Read Nhengatu 2 Kurintuwaraita 3 Bible Online

2 Kurintuwaraita 3 - Nhengatu bible

2 Kurintuwaraita 3

¹Maitaa yambeu yuiri mukuĩsawa yaneresewara puranga? Maitaa yaputari yanemuita aintaumpinima penye arama yaneresewara puranga aintayawe kuaita yepeyepeita, maitaa yaputari aintaumpinima yaneresewara puranga?

²Penyete pexari aintaukuawa yaneresewara irumu kua purangawaa yampinima pepia upe aintauleri arama ae panye apigawaita.

³Pexari aintaukuawa perikute Kristu inyenga pepia upe kuaye yaxariwaa yawe. Timaa yampinima tinta irumu pepia upe, maa Deus Espiritu irumu kua upakawaa. Timaa yampinima ae ita rese, maa pepia upe.

⁴Kristu resewara yaxariana yanepia Deus rese puranga.

⁵Timaa yaxari yanepia yanerese pawantu. Timaa yapuderi yamunya ixupe arama puranga yakuawasawa irumu, maa Deus uxari yande arama ukuawasawa purangawaa.

⁶Uxari yakuawa yambue arama inyenga pisasuwaa, aintaumpinima irumu, maa Espiritu irumu yambue inyenga pisasuwaa. Kua aintaumpinimawaa kuxima uxari yamanuwaita yande, maa kua Espiritu uxari upakawaita yande.

⁷Kirimbawa Deus umuturi Muize rese umpinima irumu ita rese kua inyenga uxariwaa aintaukuawa aintaukanyemu aintapekadu resewara. Tiaintaupuderi aintaumaa Muize ruwa nyãse kirimbawa umuturi sesewara kua sendiwaa usasawa aintasui.

⁸Ape kuri kirimbawa piri yanerese uxari irumu yapuraki irumu kua Espiritu.

⁹Umuturi rame aintarese puranga umbeu irumu aintaukanyemu arama ainta, puranga piri kuri umuturi aintarese umukaturu arama ainta ipurangasawa irumu.

¹⁰Kua inyenga kuximawara umuturi aintapia upe kuxima, maa kuiri tiumuturi nyãse puranga piri isui kua nyenga pisasuwaa kuiri.

¹¹Purangawaa rame kua nyenga usasawa aintasui, puranga piri isui kua nyenga tiwa upawa.

¹²Kuiri yasaru yamaa kua purangawaa Deus umbeuwaa yande arama, ape kirimbawa yambeu kua inyenga.

¹³Tiyamunya Muize yawe, uxariwaa yepe veu suwa rese tiarama israelitaita umaa kua purangawaa usasawa isui.

¹⁴Maa santawaa aintaakanga kuaita israelitaita kuximare kuiri yuiri; sesaimawaa aintaumanduarisawa aintauleri irumu Deus inyenga kuximawara, aintaurikure aintaruwa rese kua usikindawa aintasui Deus, nyãse yepenyu Kristu upuderi umburi aintasui ae.

¹⁵Maa kuiri yuiri sesaimawaa aintaumanduarisawa aintauleri irumu kua Muize umpinimawaa.

¹⁶Maa mairame yepe uxari ipia yaneruixawa rese umburi isui kua umuapatukawaa umanduarisawa Deus sui.

¹⁷Yaneruixawate kua Espiritu, asui uyurawa yande uiku resewara yaneruixawa Espiritu yanepia upe.

¹⁸Kuiri muiri yande, timaa yayumimi yaneruwa Deus sui, maa yamaa yaneruixawa umuturi purangawa kuaye yamaa yawe waruwa upe, utrukari yande purangawaa iyawe. Yawe umunya yande arama kua yaneruixawa Espiritu.