Read Nhengatu Efezuwaraita 4 Bible Online

Efezuwaraita 4 - Nhengatu bible

Efezuwaraita 4

¹Ixe aintaumprezu yaneruixawa resewara, hapurandu penye pekuawa arama puranga kua mundu upe kuaye uputariwaa yawe kua usenuiwaa penye.

²Peyumukuaira puranga, tepepiaiwa penye, pemuturusu pepia perumuaraita irumu, peaguentari perumuaraita irumu gustarisawa irumu.

³Pesikari kirimbawa peiku yepewasu Espiritu rese timaarese arama peiku yepewasu.

⁴Nyãse yepenyu ipira, yepenyu yuiri kua Espiritu, kuaye usenuiwaa yawe penye yepenyu yasaruwaa yamaa sese penye usenuiwaita.

⁵Yepenyute kua yaneruixawa, yepenyute kua yaruyariwaa, yepenyute yuiri kua batizmu.

⁶Yepenyute kua Deus, aintapaya ae panye, kua aintaara kiti piriwaa panye, upuraki aintairumu panye, uiku aintapia upe panye.

⁷Maa uxari yande arama ipurangasawa yaneyaweyawe kuaye iturususawa yawe kua Kristu uxari yande arama sikuyaraimawaa.

⁸Nyãse yawe unyee: —Uyupiri irumu iwate kiti urasu irumu siya prezu, asui umee ainta supe arama prezenti ukuawasawa kuaita apigawa.

⁹Asui umbeu irumu uyupiri umbeu yuiri uwiyeana iwi wira kiti.

¹⁰Kua uwiyewaa aete kua usemuwaa uyupiri iwate kiti panye iwaka umaa umuteresemu panye maantu.

¹¹Asui aete yuiri uxari yepeyepe apustuluita ainta, asui yepeyepe utitikawaita ainta, asui yepeyepe aintausenui Yurupari sui ainta, asui uxari yepeyepe usaruwaita ainta, asui yepeyepe umbuewaita ainta.

¹²Aintaumukaturu arama kuaita uruyariwaita aintaupuraki arama ixupe puranga, uyukiriari arama puranga Kristu ipira.

¹³Ate mairame yepewasu yaruyari, yepewasu yakuawa yuiri Deus raira rese, tuyuweana yande puranga sese kuaye Kristu ukuawasawa turusuwaa yawe.

¹⁴Tiarama yaiku kuaye taina yawe, kuaye iwitu upeyuwaa yawe, kuaita uruyariwaita panye mayewaa nyenga, aintauwike aintaugananisawa irumu kuaita apigawa, asui aintaukuawasawa irumu aintauganani ainta aintaumunya arama puxi.

¹⁵Maa yarikute yasikari yamunya kua supiwa yagustarisawa irumu, ape yayukiriari puranga sese kua yaneakanga Kristu.

¹⁶Asui panye ipira kãwera uyuwike puranga uyumuapiriwaa upe, asui aintayaweyawe aintauyumuapiri puranga, asui uyukiriari puranga kua ipira uyukiriari puranga gustarisawa irumu.

¹⁷Yawe hambeu penye arama supiwa yaneruixawa rese tiarama pewata aintayawe kuaita tiwaita judeu aintaumanduarisawa retentuwaa irumu.

¹⁸Pitunawasu aintaumanduariwaa, timaa aintaukuawa kua Deus upakawaa aintauiku resewara tiwaita ukuawa yawe santa resewara aintapia.

¹⁹Pitunawasu aintaumanduariwaa, asui aintauyuxari aintaumunya arama panye aintapuxuwerasawa, aintaugustari aintaumunya panye ikiawaa.

²⁰Maa penye timaa peyumbue yawewaa rese Kristu irumu.

²¹Supiwa rameana pesendu sesewara, aintaumbue rameana penye sese, kua supiwa Jesus rese,

²²Pemusaka pesui pemanduarisawa kuximawara kua peikuwaa sese kuxima, iyukawaa ae nyãse uganani penye pemunya arama puxi.

²³Pempisasua pemanduarisawa.

²⁴Asui pemundeu perese pemanduarisawa pisasua Deus umunyawaa iyawe purangawaa ikiaimawaa supiwa ae.

²⁵Sesewara pexari pesui panye gananisawa, pepurungita penye peyaweyawe nyenga supiwa irumu perumuaraita supe nyãse yanerumuaraita ainta.

²⁶Nepiaiwa rame inde teremunya puxi nepiaiwasawa irumu, rexari usasawa nesui nepiaiwasawa senundere kurasi uwike.

²⁷Tepexari Yurupari supe sendawa arama pepia upe.

²⁸Tepexari umunda kua mundawasu kuera maa pexari upuraki puranga ipu irumu uriku arama kuri ae uajudari arama kuaita tiwaita uriku.

²⁹Tepexari nyenga puxuwerawa usemu peyuru sui, anyunte pexari usemu nyenga purangawaa uxariwaa aintauyukiriari kuaye pepurungitawaa yawe, uxari arama purangawaa ainta supe aintapia upe kuaita usenduwaita ae.

³⁰Tepemusasiyara kua Deus Espiritu kua umusangawawaa penye ixupe kua ara uri kuri yaneruixawa.

³¹Pexari pesui apekatu kiti panye irawawaa, panye pepiaiwasawa kutarawaa, panye pepiaiwasawa yuiri, panye uyakawasawa yuiri, panye marandua puxuwerawa, asui panye puxuwerasawa yuiri.

³²Pemunya penye arama puranga, pirasua peyumaa, peperduari peirumu ainta, kuaye Deus uperduariwaa yawe irumu penye Kristu resewara.