Read Nhengatu 1 Kurintuwaraita 16 Bible Online

1 Kurintuwaraita 16 - Nhengatu bible

1 Kurintuwaraita 16

¹Kuiri hambeu penye arama sese kua pemuatiriwaa pexari Deus umukaturuwaita supe, hambeu penye arama kuaye hambeuwaa yawe ingreja Galasia upe.

²Mitu yaweyawe pemuatiri peyara Deus rese peyaweyawe isuiwara kua Deus uxari peganyari, tiarama yapurandu peirumu ae hayuiri rame kuri.

³Asui hayuiri kuri hamundu papera aintairumu kuaita apigawaita peparawakawaita aintaurasu arama kua pexariwaa Jeruzalẽ kiti.

⁴Puranga rame kuri hasu aintausu kuri seirumu.

⁵Kuiri kuri hayuiri hamaa pepiri hayuiri rame Masedunia kiti nyãse hasasawa kuri Masedunia piterupi.

⁶Hamanduari haiku kuri peirumu paranawasu rame pemundu arama ixe maa kiti hasu.

⁷Nyãse tihaputari hamaa penye kutara hasasawa rame, maa haputari haiku peirumu uikupuku Deus uxari rame yawe.

⁸Haputari haiku Efezu upe ate usika Pentekuste ara upe.

⁹Nyãse puranga hapuderi hapuraki ike Deus supe, maa siya seruanyanaita.

¹⁰Usu rame kuri pepiri kua Timuteu pexari uiku puranga peirumu, nyãse upuraki yaneruixawa supe kuaye seyawe.

¹¹Ape tepexari amu timaarese Timuteu sui, maa pexari usu arama sapee upe puranga uyuiri arama kuri sepiri nyãse hasaru uri aintairumu kuaita yanemuita.

¹²Kua yanemu Apulu kirimbawa hambeu ae usu arama pepiri aintairumu kuaita yanemuita, maa tire uputari usu pepiri, maa usu kuri pepiri mairame upuderi.

¹³Pemaa pesui yawewarawate; peiku santa sese kua pexariwaa pepia sese, peiku puranga, peyumukirimbawa.

¹⁴Pemunya panye maantu pemunyawaita pegustarisawa irumu.

¹⁵Semuita, pekuawate kuaita Estefana ruka puraita aintautrukari aintaumanduarisawa Yurupari sui Azia upe, asui kuiri aintauwajudari kuaita uruyariwaita yawewarawate.

¹⁶Hambeu penye arama, pesendu ainta supe puranga kuaita apigawaita aintayawe, pesendu ainta supe panye kuaita yanemuita upurakiwaita yaneirumu Deus supe.

¹⁷Suuri hamaa aintauri sepiri kuaita Estefana, Furtunatu yuiri, Akaiku yuiri, nyãse tiseirumu penye kuiri,

¹⁸Suuri aintauxari hamanduari Deus, suuri yuiri aintauxari pemanduari Deus, ape perikute pemaa puranga ainta supe kuaita apigawaita aintayawewaita.

¹⁹Aintaumundu kuekatu penye arama kuaita ingreja Azia upe. Aintayuiri aintaumundu kuekatu penye arama yaneruixawa rera rupi kuaita Akila, Prisila yuiri irumu kua ingreja umuatiriwaa aintaruka upe.

²⁰Panye yanemuita umundu penye arama kuekatu yuiri. Pesuanti ainta puranga, pebejari ainta.

²¹Ixe Paulu hampinima kua kuekatu seipu irumu.

²²Kua tiwa ugustari yaneruixawa ipekadu utiari ae Deus sui. Yaneruixawa uri kuri.

²³Yaneruixawa Jesus uxari ipurangasawa pepia upe.

²⁴Hagustarisawa uiku peirumu panye penye Kristu Jesus rese.