Read Nhengatu 2 Kurintuwaraita 13 Bible Online

2 Kurintuwaraita 13 - Nhengatu bible

2 Kurintuwaraita 13

¹Kuiri musapirisawa hayuiri hamaa pepiri. Mukuĩ u musapiri umbeu rame amu resewara yarikute yasendu ixupe aintaumaa rame umunya ipuxuwerasawa.

²Kuaita umunyawaita puxuwera kuxima, aintayuiri amuita, kuxima hambeu ainta supe hayuiri rame yuiri tikuri haxari ueskapari ainta. Kuiri yuiri haikure pesui hambeu penye arama kuaye hambeuwaa yawe kuxima.

³Pesikari pekuawa supiwa upurungita rame Kristu seyuru sui, pepuderi pekuawa arama inyenga kua hambeuwaa nyãse timaa pitua ukuawasawa upuraki pepia upe senyenga irumu maa kirimbawa ae.

⁴Aintaunupa uyari kurusa rese pepia ae, maa upakate ae Deus kirimbawasawa irumu. Pituawaita yande Kristu rese, maa peresewara yapakate yande irumu kua Deus kirimbawasawa.

⁵Pemaa mayetaa pemanduarisawa yawaite tiperuyari supiwa; pesaã pemaa penyepawate mayetaa pepia. Maitaa tipekuawa Jesus Kristu uiku peiya upe? Maitaa peyawi Kristu rese?

⁶Haputari pekuawa arama pepia upe timaa yayawi Kristu rese.

⁷Hapurandu Deus irumu tiarama pemunya pepekadu. Timaa yaneresewara yaputari pemunya puranga; puranga arama aintaumaa yande, maa yaputari pemunya puranga pepia sui supiwa, maa aintaumanduari yayawi.

⁸Timaa yapuderi yamunya puxi ixupe kua supiwa, maa yamunya ixupe panye purangawaa.

⁹Ape suuri yande pitua yande kirimbawa irumu penye. Anyunte yapurandu peirumu peyumukaturu arama puranga.

¹⁰Ape hampinima penye arama haiku ramere pesui, tiarama hamaa irumu kuri pepiri hambeu kuri kirimbawa penye arama pepekadu, kuaye yaneruixawa yawe hambeu hasupiri arama penye timaa hamburi arama penye.

¹¹Semuita, anyu aramawaa hambeu penye arama hasuana pesui peyumukaturu, peyumusuuri, pexari yepewasu pemanduarisawa, timaarese peiku perumuaraita irumu, ape kuri kua Deus uxariwaa peyugustari timaarese yuiri penye uiku kuri peirumu.

¹²Pesuanti peanamaita puranga, pebejari ainta.

¹³Panye kuaita Deus umukaturuwaita aintaumundu kuekatu penye arama.

¹⁴Yaputari uiku pepia upe kua ipurangasawa yaneruixawa Jesus Kristu, asui yaputari kua Deus gustarisawa, kua Espiritu Santu yepewasusawa yuiri uiku peirumu panye penye.