Read Nhengatu Efezuwaraita 5 Bible Online

Efezuwaraita 5 - Nhengatu bible

Efezuwaraita 5

¹Ape pemunya kuaye Deus umunyawaa yawe, kuaye tairaita ugustariwaita yawe.

²Pewata gustarisawa upe kuaye Kristu ugustariwaa yawe yande, asui uyuxari aepawa yaneresewara kuaye uxariwaa yawe sakuenawaa yawe Deus supe arama.

³Maa panye warixisawa, panye ikiawaa, panye umuasisawa yuiri tepembeu ae pepiterupi, kuaye uruyariwaita urikute umunya.

⁴Tepembeu nyenga ikiawaa, tiyuiri nyenga retentuwaa, tiyuiri nyenga pukasawa rupiwaa, timaa puranga yamunya yawe, maa puranga piri yamee purangawaa Deus supe.

⁵Ikiawaa yuiri, tiyuiri umuasiwaa uputariwaa idulu, tikuri aintauriku aintauiku aramawaa yaneruixawa Kristu Deus yuiri umunduwaa upe.

⁶Tepexari yepe uganani penye nyenga retentuwaa irumu, nyãse yawewaa resewara Deus ipiaiwasawa uwari aintarese kuaita tiwaita uruyari.

⁷Ape tepeajudari ainta.

⁸Kuxima pitunawasu puraita penye, maa kuiri murutingawaa upewaraita penye yaneruixawa irumu, ape pewata kuaye turi rairaita yawe.

⁹Nyãse yawasemuana turi iya panye purangawaa rese, panye satambikasawa rese, panye supiwa rese yuiri.

¹⁰Perikute pesikari maa irumutaa pemusuuri arama kua yaneruixawa.

¹¹Tepeajudari ainta aintaumunya arama pitunawasu uxariwaa aintaumunya puxuwerawa, maa pembeu ainta supe aintapekadu.

¹²Nyãse yayumutiĩ yambeu arama kua aintaumunyawaa aintauyumimisawa.

¹³Maa yaxari rame turi umuturi aintarese yamaa ainta, nyãse murutingana panye kua yamaawaa.

¹⁴Yawe aintaunyee: —Repuamu inde rekiriwaa, repuamu umanuwaita pitera sui ape kuri Kristu umuturi nerese.

¹⁵Ape pemaa pesui puranga mayetaa pewata, tepewata tiwaita ukuawa yawe, maa pewata ukuawaita yawe.

¹⁶Puxuwerana kua mundu ape perikute pemunya puranga yawewarawate.

¹⁷Tepesikari tiwaita ukuawa penye maa pesikari pekuawa maitaa yaneruixawa uputariwaa yawe.

¹⁸Tepekau kawĩ irumu nyãse uxari peyumburi, maa peyumuteresemu Espiritu irumu.

¹⁹Pepurungita penye pepiterupi salmu irumu kansão Espiritu rese irumu yuiri, penyengari puranga yaneruixawa supe panye pepia irumu.

²⁰Yawewarawate pemee purangawaa panye rese sera rupi kua yaneruixawa Jesus Kristu yanepaya Deus supe.

²¹Peyuxari penye arama pesikie resewara Kristu sui.

²²Penye kunyaita peruyari pemena nyenga kuaye peruyariwaa yawe yaneruixawa.

²³Nyãse kunya akanga aete imena, kuaye ingreja akanga aete Kristu, asui ae yuiri umukaturu ipira.

²⁴Asui kuaye ingreja uruyariwaa yawe Kristu nyenga yawete yuiri kuaita kunyaita aintaurikute aintauruyari aintamena nyenga panye.

²⁵Penye perikuita perimiriku perikute pegustari perimiriku kuaye Kristu ugustariwaa yawe ingreja, asui aepawate uyuxari ingreja resewara.

²⁶Uxari arama ikiaimawaa ae umuyasuka rire ae inyenga irumu kuaye umuyasukawaa yawe ii irumu.

²⁷Uputari ixupe arama kua ingreja purangawaa, ikiaimawaa, tiwa uxirika ae, tiyamaa puxuwerawa sese, nyãse purangawaa ae.

²⁸Yawete yuiri kuaita urikuita ximiriku aintaurikute aintaugustari aintarimiriku kuaye aintaugustariwaa yawe aintapira. Kua ugustari ximiriku uyugustari yuiri aepawa.

²⁹Nyãse tire awa puxi umaa ipira, maa uyupui ae umukaturu ae kuaye Kristu umukaturuwaa yawe ingreja ixupe.

³⁰Nyãse ipira rakangaita yande.

³¹Sesewara apigawa uxari ipaya, imaya yuiri uiku arama irumu kua ximiriku, yepenyu arama kuri kuaita mukuĩwaita.

³²Turusu kua nyenga uyumimisawa, maa hambeu sese Kristu ae iingreja yuiri.

³³Ape kuri peyaweyawe perikute pegustari perimiriku kuaye peyugustariwaa yawe penyepawa, asui kuaita urikuwaita aintamena aintaurikute aintaurespetari aintamena.