Read Nhengatu 1 Kurintuwaraita 7 Bible Online

1 Kurintuwaraita 7 - Nhengatu bible

1 Kurintuwaraita 7

¹Kuiri hambeu penye arama sesewara kua peputari pekuawa. Purangate apigawaita tiainta uyuka aintarimiriku arama.

²Maa pexari apigawaita uyuka aintarimiriku arama aintayaweyawe, pexari kunyaita aintayaweyawe aintauriku aintamena tiarama aintaumunya puxuwerawa aintapira irumu.

³Imena urikute umunya puranga ixupe kua ximiriku. Yawete yuiri kua ximiriku urikute umunya imena supe puranga.

⁴Nyãse imena iyara kua ipira timaa iyara ae umunya arama kuaye uputariwaa yawe, yawete yuiri kua ximiriku iyara kua imena ipira, timaa iyara ae umunya arama kuaye uputariwaa yawe.

⁵Teresaisu nemena, teresaisu nerimiriku. Yepewasu rame peputari peiku peyutirika pepurandu arama Deus irumu ape kuri puranga, maa tepeiku uikupuku perumuara sui yawaite Yurupari uganani penye pemunya arama tenyuntu.

⁶Yawe haxari pemunya peputari rame, tihamundu pemunya yawe.

⁷Haputari aintauiku seyawe panye, maa Deus uxariana ainta supe aintaukuawasawa aintayaweyawe, tiyepewasu uxari ainta supe arama ae.

⁸Hambeu ainta supe arama kuaita tiwaita aintauriku ximiriku, viuvuita supe yuiri, purangate aintauiku yepenyu seyawe.

⁹Maa tirame aintaupuderi aintauiku timaarese kunyaita sui purangate aintauyuka aintarimiriku, tiarama aintaugustari aintaumaa kuaita kunyaita panye ipuxuwerasawa irumu.

¹⁰Hambeu ainta supe arama kuaita urikuita aintarimiriku, timaa ixe kua hambeuwaa maa yaneruixawa umbeuwaa ainta supe; kuawaa uriku imena tiupuderi uxari imena.

¹¹Uxari rame imena uiku arama yepenyu timaa uriku imena ae amu irumu, u umukaturu yuiri irumu kua imena. Asui kua uriku ximiriku tiupuderi uxari kua ximiriku.

¹²Kuiri timaa yaneruixawa umbeuwaa maa ixe hambeuwaa ainta supe kuaita amuita, tirame uruyari Deus nyenga kua yanemu rimiriku tikuri upuderi uxari isui ae uputari rame uiku irumu kua kunya.

¹³Tirame uruyari yanerendira imena tiupuderi uxari ae uputari rame uiku irumu kua apigawa.

¹⁴Nyãse kua imena tiwa uruyari puranga uiku kua ximiriku irumu. Asui kua kunya tiwa uruyari puranga uiku kua imena irumu. Tirame maa yawe puxuwerawaita maa kua aintamembira, maa Deus supe arama ainta.

¹⁵Maa uxari rame sumuara kua tiwa uruyari, pexari uxari ae. Anyunte aintauyurawa yanemu u yanerendira nyãse Deus usenuiwana tiarama maa rese penye.

¹⁶Inde rerikuwaa nemena, maitaa rekuawa remukaturu kuri nemena? Asui inde yuiri rerikuwaa nerimiriku, maitaa rekuawa remukaturu kuri nerimiriku?

¹⁷Anyunte pexari aintauiku aintayaweyawe kuaye Deus uxariwaa yawe, kuaye aintauiku yawe Deus usenui irumu ainta. Yawe hambeu ainta ingreja yaweyawe.

¹⁸Aintausirkunsidari rame yepe apigawa senundere Deus usenui ae tepexari umukanyemu ae. Kua tiwa usirkunsidari senundere Deus usenui ae tepexari uputari aintausirkunsidari ae.

¹⁹Nyãse timaa arama yamunya sirkunsizão, timaa arama tiarama yamunya sirkunsizão, maa puranga yamunya kuaye Deus uputariwaa yawe.

