Read Nhengatu 2 Kurintuwaraita 9 Bible Online

2 Kurintuwaraita 9 - Nhengatu bible

2 Kurintuwaraita 9

¹Kuiri tihampinima penye arama sese kua prezenti yaxariwaa ainta supe arama kuaita Deus supe aramawaita.

²Nyãse hakuawa suuriana penye peajudari arama ainta kuaye hambeuwaa yawe ainta supe kuaita Maseduniawaraita. Hambeu ainta supe: —Suuriana kuaita Akaya upewaraita kuximare yepe akayu, ape siya aintasuiwara uputari umunya puranga peyawe.

³Asui hamundu pepiri yanemuita yawaite tipruntu penye, yawaite tisupiwa kua purangawaa yambeu perese.

⁴Tiarama Maseduniawaraita usu seirumu, asuiwana kuri yatiĩ maa yande u petiĩ maa penye, nyãse tipruntu penye, tiarama yamanduari retentuwaa yamanduari puranga perese.

⁵Ape hamanduari hamundu pepiri yanemuita serunde, aintaumuatiri arama kua prezenti pembeuwaa ainta supe arama, pruntu arama ae hasu rame pepiri. Timaa hamundu penye kirimbawasawa irumu pemee arama ae maa yaputari pexari ainta supe arama ae peiya sui.

⁶Yawe hambeu: —Awa uyutima kuaira umuatiri kuri kuaira; awa uyutima siya umuatiri kuri siya.

⁷Aintaumee arama aintamaa aintayaweyawe kuaye aintaumanduarisawa uxariwaa yawe, timaa yatima uxari ae, nyãse Deus ugustari kuaita suuriwaita uxari aintamaa Deus supe.

⁸Asui Deus upuderi uabensuari penye puranga, periku arama kuri panye maantu peputari, periku arama kuri siya pemaa arama yawewarawate pemee arama ainta supe kuaita pirasuawaita panye.

⁹Kuaye aintaumpinimawaa yawe: "Umee ainta supe arama panye maa, umee ainta supe arama kuaita pirasuawaita, kua umunya purangawaa uiku yawewarawate."

¹⁰Kua uxariwaa mitima uyutimasara supe, uxari pão yuiri yambau arama, uxari kuri pekupixawa uyukiriari, uxari kuri pemuatiri turusu purangawaa sesewara kua purangawaa pemunyawaa.

¹¹Peajudari rame amuita turusu, puranga kuri Deus uabensuari penye periku arama turusu, ape kuri yambeu purangawaa Deus supe perese.

¹²Irumu kua pexariwaa ainta supe, aintauriku panye kua aintauputariwaa, asui yuiri aintaumbeu purangawaa Deus supe kuaita siyawaita.

¹³Aintaumaa irumu purangawaa pemunyawaa ainta supe aintaumbeu kuri purangawaa Deus supe nyãse peruyari kua nyenga purangawaa Kristu rese, aintaumbeu kuri purangawaa Deus supe sesewara kua pexariwaa ainta supe pexariwaa amuita supe yuiri.

¹⁴Asui aintaumanduari kuri perese, aintaupurandu kuri perese sesewara kua purangasawa Deus uxariwaa pepia upe.

¹⁵Yamee purangawaa Deus supe sesewara kua purangawaa uxariwaa yande arama.