Read Nhengatu 1 Kurintuwaraita 15 Bible Online

1 Kurintuwaraita 15 - Nhengatu bible

1 Kurintuwaraita 15

¹Kuiri semuita, haputari pemanduari kua nyenga purangawaa hambeuwaa penye arama kuxima, kua nyenga peruyariwaa, kua nyenga peikuwaa sese;

²Irumu kua nyenga umukaturu penye peiku arama santa sese, tiarama peruyari retentu ae.

³Nyãse hambeuwana penye hayupiru, kua haruyariwaa yuiri, hambeuwana penye maitaa umanu kua Kristu yanepekadu resewara, maye aintaumpinimawaa yawe kuxima;

⁴Asui aintaumburi ae iwi kuara kiti, asui upuamu iwi kuara sui musapiri ara rire maye aintaumpinimawaa yawe kuxima.

⁵Asui kua Sefa umaa ae, asui kuaita duziwaita umaa yuiri ae.

⁶Asui uxari aintaumaa ae aintauyumuatiri irumu kuaita yanemuita kinyentuwaita, kuxima aintaumanu aintasuiwara yepeyepe maa kuaji panye aintaupakare ainta.

⁷Asui uxari Tiagu umaa ae, asui kuaita umunduwaita panye umaa ae.

⁸Asui ixe yuiri uxari hamaa ae anyu aramawaa kuaye usemuwaa yawe umaa kua ara sangawa usasawa rire.

⁹Ixete kuaira piriwaa aintasui ixe kuaita Kristu apustuluita panye, yawaite tiyakuawa umunduwaa ixe, nyãse kuxima hamuruanyana kua Deus ingreja.

¹⁰Deus purangasawa resewara haiku kuaye haikuwaa yawe, ape timaarese ixe isui kua ipurangasawa uxariwaa ixe arama. Maa hapuraki ixupe kirimbawa piri aintasui panye, timaa ixe hapurakiwaa maa kua purangasawa Deus uxariwaa sepia upe uxari hapuraki.

¹¹Ape kuaye yambue Deus nyenga, ixe hambue, ainta aintaumbue yuiri, ape pexariana pepia Deus rese.

¹²Yambue rame penye Kristu rese uyuiri upaka iwi kuara sui, marantaa aintaumbeu yepeyepe pesuiwara tikuri umpuamu iwi kuara sui kuaita umanuwaita?

¹³Tirame maa Deus umpuamu umanuwaita iwi kuara sui tiyuiri maa umpuamu kua Kristu iwi kuara sui.

¹⁴Tirame maa Kristu upuamu iwi kuara sui retentu maa kua yambuewaa, retentu maa peruyari ae.

¹⁵Tirame maa usupiri umanuwaita sui gananiwera maa yande Deus rese, umbeuwana mayetaa Deus usupiri Kristu sui, tirame maa usupiri ae iwi kuara usupiri kuaita umanuwaita.

¹⁶Tirame maa usupiri umanuwaita iwi kuara sui, timaa yuiri usupiri kua Kristu iwi kuara sui.

¹⁷Tirame maa Kristu upuamu iwi kuara sui, retentu maa pexari pepia sese, asui pepekadu uikure perese.

¹⁸Asui kuxima aintaukanyemu yuiri maa Deus sui kuaita umanuwaita uxariwaita ipia Kristu rese.

¹⁹Yande yaxariwaita yanepia Kristu rese, pirasuawaita yande panye sui yasaru rame maa purangawaa irumu anyunte kua mundu upe.

²⁰Maa kuxima Kristu uyupiru upuamu iwi kuara sui supiwa, aete uyupiruwaa upuamu aintasuiwara kuaita umanuwaita.

²¹Yepe apigawa rupi manusawa uri aintarese panye, asui yuiri yepe apigawa rupi aintaupuamu manusawa sui.

²²Nyãse Adão resewara yamanu muiri yande. Maa yawete yuiri Kristu resewara yapakate kuri yuiri muiri yande.

²³Maa aintausaru aintarangawa aintayaweyawe. Kristu uyupiru upuamu, asui iyaraita upuamu yuiri uri rame kuri kua Kristu.

²⁴Mairame kuri umukanyemu panye kirimbawawaita, panye umundusaraita, panye upuderiwaita, asui kuri umee yanepaya Deus supe panye maa, ape kuri usikana upawasawa.

²⁵Kristu kuri aintaruixawa panye ate umburi arama kuri suanyanaita panye ipi wira kiti.

²⁶Aete manusawa kua yaneruanyana umburiwaa kuri anyu aramawaa.

²⁷Yanepaya uxari Kristu ipi wira kiti panye yawe aintaumbeu: "Uxari ipi wira kiti ainta panye," maa timaa suixawa kua Kristu, kua uxariwaa ixupe panye.

²⁸Aintaruixawa rame kuri ae panye, Taira ruixawa yuiri kuri ae kua uxariwaa ixupe panye, yepewasu arama kuri aintaDeus ae panye.

²⁹Marantaa maa aintaubatizari miraita umanuwaita resewara tirame maa usupiri iwi kuara sui ainta? Marantaa maa aintaubatizari ainta aintaresewara?

³⁰Asui marantaa maa yapurara yawewarawate?

³¹Semuita, yawe hanyee penye arama nyãse puranga hambeu seresewara perese yuiri, yaneruixawa Jesus Kristu rese. Muiri ara hamanu ixe.

