Read Nhengatu 2 Kurintuwaraita 10 Bible Online

2 Kurintuwaraita 10 - Nhengatu bible

2 Kurintuwaraita 10

¹Kuiri ixe Paulu, hambeu penye arama kirimbawa nyenga ipiaiwaimawaa irumu purangawa irumu iyawe kua Kristu. Timaa sepiaiwa ixe hamaa irumu penye apekatu rame pesui ixe.

²Hambeu penye arama kirimbawa hayuiri rame pepiri tiarama maa resewara pexari hapurungita penye arama kirimbawa kuaye haputariwaa yawe hapurungita kirimbawa ainta supe kuaita umanduariwaita yaxari yanepia sese kua mundu.

³Yaiku ramere kua mundu upe, maa timaa yamunya kera aintayawe kuaita mundu puraita.

⁴Tiyamunya kera yayukáwaa rupiara irumu aintayawe kuaita mundu puraita, maa Deus ukuawasawa irumu yamburi yanesui Yurupari yamutenyuntu aintanyenga kuaita yaneruanyanaita.

⁵Ape yaxari aintaumanduarisawa ukanyemu yawaite tipepuderi pekuawa Deus rese. Yamprezu panye yamanduarisawa yaruyari arama Kristu.

⁶Pruntu yande yaxari pepurara pepekadu resewara peruyari irumu kuri inyenga puranga penye.

⁷Maitaa tipekuawa mayetaa kua pemaawaa. Awataa ukuawa Kristu iyara ae pexari ukuawa Kristu yara yande yuiri yawe.

⁸Yambeu rame kirimbawa yaneresewara serakuenawaita yande tikuri yayumutiĩ nyãse yaneruixawa uxari yasaru penye, yambeu penye yasupiri arama penye, tiarama yamukanyemu arama penye.

⁹Tihaputari pemanduari hamutawa penye sepapera irumu.

¹⁰Nyãse yawe aintaumbeu serese: —Kirimbawa umpinima yande arama ipapera upe kuaye ukuawa yawe, maa pituawaa ipira, timaa upurungita puranga yasendu.

¹¹Pexari ukuawa kua mira yayuiri kuri yamunya kuaye yampinimawaa yanepapera upe.

¹²Tiyepewasu yande aintairumu kuaita amuita umbuewaita purangawaa aintaresewara. Aintaumbeu puranga ainta amuita sui, ape yakuawa tiwaita ukuawa ainta.

¹³Maa tiyambeu yaneresewara panye sui, anyunte yambeu kuaye Deus uxari yawe, ape penye yuiri yambue penye.

¹⁴Timaa yaganani yaneresewara. Tiyambeu tiyasika pepiri. Kuxima yasika pepiri aintarunde panye yambue arama kua nyenga puranga Kristu rese.

¹⁵Timaa yaganani sese kua aintaupurakiwaa kuaita apigawaita umbuewaita, anyunte yasaru peruyari kirimbawa yambue arama siyapiri miraita pepiterupi.

¹⁶Yaputari yambue kua nyenga purangawaa kuaita perendawaita runde kiti yawaite yambeu yaneresewara yambue resewara amuita umbuewaita.

¹⁷Awa uputari umbue purangawaa sesepawate anyunte pexari umbeu purangawaa yaneruixawa rese.

¹⁸Nyãse timaa suuri Deus umaa ixupe kua umbeuwaa purangawaa sesepawate, maa suuri Deus umaa ixupe kua yaneruixawa umbeuwaa sese puranga.