Read Nhengatu Efezuwaraita 3 Bible Online

Efezuwaraita 3 - Nhengatu bible

Efezuwaraita 3

¹Sesewara ixe Paulu prezu ixe Kristu Jesus resewara, hagustari resewara penye tiwaita judeu.

²Hamanduari pesenduana uxari ixe arama kua nyenga Deus purangasawa rese, peresewara uxari ixe arama ae.

³Pesenduana uxari hakuawa kua nyenga uyumimiware kuaye hampinimawaa yawe penye arama kuaira.

⁴Asui peleri irumu ae pepuderi pekuawa mayetaa hakuawa uyumimire Kristu rese.

⁵Kua tiwa kuerare uxari aintaukuawa kuaita apigawaita kuaye uxariwaa yawe aintaukuawa kuiri Espiritu irumu kuaita umunduwaita purangawaita utitikawaita yuiri.

⁶Uxari aintaukuawa mayetaa ainta kuaita tiwaita judeu ixupe aramawaita ainta, sakangaita ainta kua yepenyute ipira, ainta supe yuiri kua Kristu Jesus umbeuwaa irumu kua nyenga purangawaa.

⁷Uxari hambue kua nyenga purangawaa kuaye uxariwaa yawe ixe arama prezenti Deus purangasawa kuaye umunyawaa yawe ixe arama ukuawasawa irumu.

⁸Ixete aintawira kiti panye kuaita uruyariwaita uxari ixe arama ipurangasawa hambue arama kua nyenga purangawaa ainta supe kuaita tiwaita judeu, sese kua purangawaa yarikuwaa Kristu irumu tiwa yapuderi yambawa yakuawa panye.

⁹Haxari arama panye apigawa ukuawa mayetaa kua Deus uyumimiwaa kuera kua umunyawaa panye maantu.

¹⁰Iingreja uxari arama aintaukuawa kuiri panye Deus ukuawasawa kuaita tuixawaita umunduwaita iwaka kiti.

¹¹Kuaye umunya uxari irumu Kristu Jesus yaneruixawa kuaye uputariwaa yawe yawewarawate.

¹²Irumu yapuderi yamusuaki ae timaa yasikie yaxari resewara yanepia sese.

¹³Ape hapurandu penye tiarama yatima penye sesewara kua hapurarawaa peresewara, nyãse pepuderi pembeu purangawaa peresepawate sesewara.

¹⁴Ape sesewara hamunya benditu ixupe kua yanepaya Deus.

¹⁵Asui panye suka puraita iwaka kiti kua mundu upe yuiri aintauriku sera.

¹⁶Uxari arama kirimbawa penye pepia upe irumu kua Espiritu kuaye ipurangasawa turusuwaa yawe.

¹⁷Ape pexari Kristu uiku pepia upe pexari resewara pepia sese, sapu arama penye santa gustarisawa rese.

¹⁸Uxari arama pekuawa panye uruyariwaita irumu iturususawa panye, panye ilargusawa, panye ipukusawa, panye iwatesawa, panye itipisawa.

¹⁹Pekuawa arama mayetaa iturususawa kua Kristu gustarisawa turusuwaa ae panye gustarisawa sui, teresemu arama penye panye Deus suiwara irumu panye penye.

²⁰Kuiri kua upurakiwaa ikirimbawasawa irumu yanepia upe upuderi uxari yande arama turusu piri isui kua yapuranduwaa irumu, isui yuiri kua yamanduarisawa.

²¹Yamee ixupe arama purangawaa ingreja upe Kristu Jesus rese yawewarawate, amem.