Read Nhengatu Galasiwaraita 6 Bible Online

Galasiwaraita 6 - Nhengatu bible

Galasiwaraita 6

¹Semuita, amu uyawi rame umunya puxi perikute peajudari ae pepia timaa ipiaiwasawa irumu penye peikuwaa santa. Asui pemaa pesui yawaite Yurupari umuruanyana inde remunya arama puxi.

²Peyuajudari perasu kua ipusewaa perasuwaa ape kuri pemunya kuaye Kristu uputari yawe.

³Uyuganani aepawate kua umanduari ukuawawaa ae tipukusawa ukuawa ae.

⁴Ape pemaa maitaa kuaita pemunyawaita, ape pepuderi pembeu peresewara timaa peyuajudari penye.

⁵Asui peyaweyawe perikute perasu kua peipusewaa.

⁶Asui kua uyumbue nyenga rese urikute uajudari kua umbuewaa ae.

⁷Tepeyuganani nyãse timaa Deus uxari yakasuari ae, nyãse maa rame uyutima kua apigawa aete kuri upuu ae.

⁸Nyãse kua uyutimawaa kuaye ipira uputariwaa yawe upuu kuri kua uxariwaa ukanyemu ipira, maa kua uyutima Espiritu rese upuu kuri kua mundu tiwa upawa Espiritu irumu.

⁹Ape tiyanekuere yamunya purangawaa nyãse sangawa upe kuri yapuu tirame yayuxari.

¹⁰Ape yamunya purangawaa mairame yapuderi ainta supe panye kuaita apigawaita, maa kirimbawa piri yamunya purangawaa ainta supe kuaita Deus ruka puraita uruyariwaita.

¹¹Pemaa maye hampinima penye arama papera letra puwasuwaa, hampinima seipu irumu.

¹²Yawe kuaita uputariwaita uikuwaa puranga pemaa ainta aintapira upe, aintauputari aintaumundu pesirkunsidari, kuaye aintaumunya tiarama amuita umuruanyana ainta Kristu kurusa resewara.

¹³Asui kuaita uxariwaita aintausirkunsidariwaita ainta timaa aintaumunya panye Deus nyenga kuximawara umbeuwaa, anyunte aintaumbeu puranga aintaresewara pexari resewara aintausirkunsidari penye.

¹⁴Maa timaa kuaira hapuderi hambeu puranga seresewara anyunte hambeu puranga sese kua ikurusa kua yaneruixawa Jesus Kristu, irumu umanu sesui kua mundu, asui irumu yuiri hamanu ixe kua mundu sui.

¹⁵Timaa arama kua sirkunsizão, timaa arama yuiri kua tiwa sirkunsizão, anyunte uputari pisasuana yande.

¹⁶Uxari timaarese ainta pirasua umaa ainta supe arama panye kuaita uruyariwaita inyenga panye kuaita israelitaita supiwa Deus yaraita.

¹⁷Kuiri kuri terexari puxi aintaumaa ixe nyãse hariku sepira rupi perewa rangawa hapurara resewara Jesus resewara.

¹⁸Kuiri yaneruixawa Jesus Kristu purangasawa uiku pepia upe penye serumuaraita, amem.