Read Nhengatu 1 Kurintuwaraita 3 Bible Online

1 Kurintuwaraita 3 - Nhengatu bible

1 Kurintuwaraita 3

¹Semuita, tihapuderi hambeu penye arama kuaye yambeuwaa yawe ainta supe kuaita usenduwaita kirimbawa kua Espiritu, maa hambeu penye arama kuaye yambeuwaa yawe ainta supe kuaita umunyawaitare kuaye aintapira uputariwaa yawe, kuaye tainaita yawe Kristu rese.

²Kuxima hamee peu arama kambi yukise, timaa hamee pembau sukuera, nyãse tire pepuderi, kuiri yuiri hamanduari tire pepuderi nyãse pemunyare kuaye pepira uputariwaa yawe.

³Nyãse pemuasire, peyuyakaware, ape yakuawate pemunya kuaye pepira uputariwaa yawe aintayawe kuaita apigawaita tiwaita uruyari.

⁴Yepe umbeu: "Paulu yara ixe," asui amu umbeu: "Apulu yara ixe." Maitaa tiserá pemunya kuaye pepira uputariwaa yawe?

⁵Awataa kua Apulu? Awataa kua Paulu? Anyunte aintate umbuewaita penye pexari arama pepia Deus rese kuaye umunduwaa yawe yambue.

⁶Hayupiru hayutima Deus nyenga, asui Apulu uyusena ii sese, maa kua Deus uxari uyukiriari.

⁷Timaa arama kua uyutimasara, tiyuiri kua uyusenasara, anyunte purangawaa kua Deus uxariwaa uyukiriari.

⁸Yepewasute kua uyutimasara irumu kua uyusenasara, asui Deus kuri upagari ainta supe sikuyara kua aintaupurakiwaa.

⁹Upurakiwaita yande Deus irumu. Penyete Deus kupixawa, penyete Deus ruka.

¹⁰Hayupiru haxari kua ingreja uikuwaa rendawa kuaye upurakiwaa ukuawawaa yawe, kuaye Deus uxari asui amuita upuraki serakakuera. Kuiri panye kuaita upurakiwaita aintaurikute aintaumaa aintasui yawaite puxuwera aintaupuraki sese.

¹¹Nyãse tiawa upuderi uyupiru amu ingreja uikuwaa rendawa isui kua Deus uxariwaa kuxima, aete kua Kristu kua ingreja uikuwaa rendawa.

¹²Kuiri yepeyepe upuraki sese kua ingreja uikuwaa rendawa uru irumu, amu prata irumu, ita purangawaa irumu, mirá irumu, kapĩ irumu, kaa irumu yuiri.

¹³Yakuawa kuri maye aintaumunya kuaita miraita muiri ainta, uri rame Jesus yamaa kuri maye aintaumunya aintauiku ramere kua mundu upe, tata irumu yamaa kuri ae, asui tata uxari kuri yakuawa maye aintaumunyawaa muiri ainta.

¹⁴Deus kuri upagari kua apigawa tirame ukaiwaa kua umunyawaa Kristu rese.

¹⁵Ukaiwaa rame kua umunyawaa Kristu rese tikuri Deus upagari kua apigawa, maa umukaturu kuri ae kuaye yayuka yawe mira tata sui.

¹⁶Maitaa tiserá pekuawa Deus ruka penye? Maitaa tiserá pekuawa Deus Espiritu uiku pepia upe?

¹⁷Awa rame umuaiwa Deus ruka, Deus kuri uxari ukanyemu nyãse purangawaa kua Deus ruka, penyete kua Deus ruka.

¹⁸Tepeyuganani penyepawa. Kua pesuiwara umanduari ukuawa ae ukuawasawa irumu urikute umburi isui ae ukuawa arama kuri puranga Deus irumu.

¹⁹Nyãse tenyuntuwara Deus umaa aintaukuawasawa kuaita mundu puraita, yawe aintaumpinima kuxima: "Uxari aintaupurara aintaukuawasawa resewara."

²⁰Asui aintaumpinima yuiri: "Yaneruixawa ukuawate tenyuntu aintaumanduarisawa kuaita ukuawaita."

²¹Ape tepexari yepe umbeu purangawaa aintarese kuaita apigawaita. Nyãse peyara panye.

²²Paulu, Apulu yuiri, Sefa yuiri, mundu upewaraita yuiri, sikuesawa yuiri, manusawa yuiri, panye kuiriwaraita yuiri, panye uriwaita kuri yuiri peyaraita panye ainta.

²³Asui Kristu yaraita penye, asui Deus yara kua Kristu.