Read Nhengatu 2 Kurintuwaraita 1 Bible Online

2 Kurintuwaraita 1 - Nhengatu bible

2 Kurintuwaraita 1

¹Ixe Paulu, Jesus Kristu umunduwaa kuaye uputariwaa yawe kua Deus, seirumu yuiri yanemu Timuteu. Kuekatu ixupe kua Deus ingreja Kurintu upe, ainta supe yuiri panye ixupe aramawaita Akaia upe.

²Yanepaya Deus uxari ipurangasawa pepia upe, uxari timaarese penye, ae yuiri kua yaneruixawa Jesus Kristu.

³Yamee purangawaa ixupe kua yaneruixawa Jesus Kristu ipaya Deus supe yuiri, kua uyupiruwaa umaa yande arama pirasuawaa yawe, kua yaneDeus umusuuriwaa yande.

⁴Puxi uri rame yanerese Deus uyumana yande yawewarawate yawaite sasiyara yaiku. Ape yapuderi yamusuuri yaneirumu kuaita pirasuawaita ipupe kua Deus inyenga umusuuriwaa yande.

⁵Yapurara rame turusu Kristu irumu, ape kuri suuri yanepia Kristu irumu.

⁶Yapurara rame suuri kuri peiku, umukaturu yuiri kuri penye. Suuri rame yande umusuuri yuiri penye pepurara rame ipiaiwaimawaa kuaye yapurarawaa yawe.

⁷Yakuawate peiku puranga yakuawate pepurara sesewara kuaye yaneyawe, ape suuri kuri penye kuaye yaneyawe.

⁸Semuita tiyaputari tiwaita pekuawa penye sese kua yapurarawaa Azia upe. Kirimbawa aintaumuruanyana yande, puxuwera aintaumunya yande arama ate yanekirimbawasawa upawa yanesui, tiyakuawa mayetaa yamunya yamanduari yamanu arama.

⁹Yamanduari yanerangawa usikana yamanu arama yande, maa yawe Deus uxari yapurara tiarama yaxari yanepia yamanduarisawa rese, maa yaxari arama yanepia sese kua Deus usupiriwaa umanuwaita.

¹⁰Umukaturu yande aintasui kuaita uputariwaita uyuká yande, asuiwana umukaturu kuri yande, asuiwana yasaru umukaturu yuiri yande.

¹¹Penye yuiri peajudari yande pepurandu irumu yanerese Deus, aintaumee kuri purangawa Deus supe kuaita siyawaita nyãse uxari yande arama purangawa kuaye aintaupuranduwaa yawe.

¹²Nyãse suuri yanepia nyãse yamunya puranga ike kua mundu upe. Yamunya puranga pepiterupi yuiri. Yaiku puranga kuaye Deus uputariwaa yawe. Timaa apigawa ukuawasawa irumu, maa irumu kua purangasawa Deus uxari yanepia upe.

¹³Anyunte yampinima penye arama kua inyenga peleri arama ae pekuawa arama yuiri, haputari pekuawa mayesawataa ae puranga.

¹⁴Kuaye pekuawa yawe yanerese pembeu kuri yaneresewara suuri pemaa yande arama, yawete yuiri kuri yamaa penye umbeu irumu kuri yaneresewara uri irumu kua yaneruixawa Jesus.

¹⁵Yawe hamanduari perese, ape haputari hamaa pepiri periku arama yuiri purangawa seirumu.

¹⁶Haputari hamaa pepiri hasu rame Masedunia kiti, asui haputari hamaa pepiri hayuiri rame Masedunia sui pemundu arama ixe hasu arama Judeya kiti.

¹⁷Haputari irumu hamunya yawe, maitaa mukuĩ hamanduarisawa? Maitaa hamanduarisawa aintayawe kuaita mundu puraita urikuwaita mukuĩ inyenga?

¹⁸Timaa mukuĩ hambeu penye arama, maa supiwa yambeu penye arama kuaye Deus umbeuwaa yawe.

¹⁹Nyãse kua Deus raira Jesus Kristu yambeuwaa sese pepiterupi, yande, Silvanu, Timuteu yuiri, ixe yuiri, timaa mukuĩ umanduarisawa kua Kristu maa supiwa umunya kuaye umbeuwaa yawe.

²⁰Deus umunya yande arama panye kuaye umbeuwaa yawe kuxima, sesewara yambeu amem umbeuwaa rese, ape yamee purangawa Deus supe.

²¹Maa aete Deus uxariwaa santa irumu Kristu ipia upe, aete uparawaka umundu arama yande.

²²Aete umusangawa yande ixupe aramawaa uxariana Espiritu Santu yanepia upe.

²³Ape hambeu penye arama Deus usendu, tire hayuiri Kurintu kiti hamukaturu arama peiku sesui.

²⁴Timaa suixawa yande kua peruyariwaa yamundu arama penye, maa yaputari yajudari penye suuri arama peiku, nyãse kirimbawa peruyari.