Read Nhengatu Galasiwaraita 5 Bible Online

Galasiwaraita 5 - Nhengatu bible

Galasiwaraita 5

¹Nyãse Kristu uyurawa yande, uyurawaita arama yande, ape kuri peiku santa sese; tepexari kuximawara umuyusana penye ixupe aramawaita penye mukuĩsawa.

²Asui ixe Paulu hambeu penye arama: —Pexari rame aintausirkunsidari penye tikuri maa arama penye arama kua Kristu.

³Hambeu mukuĩsawa penye arama:p —Panye kuaita apigawaita uxariwaita aintausirkunsidari ainta aintaurikute aintaumunya panye Deus nyenga kuximawara umbeuwaa.

⁴Peyumutirika Kristu sui penye peputariwaa purangawaa yawe Deus umaa penye pemunya resewara Deus nyenga kuximawara, pewariana ipurangasawa sui.

⁵Nyãse Espiritu irumu yaruyari resewara yasaru purangawaa yawe umaa yande.

⁶Nyãse Kristu Jesus rese timaa arama kua sirkunsizão, tiyuiri maa arama sirkunsizãoimawaa maa uruyarisawa uajudari yande gustarisawa irumu.

⁷Pewatana puranga! Asui awataa utiari penye pekuere arama peruyari kua nyenga supiwa?

⁸Kua pemanduariwaa sese timaa iyara ae kua usenuiwaa penye.

⁹Kuaira maniaka ambeka saiwaa uxari sai panye kua kunya ukitikawaa.

¹⁰Seruixawa rese hamanduari arama kuri pemanduarisawa apekatu hamanduarisawa sui, asui mayewaa kua utiariwaa penye ae yuiri upurara ipuxuwerasawa resewara.

¹¹Ape semuita, hamunya ramere maa kua sirkunsizão, marantaa maa aintaumuruanyanare ixe? Ape anyunte tenyuntuwara kua nyenga kurusa rese uxariwaa aintauputari aintaumaa.

¹²Haputari maa kuaita utiariwaita penye aintauyumunuka aintapawa.

¹³Maa penye semuita, usenui penye uyurawaita arama penye, ape tepemunya puxi uyurawaita resewara penye, maa peyuajudari gustarisawa resewara.

¹⁴Nyãse yapuderi yamunya panye Deus nyenga kuximawara umbeuwaa yamunya rame kua nyenga umbeuwaa: "Pegustari perumuara kuaye peyugustari penyepawa."

¹⁵Maa pesuu rame pembau rame penyepawate pemaa pesui yawaite pekanyemu.

¹⁶Maa hambeu penye arama: —Pewata Espiritu irumu ape tikuri pepuderi pemunya kuaye pepira uputariwaa yawe.

¹⁷Nyãse kua pepira uputari umunya anyunte umuruanyana kua Espiritu, asui kua Espiritu uputari umunya anyunte umuruanyana kua pepira, nyãse aintauyumuruanyana tiarama pemunya kuaye peputariwaa yawe.

¹⁸Maa kua Espiritu umunduwaa rame penye, timaa peiku sese kua Deus nyenga kuximawara.

¹⁹Yakuawate yanepira uputari umunya panye: Uputari umuwarixi, uputari umunya panye ikiawaa, uputari ukuawa pukusawate,

²⁰Upurandu idulu irumu, uputari payesawa, uputari umuruanyana amuita, uputari uyakawa, uputari umundari, uputari ipiaiwa ae, uputari umanduari yepenyu sesepawate, uputari utiari amuita, uputari uruyari amu kiti,

²¹Uputari umuasi, uputari ukau, uputari umunya puxuwera turusu, kuaye uputari umunya. Asui hambeu penye arama kuiri kuaye hambeuwaa yawe penye arama panye kuaita umunyawaita kua puxuwerawa tikuri aintauwike yaneruixawa Deus umunduwaa upe.

²²Maa Espiritu iya panye gustarisawa, panye suurisawa, panye timaaresesawa, panye pasiensia, uxari timaa ipiaiwa yande, uxari yamunya puranga, panye yuiri kua supiwa.

²³Uxari pirasua yayumaa, uxari yamundu yanepira umunya arama puranga. Timaa yamaa Deus nyenga kuximawara yawewaita rese.

²⁴Asui kuaita Kristu Jesus yaraita aintaumuyari aintapira kurusa rese irumu panye aintapira uputariwaa umunya kirimbawa.

²⁵Ape yapaka rame yande Espiritu irumu, yarikute yawata Espiritu irumu yuiri.

²⁶Ape kuri timaa yamanduari yande purangawaa amuita sui, timaa yayumpiaiwa, timaa yamuasi amuita.