi upurungita Deus supe, timaa apigawa supe, nyãse tiawa ukuawa kua nyenga, maa Espiritu uxari kua umbeu kua tiwa yakuawa.

³Asui kua utitikawaa Deus nyenga umbue apigawaita aintauiku arama santa Deus irumu, aintauxari arama aintapekadu suuri arama kuri aintapia.

⁴Kua upurungitawaa amu nyenga rupi uyumbue ae pawantu. Maa kua umbuesara uajudari kuaita ingreja supe aramawaita.

⁵Haputari pepurungita amu nyenga rupi, maa kirimbawa piri haputari petitika arama Deus nyenga aintausendu arama panye. Kua utitikawaa Deus nyenga puranga piri isui kua upurungitawaa amu nyenga rupi tirame awa umbeu ingreja supe arama mayesawataa kua umbeuwaa.

⁶Kuiri semuita, hayuiri rame pepiri hapurungita rame amu nyenga rupi, maitaa hapuderi hawajudari penye puranga? Maitaa hapuderi hawajudari penye tirame hambeu penye yepe nyenga Deus uxari ixe arama? U yakuawasawa rese, u umbuesawa rese u nyenga iwasuwaa rese.

⁷Kuaita tiwaita upaka kuaye flauta yawe arpa yawe yuiri, tirame aintaupeyu puranga ainta maitaa kuri yapuderi yakuawa kua aintaupeyuwaa?

⁸Aintaupeyu rame trumbeta pitua usenui arama surara, maitaa aintauyumukaturu aintaumunya arama kera?

⁹Yawete yuiri penye, pepurungita rame penye pitua amu nyenga rupi, maitaa kuri aintaupuderi aintaukuawa kua pembeuwaa ainta supe, anyunte pepurungita iwitu upe.

¹⁰Siya kua mundu puraita nyenga, aintaukuawa mayesawataa aintanyenga aintayaweyawe.

¹¹Maa tirame hakuawa mayesawataa kua aintanyenga apekatuwara yawe umaa ixe kua upurungitawaa, asui apekatuwara yawe hamaa kua upurungitawaa.

¹²Yawete yuiri penye kirimbawa pesikari Espiritu uxariwaa penye arama, ape pesikari peajudari kuaita ingreja supe arama kirimbawa Deus ukuawasawa uyukiriari aintapia upe.

¹³Ape kua upurungitawaa amu nyenga rupi urikute upurandu Deus irumu ukuawa arama mayesawataa kua umbeuwaa ainta supe.

¹⁴Hapurandu rame Deus irumu amu nyenga rupi hapurandu kuri sepia sui maa tihamanduari sese sepia upe.

¹⁵Asui maitaa kuri hamunya? Hambeu kuri Deus sepia sui, hambeu kuri hamanduarisawa irumu yuiri. Hanyengari sepia sui hamanduarisawa irumu yuiri.

¹⁶Remee rame purangawaa Deus supe amu nyenga rupi, maitaa aintaupuderi aintaumbeu amem neirumu tirame aintaukuawa mayesawataa kua nenyenga.

¹⁷Repuderi remee purangawaa, maa tirepuderi reajudari amuita tirame aintaukuawa mayesawataa kua nenyenga.

¹⁸Hamee purangawaa Deus supe nyãse hakuawa hapurungita amu nyenga rupi turusu piri panye pesui.

¹⁹Maa ingreja upe haputari hambue amuita ape puranga piri hambeu sinku nyenga aintanyenga rupi isui dezi mili amu nyenga rupi tiwa aintaukuawa.

²⁰Semuita, tepemanduari taina yawe. Tepeiku puxuwerawa rese kuaye taina yawe, maa pesikari pemanduarisawa puranga kuaye apigawa yawe.

²¹Kuxima Muize umpinima ipapera upe: "Hapurungita kuri ixe ainta supe kuaita miraita aintayuru sui kuaita apigawaita upurungitawaita amu nyenga rupi, aintayuru sui yuiri kuaita apekatu suiwaraita, maa tikuri aintausendu ixe arama, yawe unyee Yaneruixawa."