²⁰Pexari aintauiku kuaye aintauikuwaa yawe Deus usenuiwaa irumu ainta.

²¹Maitaa riku kurumire inde Deus usenui irumu inde? Ape teremaa puxi neruixawa, maa repuderi rame resu isui uyurawa rame inde purangasawa rupi.

²²Amu prezu Deus usenuiwaa aete yaneruixawa uyurawawaa, yawete yuiri yepe usenuiwaa tiwa prezu aete Kristu umprezu ae.

²³Kristu upiripana penye sipiwasuwaa irumu ape tepemanduari apigawaita supe aramawaita penye.

²⁴Ape, semuita, peiku kuaye peikuwaa kuera yawe usenuiwaa irumu muiri penye yawete peiku Deus irumu.

²⁵Timaa Deus umbeu ixe arama aintarese kuaita kunyamukuita tiwaitare umendari, maa hambeu penye arama hamanduarisawa pepuderi pesendu ixe arama sesewara kua purangasawa yaneruixawa uxariwaa sepia upe.

²⁶Puxuwerawa kuiri yanerese, ape purangate peikure kuaye peikuwaa yawe kuiri.

²⁷Maitaa reriku nerimiriku? Teresikari reyuiri isui. Maitaa ximirikuimawaa inde? Teresikari nerimiriku arama.

²⁸Maa tiremunya pekadu reyuka rame nerimiriku arama, tiyuiri umunya ipekadu arama kunya uriku rame imena. Maa tiaintaupuderi timaarese ainta kua mundu upe kuaita urikuita aintarimiriku kuaita yuiri urikuita aintamena, ape hambeu penye arama tiarama pepurara.

²⁹Hambeu penye arama semuita, kuayentuana yanerunde kua ara, ape kuiri kuri pexari aintaumanduari ximirikuimawaa yawe kuaita urikuita aintarimiriku.

³⁰Pexari aintaumanduari uyaxiwimawaa yawe kuaita uyaxiuwaita, pexari aintaumanduari sasiyarawaa yawe kuaita suuriwaita, pexari aintaumanduari tiwaita aintauriku aintamaa yawe kuaita upiripanawaita.

³¹Pexari aintaumanduari tiwaita upurakiwaa yawe kuaita upurakiwaita kua mundu upe, nyãse usasawana kuri kua ara.

³²Haputari timaarese peiku. Kua tiwa uriku ximiriku umanduari yaneruixawa yaraita, uputari umusuuri arama yaneruixawa.

³³Maa kua urikuwaa ximiriku umanduari kua mundu yara rese, uputari umusuuri ximiriku,

³⁴Nyãse mukuĩ umanduarisawa. Asui kua kunya viuva u kunyamuku kua tiuriku imena umanduari yaneruixawa yaraita, uputari ixupe aramawaa ae ipira irumu umanduarisawa irumu yuiri. Maa kua urikuwaa imena umanduari kua mundu yara rese, uputari umusuuri imena.

³⁵Yawe hanyee penye arama peiku arama puranga, tihaputari hapukuari pemanduarisawa, maa haputari hamunya puranga peajudari arama yaneruixawa panye pepia sui, yawaite maantu umuapatuka penye.

³⁶Yepe apigawa uriku tayera waimiana ae usasawana sangawa umendari arama, puranga uxari umunya maye uputariwaa. Urikute umendari, tiumunya pekadu umendari rame.

³⁷Maa kua uikuwaa santa umanduarisawa rese, kua tiwa uputari umanduari kirimbawa, uputari rame ipia sui umukaturu kua tayera imenaimawaa yawe, purangate yawe.

³⁸Ape umunya puranga kua uxari tayera umendari, maa kua tiwa uxari umendari puranga piri umunya.

³⁹Kua urikuwaa imena uiku kuri imena irumu upaka ramere ae, maa umanu rame isui upuderi usikari imena arama maye uputariwaa yawe aintasuiwara kuaita Kristu miraita.

⁴⁰Maa hamanduari suuri kuri kua viuva uiku rame yepenyu, kua Deus Espiritu uxari hambeu hamanduari yawe.