Read Nhengatu 1 Kurintuwaraita 2 Bible Online

1 Kurintuwaraita 2 - Nhengatu bible

1 Kurintuwaraita 2

¹Semuita, kuxima hayuiri hamaa pepiri hambue arama penye kua nyenga Deus rese. Timaa hayuiri hambue penye senyenga rese kuaye ukuawawaa yawe timaa yuiri apigawa ukuawasawa irumu.

²Nyãse yawe hanyee ixe arama: —Timaa nungara hasu hasikari hakuawa pepiterupi anyunte Jesus Kristu kua aintaunupawaa kurusa rese.

³Pituawaa ixe haiku rame peirumu, hasikie, hariri.

⁴Asui tihambue penye senyenga rese ukuawawaa yawe, maa hambue penye Espiritu ukuawasawa kirimbawawaa irumu.

⁵Tiarama pexari pepia apigawaita ukuawasawa rese, maa Deus ukuawasawa kirimbawawaa rese.

⁶Yambeu ainta supe aintaukuawasawa puranga kuaita ukuawaita puranga, maa timaa kua mundu puraita ukuawasawa ae, timaa yuiri serakuenawaita ukuawasawa, nyãse panye aintaukuawasawa usasawa kuri aintasui panye.

⁷Maa yambeu ainta supe kua Deus ukuawasawa uyumimiwaa aintasui kuxima, kua purangawa umbeuwaa kua mundu rundere, kua ukuawasawa umukaturu arama ipupe yande.

⁸Kuaita serakuenawaita mundu upe tiawa aintasuiwara ukuawa kua ukuawasawa. Aintaukuawa rame maa ae timaa aintaunupa uyari kurusa rese kua yaneruixawa iwaka suiwara.

⁹Nyãse yawe aintaumpinima kuxima: "Tire aintaresa umaa, timaa yuiri aintaapisa usendu, timaa yuiri uwike aintapia upe kua purangawaa Deus umunyawaa ainta supe kuaita ugustariwaita ae."

¹⁰Maa Deus uxari yakuawa sesewara Espiritu irumu, nyãse Espiritu ukuawate panye ukuawasawa panye Deus umanduarisawa turusuwaa yuiri.

¹¹Nyãse awataa ukuawa yepe apigawa umanduarisawa. Anyunte ukuawa ipia irumu mayesawataa umanduariwaa, yawete yuiri tiawa ukuawa mayesawataa Deus umanduarisawa anyunte Deus Espiritu.

¹²Kuiri timaa uxari yamanduarisawa aintayawe kuaita mundu puraita, maa uxariana kua Espiritu Deus suiwara, yakuawa arama mayesawataa panye kua purangawaa Deus uxariwaa yande arama.

¹³Asui yambeu kua purangawaa kuaye Espiritu umbuewaa yawe. Timaa apigawaita umbue yande kua yambeuwaa, maa Espiritu umbue yande. Asui yamanduari Espiritu nyenga aintairumu kuaita amuita Espiritu nyenga.

¹⁴Maa kua tiwa uriku Espiritu tiupuderi ukuawa mayesawataa sese kua Deus Espiritu uxariwaa yande arama nyãse umanduari tenyuntuwara ae, timaa ukuawa mayesawataa Deus nyenga nyãse anyunte Espiritu upuderi uxari yakuawa mayesawataa ae.

¹⁵Kua urikuwaa Espiritu ipia upe upuderi ukuawa puranga mayesawataa panye maa rese, maa nẽ awa ukuawa mayesawataa umanduarisawa kua urikuwaa Espiritu.

¹⁶Awataa kua urikuwaa yaneruixawa umanduarisawa umbue arama ae? Ape yande yariku Kristu umanduarisawa.