Read Nhengatu 2 Kurintuwaraita 12 Bible Online

2 Kurintuwaraita 12 - Nhengatu bible

2 Kurintuwaraita 12

¹Timaa arama hambeu seresewara, maa kuiri hambeu maye yaneruixawa uxari hamaa ae, uxari yuiri ixe arama inyenga.

²Hakuawate yepe apigawa Kristu supe arama, katurzi akayu rundere aintausupiri ae iwaka kiti. Timaa hakuawa aintausupiri ipira upe ae u aintausupiri ae ipira sui, Deus ukuawate.

³Hakuawate aintausupiri kua apigawa iwate kiti. Maa tihakuawa aintausupiri ae ipira upe ae u aintausupiri ae ipira sui, Deus ukuawate.

⁴Aintausupiri ae paraizu kiti, akiti usendu nyenga purangawaa tiwa apigawa upuderi umbeu.

⁵Kuiri hambeu puranga sese kua hambeuwaa, timaa hambeu puranga seresepawa, anyunte hambeu sepituasawa rese.

⁶Haputari rame hambeu puranga serese, timaa hapurungita ixe kuaye tiwa yawe ukuawa nyãse supiwa kua hambeuwaa. Maa tihambeu seresewara yawaite aintaumanduari puranga ixe isui kua aintaumaawaa aintausenduwaa yuiri serese.

⁷Deus uxari Yurupari unupa ixe yuu serukuera upe tiarama kua Deus uxariwaa hakuawa uxari hamanduari puranga ixe amuita sui.

⁸Musapiri viaji hapurandu Yaneruixawa irumu umburi arama sesui kua yuu sepira sui.

⁹Maa unyee ixe arama: —Usikate inde arama sepurangasawa haxariwaa inde arama, nyãse puranga piri aintaumaa sekirimbawasawa aintarese kuaita pituawaita. Ape kuri hambeu purangawaa sepituasawa rese hariku arama Kristu kirimbawasawa serese.

¹⁰Ape suuri pituawaa ixe Kristu resewara, siya aintauyakawa ixe, watari semaa ixe arama, aintaumuruanyana ixe, tiaintauxari timaarese ixe. Ape pitua rame ixe kirimbawa ixe.

¹¹Hambeu seresewara kuaye yawe tiwa ukuawa ara, maa peresewara hanyee nyãse timaa puranga pembeu seresewara hanyee. Nyãse timaa aintawira kiti ixe kuaita apustuluita tirame maa arama ixe.

¹²Supiwa hamunya purangawaa pepiterupi pekuawa arama Jesus apustulu ixe aintaresewara kuaita milagri hamunyawaita, timaa sekuere hamunya purangawaa kuaita tirewaa pemaa.

¹³Timaa hamunya amuita ingreja supe puranga pesui, anyunte timaa haxari pepurara seresewara aintayawe, ape peperduari ixe peirumu kua puxuwerawa hamunyawaa penye arama.

¹⁴Kuiri musapiri viajiana hasu hamaa pepiri. Timaa nungara haputari peirumu, timaa tainaita umuatiri aintamaa arama ainta supe kuaita aintapaya, maa aintapayaita aintaumuatiri aintamaa ainta supe kuaita aintarairaita.

¹⁵Suuri hagustari ixe peresewara, suuri yuiri haxari ugustari sekirimbawasawa pepia resewara. Maitaa kuaira pegustari ixe hagustari resewara penye turusu?

¹⁶Penyete pembeu timaa haxari pepurara seresewara, maa pembeu ukuawawaa ixe, ape haganani penye yawe pembeu serese.

¹⁷Maitaa haganani hamundu resewara pepiri yepeyepe kuaita hamunduwaita?

¹⁸Hamundu Titu pepiri, asui hamundu yanemu irumu. Maitaa Titu uputari uyuka pesui imaa arama? Maitaa tiserá yepewasu yamanduarisawa? Maitaa tiserá umunya kuaye seyawe?

¹⁹Maitaa kuximare pemanduari yambeu yaneresewara pesendu. Deus ukuawate Kristu resewara yapurungita yande. Penye yaputariwaita, yaputari Deus ukuawasawa uyukiriari pepia upe, ape yapurungita kirimbawa.

²⁰Nyãse hamanduari hayuiri rame pepiri timaa hawasemu penye kuaye haputariwaa yawe. Asui penye yuiri tipewasemu ixe kuaye peputariwaa yawe nyãse peyuyakaware, pemuasi yuiri puranga penye, umaramunyawaitare penye.

²¹Hayuiri rame kuri pepiri hamanduari timaa kuri sepiaiwa Deus uxari haiku peirumu. Hamanduari hayaxiu kuri aintaresewara kuaita umunyawaita aintapekadu turusu. Nyãse tisasiyara aintaumanduari ikia aintaupurungitawaa sese, timaa sasiyara aintaumanduari warixisawa rese yuiri, tiyuiri sasiyara aintaumanduari gananisawa rese.