Read Nhengatu 2 Kurintuwaraita 7 Bible Online

2 Kurintuwaraita 7 - Nhengatu bible

2 Kurintuwaraita 7

¹Hagustariwaita, Deus umbeu yande arama purangawaa, ape yarikute yamburi yanesui panye yanepuxuwerasawa, panye yanepira sui panye yanepia sui yuiri; asui yaputari yaiku puranga xinga yawewarawate yasikie resewara Deus sui.

²Pesuanti yande pepia sui. Tiyamunya puxuwera amu supe, timaa yamuaiwa amu umanduarisawa, timaa yaganani amu supe.

³Tihaputari hambeu puxi perese, nyãse yagustari kuaye yambeuwaa yawe kuxima. Yaputari yamanu peirumu yaputari yapaka peirumu.

⁴Hamanduari puranga perese, hambeu seresewara puranga peresewara, timaarese ixe, maa suuri ixe turusu yapurara irumu.

⁵Yayuiri irumu Masedunia kiti timaa yapuderi yapitu yanepira irumu, maa aintaumuruanyana yande maa kiti yawata yapurara yanepira upe, asui yasikie yanepia upe.

⁶Maa Deus umusuuriwaa sasiyarawaita uxari suuri yanepia usika resewara yanepiri kua Titu.

⁷Maa timaa sesewaranyu suuri yande, maa suuri yuiri yamanduari penye nyãse peajudari ae, ape suuri yaiku umbeu irumu peresewara, turusu peputari pemaa ixe ate peyaxiu, peputari peajudari ixe, ape suuri sepia.

⁸Kuxima sasiyara pepia sesewara kua papera hampinimawaa penye arama, asui sasiyara ixe yuiri, maa kuiri tisasiyara ixe nyãse hakuawate sepapera umusasiyara penye maa timaa uikupuku.

⁹Maa kuiri suuri sepia timaa sasiyara penye maa sasiyara pemanduari pepekadu, nyãse petrukari pemanduarisawa pepekadu sui, nyãse sasiyara penye kuaye Deus uputariwaa yawe, ape timaa pepurara yaneresewara.

¹⁰Sasiyara rame yande kuaye Deus uputariwaa yawe yatrukari kuri yamanduarisawa yanepekadu sui Deus rese, asui umukaturu kuri yande, ape timaa kuri sasiyara yande. Maa sasiyara rame yande kuaye kua mundu uxariwaa yawe yakanyemu kuri.

¹¹Pemaa purangana pemanduarisawa sasiyara resewara penye kuaye Deus uputariwaa yawe, pesikari peyawawaa isui kua puxuwerawa, puxi pemaa pepekadu, kirimbawa peputari pemaa ixe, peputari peajudari Deus, pesikari pepurara pepekadu resewara. Ape yakuawa pesemuana isui kua puxuwerawa.

¹²Timaa hampinima penye arama sesewara kua umunyawaa puxuwerawa, tiyuiri sesewara kua pepurarawaa puxuwerasawa resewara, maa pekuawa arama peajudari yande puranga.

¹³Ape suuri yanepia peresewara, asui Titu resewara yuiri suuri yanepia, nyãse pexari timaarese ae puranga.

¹⁴Kuxima hambeu puranga peresewara kua Titu supe, asui timaa hatiĩ ixe kuiri nyãse supiwa kua hambeuwaa ixupe peresewara.

¹⁵Ape ugustari penye puranga umanduari irumu maye peruyari Deus nyenga puranga panye umanduari irumu pesikie pesuanti ae.

¹⁶Suuri sepia nyãse hapuderi haxari sepia perese.