²²Ape Deus uxari aintaupurungita amu nyenga rupi umukame arama tiwaita uruyari umaa arama, timaa uruyari umaa; maa kua utitikawaa umunya puranga ainta supe kuaita uruyariwaita supe arama, timaa tiwaita uruyari ainta supe arama.

²³Aintauyumuatiri irumu panye ingreja supe arama aintaupurungita rame amu nyenga rupi panye ainta, asui aintauwike rame kuaita tiwaita ukuawa, tiwaita uruyari yuiri, aintaumanduari tipekuawa ara.

²⁴Maa petitika rame Deus nyenga puranga muiri penye peyaweyawe, uwike rame kua tiwa uruyari, kua yuiri tiware ukuawa, pexari sasiyara aintaumanduari aintapekadu; asui panye pepurandu ae maitaa uiku;

²⁵uyumukame panye kua umunyawaa uyumimisawa upe; asuiwana kuri uyurinipia umbeu purangawaa Deus supe, umbeu kuri peirumu Deus supiwa ae.

²⁶Maitaa yamunya semuita? Peyumuatiri irumu pexari yepe uyupiru kansão, amu umbue Deus nyenga, amu umbeu itestemunyu ipia sui, amu umbeu ainta amu nyenga rupi, amu umbeu mayesawataa kua umbeuwaa. Pexari aintaumunya panye puranga arama Deus ukuawasawa uyukiriari aintapia upe panye.

²⁷Aintaumbeu rame amu nyenga rupi, pexari anyunte mukuĩ u musapiri umbeu, maa timaa yepewasu. Asui pexari amu umbeu mayesawataa kua aintaumbeuwaa.

²⁸Tirame awa ukuawa mayesawataa kua aintaumbeuwaa, pexari ukiririntu uwapika ingreja upe upurungita ixupe arama aepawa ipia sui Deus supe.

²⁹Pexari mukuĩ u musapiri utitikawaa Deus nyenga rese, pexari amuita usendu puranga aintaumbeu arama sese kua aintaumbeuwaa.

³⁰Deus uxari rame yepe nyenga ixupe kua uwapikawaa peruaki pexari ukiririntu kua uyupiruwaa upurungita.

³¹Pepuderi petitika Deus nyenga peyaweyawe, aintauyumbue arama panye, suuri arama kuri muiri ainta.

³²Asui aintapia kuaita utitikawaita Deus nyenga aintauruyari kuaita utitikawaita Deus nyenga,

³³Timaa Deus uxari aintaumunya puxuwerawa ingreja upe, maa uxari panye purangawaa tiarama maa rese ainta aintauiku ingreja upe panye kuaita umukaturuwaita.

³⁴Kuaita kunyaita aintaukiririntu aintauwapika ingreja upe, tiaintaupuderi aintaumbeu maa aintaurikute aintauruyari aintanyenga puranga kuaita serakuenawaita kuaye Deus nyenga kuximawara umbeuwaa yawe.

³⁵Aintauputari rame aintaukuawa kuaita kunyaita pexari aintaupurandu aintamena irumu aintaruka upe, nyãse timaa puranga kunyaita upurungita ingreja upe.

³⁶Maitaa penye peyupiru Deus nyenga? Maitaa Deus nyenga usikana pepiri amuita sui?

³⁷Kua umanduari utitikawaa ae Deus nyenga, kua umanduariwaa uriku puranga kua Espiritu, pexari ukuawa yaneruixawa umundu hampinima penye arama kua hampinimawaa.

³⁸Timaa yasendu ixupe kua tiwa uruyari kua papera.

³⁹Ape semuita, pesikari kirimbawa petitika kua Deus nyenga. Tepemuserana ainta kuaita aintaupurungitawaita amu nyenga rupi.

⁴⁰Maa pemunya puranga panye, pexari aintaupurungita aintayaweyawe.