Read Nhengatu Efezuwaraita 2 Bible Online

Efezuwaraita 2 - Nhengatu bible

Efezuwaraita 2

¹Uxari upakawaita penye pemanu pukusawa penye pemunya resewara pepuxuwerasawa kuaye peputariwaa yawe.

²Pewata kuera pepuxuwerasawa upe, pemunya kuaye uputariwaa yawe pemunya kua mundu, pewata sakuera kua kirimbawawaa uikuwaa ara upe, kua upurakiwaa kuiri aintapia upe kuaita tiwaita uruyari.

³Yawata kuera aintapiterupi yuiri kuaita tiwaita aintauruyari, kuaye yanepira uputariwaa yawe, yamunya kuera kuaye yamanduarisawa uputariwaa yawe, kuaye yanepira uputariwaa yawe yuiri, asui ipiaiwasawa rairaita yande kuaye aintayawe kuaita amuita.

⁴Maa pirasua Deus umaa yande ugustari resewara yande turusu.

⁵Umanuwaita pukusaware yande yanepuxuwerasawa resewara uxari yapaka yande Kristu irumu, nyãse ipurangasawa irumu umukaturu yande.

⁶Asui umbaka yande irumu, asui uxari yawapika iwaka kiti Kristu Jesus irumu.

⁷Umukame arama kuri aintaumaa ipurangasawa iturususawa yawewarawate, pirasua resewara umaa yande Kristu Jesus resewara.

⁸Nyãse ipurangasawa irumu umukaturu penye peruyari resewara ae, timaa pemunyawaa ae maa Deus uxari penye arama ae;

⁹Timaa pemunyawaa resewara ae, yawaite pembeu puranga peresepawate.

¹⁰Nyãse umunyawaita yande, umunya yande yaiku resewara Kristu Jesus ipia upe yamunya arama ixupe purangawaa kuaye Deus uputariwaa yawe yamunya, yawata arama purangawaa upe.

¹¹Ape, pemanduari, penye penaseri tiwaita judeu, aintauseruka penye tiwaita usirkunsidariwaita kuaita usirkunsidariwaita aintapira upe aintaipu irumu.

¹²Pemanduari, tire periku kuera Kristu, peyumutirikare israelitaita sui, tire pekuawa kua Deus umbeuwaa, tire yuiri pesaru Deus, tire periku Deus kua mundu upe.

¹³Maa kuiri kuayentuana penye Kristu Jesus ruwi resewara, penye peikuwaa kuera apekatu isui.

¹⁴Nyãse uxari timaarese yande, asui uxari yepewasu yande, asui umukurui kua ipiaiwasawa rupita uxariwaa yayumutirika.

¹⁵Asui ipira irumu umbawa Deus nyenga kuximawara umbeuwaa yamunya, umunya arama ixupe arama yepe apigawa pisasua aintairumu kuaita mukuĩ, asui uxari timaarese ainta.

¹⁶Umukaturu arama yande mukuĩ Deus irumu yepenyu ipira irumu ikurusa rese, asui ipupe umburi yanesui ipiaiwasawa.

¹⁷Asui uri umbue penye timaaresesawa rese penye peikuwaita kuera apekatu isui, asui umbue yuiri ainta timaaresesawa rese kuaita kuayentuwaita isui.

¹⁸Asui irumu panye yande mukuĩ yapuderi yamusuaki yanepaya Espiritu irumu.

¹⁹Asui kuiri timaa apekatu suiwara penye, timaa uwatawaita penye, maa iyaraita penye irumu kuaita uruyariwaita, Deus ruka puraita penye.

²⁰Usupiriwaita penye uikuwaa rendawa rese aintauikuwaa sese iapustuluita aintayuiri kuaita utitikawaita, Kristu kua peikuwaa rendawa, aete kua ita santawaa uka upuamu sese.

²¹Sese usupiri panye kua uka santawaa upukuari ae, usupiri ae templu arama ae, yaneruixawa iyara aramawaa ae.

²²Asui penye yuiri usupiri penye uiku arama kua Deus irumu kua Espiritu.