³²Maataa maa haganyari Deus irumu hamaramunya resewara suu nyãruwaita irumu Efezu upe tirame maa usupiri umanuwaita? Ape purangate maa yambau yau yuiri nyãse wirande kuri yamanu yande.

³³Tepexari amu uganani penye, peiku rame aintairumu kuaita puxuwerawa ipia aintaumuaiwa kuri pemanduarisawa.

³⁴Kuiri pembaka pemanduarisawa purangawaa, tepemunya puxi mukuĩsawa, nyãse yepeyepe tire aintaukuawa Deus nyenga, yawe hanyee hamutiĩ arama penye.

³⁵Asui amu upurandu kuri: —Maitaa kuri usupiri umanuwaita? Maitaa kuri aintapira?

³⁶Inde apigawa tiwa ukuawa ara, kua reyutimawaa iwi upe tirame ukanyemu tikuri usemu.

³⁷Kua usemuwaa timaa yawe kua reyutimawaa ikarusu, kua trigu karusu u amu mitima karusu.

³⁸Maa Deus uxari ainta supe aintapira aintausemu arama kuaye uputariwaa yawe panye mitima yaweyawe.

³⁹Nyãse tiyepewasu aintarukuera panye; yamaa apigawa rukuera, suu rukuera yuiri, pira rukuera yuiri, wirá rukuera yuiri.

⁴⁰Yamaate yuiri iwaka upewaraita, asui kua mundu upewaraita yuiri. Kuaita iwaka upewaraita aintaurikute aintapurangasawa, asui kuaita mundu upewaraita aintaurikute yuiri aintapurangasawa.

⁴¹Kua kurasi uriku ipurangasawa, kua yasi uriku ipurangasawa, maa timaa yepewasu ainta; kuaita estrelaita aintauriku aintapurangasawa yuiri, maa tiyepewasu aintaumuturi aintayaweyawe.

⁴²Yawete yuiri kuaita upuamuwaita iwi kuara sui, iyukawaa kuera kua yamburiwaa iwi kuara kiti, maa timaa iyuka kua upuamuwaa. Yamburi ae puxuwerawa upe, upuamu purangawaa kiti.

⁴³Pituawaa kua aintaumburi, maa kirimbawawaa kua Deus usupiriwaa kuri.

⁴⁴Kua mundu pura kua yanepira aintaumburiwaa, maa paraizu supe arama kua yanepira upuamuwaa kuri. Yariku rame kua yanepira kua mundu yara, yariku yuiri kuri yanepira paraizu yara.

⁴⁵Yawe aintaumpinima kuxima: "Deus uxari apigawa upakawaa kua uyupiruwaa apigawa serawaa Adão." Asui kua Adão anyu aramawaa espiritu ae uxariwaa upakawaa yande.

⁴⁶Timaa Deus uyupiru uxari Adão supe espiritu, maa uyupiru umunya ipira asuiwana uxari ixupe espiritu.

⁴⁷Yawete yuiri kua primeru apigawa iwi suiwara ae, aete mundu pura; maa kua uriwaa sakuera iwaka suiwara ae.

⁴⁸Kuaye yawe kua primeru apigawa yawete yuiri panye iwi suiwara; asui yawete yuiri kua iwaka suiwara yawete yuiri panye kuaita iwaka upewaraita.

⁴⁹Kuiri yariku yanepira yawe kua apigawa iwi suiwara Adão, maa yariku kuri yanepira yawe kua iwaka suiwara Kristu.

⁵⁰Kuiri hambeu penye arama semuita, tikuri yanerukuera yaneruwi yuiri upuderi uwike yaneruixawa Deus umunduwaa upe, tikuri iyukawaa uwike kuri tiwa iyuka kiti.

⁵¹Kuiri hambeu penye arama yepe nyenga Deus uyumimiwaa. Tikuri yamanu yande panye, maa utrukari kuri yande panye.

⁵²Kutara, kuaye yasapumi yawe yaneresa utrukari kuri yande aintaupeyu rire trumbeta, nyãse yasendu kuri trumbeta, asui Deus usupiri kuri umanuwaita uxari ainta supe aintapira tiwa iyuka, asui utrukari kuri yande.

⁵³Asui kua ukanyemuwaa urikute uxari sese tiwa ukanyemu. Asui kua upawawaa utrukari kuri tiwa upawa.

⁵⁴Mairame kua iyukawaa uxari sese kua tiwa iyuka, mairame kuri upawawaa uxari sese kua tiwa upawa, usika kuri kua aintaumpinimawaa kuxima: "Kua manusawa, Deus umukuna ae umuserana resewara ae."

⁵⁵Inde manusawa tirepuderi remuserana yande; inde manusawa tirepuderi rekutuka yande.

⁵⁶Kua manusawa ukutuka yande yanepekadu irumu, asui kua Deus nyenga kuximawara uxari kirimbawa yanepuxuwerasawa yanerese.

⁵⁷Maa yamee purangawaa Deus supe nyãse uxari yamuserana sesewara kua yaneruixawa Jesus Kristu.

⁵⁸Ape semuita hagustariwaita, peiku santa yaneruixawa irumu yawewarawate, pepuraki ixupe puranga muiri ara, nyãse pekuawate timaa tenyuntuwara kua pepuraki yaneruixawa rese.