Read Nhengatu 1 Kurintuwaraita 4 Bible Online

1 Kurintuwaraita 4 - Nhengatu bible

1 Kurintuwaraita 4

¹Yarikute yaxari panye kuaita apigawaita aintaukuawa arama kuri yande upurakiwaita yande Kristu supe, umbuesarawaita yande Deus nyenga sese kua tiwa yamaa.

²Asui kuaita umbuesarawaita aintaurikute aintaumbue puranga, satambika.

³Maa timaa arama ixe arama pembeu rame seresewara, timaa arama ixe arama aintaumanduarisawa kuaita mundu puraita panye. Timaa yuiri hambeu seresepawate.

⁴Tihakuawa puxi serese, maa timaa semuraki uxari puranga ixe Deus umaa. Aete yaneruixawa ukuawa serese.

⁵Ape tepembeu amu resewara senundere yaneruixawa uri. Aete umukame kuri yamaa panye aintauyumimiwaa yaneresa sui. Uxari kuri yakuawa marantaa aintaumunyawaa kuaye aintaumunyawaa yawe, asui Deus kuri umbeu purangawaa ainta supe kuaita upurakiwaita aintayaweyawe.

⁶Semuita, yawe hanyee serese Apulu rese yuiri peresewara pekuawa arama peiku arama yuiri sese kua yampinimawaa, tiarama yepe pesuiwara umanduari puranga piri yepe amu sui.

⁷Awataa umunya inde puranga piri amuita sui? Deus umunyawaita panye maa inde arama uxari inde arama panye maa; marantaa remanduari rewasemu ae pekuawasawa irumu?

⁸Teresemuana penye, rikuwaita penye, tuixawaitana penye kuiri yanesui. Haputari maa tuixawaita penye yawajudari arama penye.

⁹Hamanduari Deus uxari yande pirasuawaita piri panye sui yande umunduwaita, uxari yande kuaye prezuwaita yawe aintauyukáwaita. Uxari aintaumaa mayetaa yapurara panye kuaita mundu puraita, anjuita yuiri, apigawaita yuiri.

¹⁰Kristu resewara aintaumanduari tiyakuawa ara, maa ukuawaita penye Kristu rese, yande pituawaita, maa kirimbawawaita penye. Aintaurespetari penye, maa tiaintaurespetari yande.

¹¹Kuirire yapurara yumãsi, iisi yande, yawentu yande, aintaunupa yande, tiyariku yaiku arama.

¹²Asui yapuraki turusu yaneipu irumu. Aintaumbeu irumu yanerese puxuwerawa yaaguentari.

¹³Aintauganani irumu yanerese yambeu yaneresewara tiarama ipiaiwa ainta. Kuirire aintaumaa yande kuaita mundu puraita kuaye tenyuntuwara yawe. Aintaumburi yande aintasui kuaye inemawaa yawe.

¹⁴Timaa hampinima penye arama hamutiĩ arama penye, maa hampinima penye arama pekuawa arama puranga, nyãse setainaita penye, haputariwaita penye.

¹⁵Perikute siya umbuewaita Kristu rese pepiterupi, maa tisiya pepayaita Kristu rese. Pepaya ixe Jesus Kristu rese irumu kua nyenga purangawaa.

¹⁶Ape hambeu penye arama: —Pemunya kuaye hamunyawaa yawe.

¹⁷Sesewara hamundu pepiri Timuteu, seraira hagustariwaa yaneruixawa rese, kua uikuwaa santa yaneruixawa irumu, hamundu ae uxari arama pekuawa maye haiku Kristu rese, maye yuiri hambue aintayaweyawe panye ingreja.

¹⁸Kuiri aintaumanduari purangawaita ainta kuaita yepeyepe, aintaumanduari yuiri tihasu pepiri.

¹⁹Maa Deus uputari rame kutara kuri hasu pepiri, asui tihakuawa kuri maye aintaumbeu aintayuru irumu maa hakuawa kuri maitaa aintaumanduari kuaita umanduariwaita purangawaita ainta.

²⁰Nyãse kua yaneruixawa Deus umunduwaa upe timaa nyenga ae, maa aete kirimbawasawa.

²¹Maitaa peputari? Maitaa peputari hasu pepiri mirai irumu, u peputari hasu hamaa penye puranga hagustariwaita yawe?