Read Nhengatu Galasiwaraita 3 Bible Online

Galasiwaraita 3 - Nhengatu bible

Galasiwaraita 3

¹Penye Galasiawaraita tiwaita pekuawa. Awataa uganani penye? Penye hamukame pemaa Jesus Kristu kua aintaumuyariwaa kurusa rese.

²Yepenyu haputari hakuawa peirumu. Maitaa periku kua Espiritu pemunya resewara Deus nyenga kuximawara umbeuwaa? U tiserá periku ae peruyari resewara kua nyenga purangawaa?

³Maitaa tiwaita ukuawa penye? Peyupiru puranga penye Espiritu irumu, maitaa kuiri peputari peyumukaturu pekuawasawa irumu.

⁴Maitaa tenyuntuwara resewara pepurara turusu, tenyuntuwara rame ae.

⁵Asui kua uxariwaa penye arama kua Espiritu, kua umunyawaa tiwaita yamunya pepiterupi, maitaa umunya ae umunya resewara Deus nyenga kuximawara umbeuwaa u yambue resewara kua yaruyariwaa?

⁶Yawete yuiri Abraão, uxari ipia Deus rese ape purangawaa Deus umaa ae.

⁷Ape pepuderi pekuawa Abraão rairaita kuaita uruyariwaita.

⁸Deus nyenga umbeu Deus kuri umaa purangawaa yawe kuaita tiwaita judewita aintauxari resewara aintapia sese, asui umbeu kuera Abraão supe kua nyenga purangawaa: "Neresewara kuri hawabensuari panye kuaita miraita."

⁹Ape irumu kua uruyariwaa Abraão uabensuari kuri panye kuaita uxariwaita aintapia sese.

¹⁰Puxuwera kuri panye kuaita uxariwaita aintapia sese kua aintaumunyawaa Deus nyenga kuximawara rese, nyãse aintaumpinima: "Puxi kuri panye kuaita tiwaita uiku santa sese panye kua aintaumpinimawaa livru upe Deus nyenga kuximawara rese, umunya arama ainta."

¹¹Ape yakuawa tiawa puranga Deus umaa ae Deus nyenga kuximawara resewara, nyãse yawe aintaumpinima: "Upakate kuri kua purangawaa Deus umaa ae uxari resewara ipia sese."

¹²Timaa uruyarisawa resewara kua Deus nyenga kuximawara, maa aintaumpinima ae: "Upakate kuri Deus nyenga kuximawara resewara kua umunyawaa panye umbeuwaa."

¹³Kuxima Kristu uyurawana yande isui kua puxuwerawa Deus nyenga kuximawara umbeuwaa puxuwerawa yawe arama yaneresewara ae, nyãse kuxima aintaumpinima: "Puxuwerawa panye aintaumuyariwaa uyari mirá rese."

¹⁴Kristu Jesus uabensuari arama kuaita tiwaita judewita kuaye uabensuari yawe kua Abraão, asui yaruyari resewara yariku kua Espiritu umbeuwaa.

¹⁵Kuiri hambeu penye arama apigawa ukuawasawa irumu, penye semuita, tiawa umutenyuntu amu nyenga umbeu rireana ae tiyuiri umbeu sesewara.

¹⁶Kua Deus umbeuwaa Abraão supe arama, ximiariru supe arama yuiri. Timaa umbeu ximiariruita supe arama siyawaita, maa yepenyu: "Nerimiariru supe arama, aete kua Kristu."

¹⁷Yawesawa kua hambeu, kua Deus nyenga kuximawara uriwaa kuatrusentu trinta akayu Deus umbeuwaa rire, timaa upuderi umutenyuntu ae tenyuntuwara arama kua umbeuwaa.

¹⁸Yariku rame purangawaa Deus irumu Deus nyenga kuximawara resewara ape timaa yariku ae umbeuwaa resewara, maa yariku purangawaa irumu sesewara kua Deus umbeuwaa Abraão supe prezenti yawe.

¹⁹Ape marantaa kua Deus nyenga kuximawara? Uxari ainta supe arama ae aintapuxuwerasawa uiku arama aintarese ate uri irumu kua urikuwaa kua umbeuwaa, kuaye aintauxariwaa kuaita anjuita irumu kua umusasawa inyenga.

²⁰Siya kuaita umusasawa inyenga, maa yepenyute kua Deus.

²¹Maitaa Deus nyenga kuximawara umuruanyana Deus nyenga? Umbaa. Uxari rame yande arama amu inyenga uxari yapaka yande, ape purangawaa yawe umaa yande supiwa Deus nyenga kuximawara resewara.

²²Maa Deus nyenga uxari yakuawa puxuwerawaita muiri yande aintauriku arama umbeuwaa aintauxari resewara aintapia Jesus Kristu rese kuaita uruyariwaita.

²³Kuxima yaiku santa Deus nyenga kuximawara rese senundere uruyarisawa uri, senundere kua uruyarisawa umukamewaa kuri yamaa.

²⁴Ape Deus nyenga kuximawara umbue yande ate uri rame kua Kristu purangawaita umaa yande yaxari resewara yanepia sese.

²⁵Maa uri rireana kua uruyarisawa tiana Deus nyenga kuximawara umbue yande.

²⁶Nyãse Deus rairaita penye panye pexari resewara pepia Kristu Jesus rese.

²⁷Nyãse muiri penye peyubatizari Kristu rese pemuwikeana Kristu upe.

²⁸Ape tiyamaa judeu, nẽ gregu yuiri, nẽ apigawa supe aramawaa, nẽ yamaa yepe tiwa apigawa supe aramawaa, tiyuiri yamaa apigawa, nẽ kunya, nyãse yepewasu arama penye panye Kristu Jesus rese.

²⁹Asui Kristu supe aramawaita penye, Abraão rimiariruita penye yuiri, asui penye arama yuiri kua umbeuwaa.