Read Nhengatu 2 Kurintuwaraita 6 Bible Online

2 Kurintuwaraita 6 - Nhengatu bible

2 Kurintuwaraita 6

¹Yapuraki Kristu irumu ape yambeu penye arama kirimbawasawa irumu tiarama retentu pesuanti kua Deus purangasawa.

²Yawe unyee Deus: —Hasendu inde arama usika irumu nerangawa, hawajudari inde nyã ara upe, hamukaturu inde. Kuiri ike, kuiri usikana nerangawa, kuiri ike usikana nyã ara hamukaturu arama inde.

³Tiyasikindawa aintasui kua pee yasu arama iwaka kiti, yawaite aintaumbeu puxi yanerese sese kua yambuewaa.

⁴Maa upurakisaraita Deus supe yande, ape yawewarawate yamunya puranga pemaa arama, timaa ipiaiwa yande, yapurara, watari yande arama yanemaa arama, yapurara yanepia upe.

⁵Aintaunupa yande, aintaumprezu yande, aintauyakawa yande, yawewarawate yapuraki, yasaru pituna upe, yapurara yumãsi.

⁶Timairame yamunya puxuwerawa yanepira irumu, yakuawa yambue puranga, timaa yanepiaiwa yande, puranga yanepia, kua Espiritu Santu wajudari yande, yagustari supiwa.

⁷Yapurungita supiwa, yariku Deus kirimbawasawa yamunya puranga mukuĩ yaneipu irumu yamuruanyana arama Yurupari.

⁸Yamunya puranga ainta supe arama kuaita urespetari yande, ainta supe yuiri kuaita tiwaita urespetari yande. Yamunya puranga aintaumbeu rame puxi yanerese, aintaumbeu rame puranga yanerese yuiri. Aintaumaa yande arama kuaye aintaumaawaa yawe ugananiwaita, maa supiwa yanenyenga.

⁹Aintaumaa yande kuaye tiwa yawe aintaukuawa pukusawa yande; yamanu yande maa yapakare yande. Aintaumpurarakari yande maa timaa yakanyemu.

¹⁰Aintaumusasiyara yande maa suuri yanepia yawewarawate, pirasua yande maa yaneresewara aintauriku aintamaa purangawaa kuaita siyawaita, timaa nungara yariku yande maa yarikute panye maa.

¹¹Yaputari yambue penye puranga yaneyuru irumu penye kurintuwaraita; yagustari penye yanepia sui.

¹²Tiyanekuere yagustari penye; penyete tipegustari yande puranga.

¹³Ape hambeu penye kuaye hambeuwaa yawe ainta supe kuaita tainaita, perikute pegustari yande turusu piri.

¹⁴Tepeiku yepewasu tiwaita uruyari irumu. Maitaa yepewasute purangawaa irumu kua puxuwerawa? Maitaa yepewasu turi irumu kua pitunawasuwaa?

¹⁵Maitaa yepewasu Kristu Yurupari irumu? Maitaa yepewasu aintaumanduarisawa kuaita uruyariwaita aintairumu kuaita tiwaita uruyari?

¹⁶Maitaa yapuderi yaxari kuaita idulu Deus ruka upe? Yandete Deus ruka kua upakawaa. Yawe unyee Deus: —Haiku kuri aintapia upe haiku kuri aintapiterupi, ixete aintaDeus, aintate semiraita.

¹⁷Ape peyuiri aintasui, yawe unyee Yaneruixawa: —Teperuyari kua ikiawaa aintaumunyawaa, ape kuri hasuanti penye;

¹⁸Pepaya kuri ixe, serairaita kuri penye, serayeraita kuri penye, yawe unyee yaneruixawa kua kirimbawawaa panye sui.