Read Nhengatu Efezuwaraita 1 Bible Online

Efezuwaraita 1 - Nhengatu bible

Efezuwaraita 1

¹Ixe Paulu, Jesus Kristu umunduwaa kuaye Deus uputariwaa yawe, ainta supe arama kuaita uruyariwaita uikuwaita santa Kristu Jesus rese Efezu upe.

²Yanepaya Deus yaneruixawa Jesus Kristu yuiri aintauxari penye arama ipurangasawa itimaaresesawa yuiri.

³Yabensuari Deus yaneruixawa Jesus Kristu paya nyãse uabensuari yande panye purangawaa irumu iwaka kiti.

⁴Irumu uparawaka yande kua mundu rundere ugustari resewara yande, yaiku arama puranga umaa purangawaita yawe.

⁵Kuxima uxari tairaita arama yande irumu kua Jesus Kristu kuaye uputariwaa yawe.

⁶Yamee arama kuri ixupe purangawaa sese kua ipurangasawa purangawaa uxariwaa yande arama prezenti irumu kua ugustariwaa.

⁷Umukaturu yande suwi irumu, umburi yanesui yanepuxuwerasawa kuaye ipurangasawa uxariwaa yawe.

⁸Ipurangasawa uyusena yanerese turusu ukuawasawa purangawaa irumu.

⁹Uxari yakuawa uputariwaa yawe uyumimiware aintasui, kuaye uputariwaa yawe uxari irumu Kristu yaneresewara.

¹⁰Umuatiri arama ipiri usika rame sangawa panye iwaka kitiwaita panye kua mundu puraita yuiri.

¹¹Irumu yuiri uxari ixupe aramawaita yande, uparawaka yande kuxima kuaye uputariwaa yawe kua umunyawaa panye maa kuaye uputariwaa yawe.

¹²Yande yayupiruwaita yasaru Kristu uxari yaiku puranga yamee ixupe arama purangawaa ipurangasawa resewara.

¹³Asui penye yuiri pesenduana asui peruyari rireana kua nyenga supiwa, kua nyenga purangawaa uxariwaa umukaturu penye umusangawa penye irumu kua Espiritu Santu umbeuwaa yande arama.

¹⁴Aete kua uxariwaa yaiku santa, kua yarikuwaa ate mairame kuri yawike arupi, yamee kuri purangawaa ixupe ipurangasawa resewara.

¹⁵Ape, hasendu rireana peruyari puranga yaneruixawa Jesus pegustari yuiri puranga panye uruyariwaita;

¹⁶Timaa sekuere hamee purangawaa perese hamanduari irumu penye hambeu rame Deus.

¹⁷Yaneruixawa Jesus Kristu ipaya Deus, ipaya kua purangawaa, uxari arama pekuawa puranga pepia upe, uxari arama pekuawa pepia upe purangawaa ae.

¹⁸Pemaa arama puranga pepia irumu pekuawa arama maa kua uputariwaa pesaru kua usenuiwaa penye, pekuawa arama yuiri turususawa kua ipurangasawa ainta supe arama kuaita uruyariwaita purangawaita.

¹⁹Pekuawa arama yuiri iturususawa ikirimbawasawa uxariwaa ainta supe arama kuaita uruyariwaita, kuaye umunyawaa yawe ikirimbawasawa turusuwaa irumu.

²⁰Usupiri arama Kristu umanuwaita sui, asui uxari uwapika ikatusawa sui iwaka kiti.

²¹Aintaara kiti piriwaa ae panye kuaita guvernuita, panye umunduwaita yuiri, panye tuixawaita umunduwaita upe, aintaara kiti piriwaa ae yuiri panye aintarera sui kuaita kuiriwaraita, panye yanerundewaraita yuiri.

²²Asui uxari panye maantu ipi wira kiti, asui uxari ingreja akanga ae.

²³Ingreja aete ipira ae, asui umuteresemu ae panye kua umuteresemusara ainta panye.