Read Nhengatu Efezuwaraita 6 Bible Online

Efezuwaraita 6 - Nhengatu bible

Efezuwaraita 6

¹Penye tainaita perikute peruyari pepaya nyenga yaneruixawa rese, nyãse yawe puranga pemunya.

²Rerikute resikie remaa nepaya nemaya yuiri, nyãse yawe Deus uyupiru umbeu yamunya yaiku arama puranga,

³Puranga arama kuri pesasawa tuyuwe arama yuiri kuri inde kua mundu upe.

⁴Penye aintapayaita, tepempiaiwa kuaita perairaita, maa pemukiriari ainta yaneruixawa nyenga rese kuaye uputariwaa yawe.

⁵Asui penye amuita supe aramawaita, peruyari kuaita peruixawaita mundu puraita, pesikie resewara aintasui pepia supiwa irumu kuaye peruyariwaa yawe Kristu.

⁶Tepepuraki aintaumaawaa upentu pemusuuri arama ainta kuaita apigawaita, maa pepuraki kuaye Kristu supe aramawaita upurakiwaa yawe, pepia sui pemunya kuaye Deus uputariwaa yawe.

⁷Suuri pepuraki ainta supe kuaye pepurakiwaa yawe yaneruixawa supe, timaa kuaye pepurakiwaa yawe apigawaita supe.

⁸Yakuawate yamunya rame puranga yaneruixawa kuri uxari yande arama yuiri purangawaa, kuaita apigawa supe aramawaita, aintayuiri kuaita tiwaita apigawa supe aramawaita.

⁹Asui penye aintaruixawaita, yawete yuiri pemunya ainta supe, tepemundu kirimbawa ainta, nyãse pekuawate peruixawa aintaruixawa yuiri uiku iwaka kiti, timaa uparawaka umaa kuaita miraita.

¹⁰Ape anyu aramawaa peyumukirimbawa yaneruixawa rese, peiku santa ikirimbawasawa rese.

¹¹Pemundeu perese panye Deus rupa kirimbawawaa pepuderi arama peiku santa Yurupari gananisawa ruaxara.

¹²Nyãse tiyamunya kera apigawa ruaxara, maa aintaruaxara kuaita yanga umunduwaita, aintaruaxara kuaita kirimbawawaita, aintaruaxara yuiri kuaita umunduwaita kua mundu pitunawasuwaa, aintaruaxara yuiri kuaita ianga puxuwerawaita iwaka wira kitiwaita.

¹³Sesewara pexari perese panye Deus rupa kirimbawawaa pepuderi arama peiku santa kua mundu puxuwerawa upe, asui pemuserana rire peiku santa xinga.

¹⁴Ape peiku santa, asui pepukuari pekua upe isinturão supiwa, asui pemuyari peputia upe kua kamixa purangasawa.

¹⁵Pemundeu peipi rese kua nyenga purangawaa uxari timaarese puranga.

¹⁶Asui pepisika yawewarawate kua suantisawa nyãse uruyarisawa ae, pepuderi arama pemuweu panye kuaita Yurupari puxuwerawa ruiwa sendiwaa.

¹⁷Pexari peakanga rese kua salvasão xapeu, pepisika kua Espiritu espada nyãse Deus nyenga ae.

¹⁸Ape pembeu Deus yawewarawate Espiritu irumu, pembeu Deus pepurandu irumu yuiri, asui pesaru tepekuere pepurandu aintarese kuaita uruyariwaita panye.

¹⁹Pepurandu serese yuiri hakuawa arama hambeu timaa hasikie seyuru irumu kua nyenga purangawaa uyumimiwaa kuera aintasui.

²⁰Tiarama hasikie hambeu ainta supe kuaye uputariwaa yawe hambeu, ixe umundu hambeu arama aintaupukuari ixe kurenti irumu.

²¹Asui kua Tikiku yanemu yaputariwaa, kua upurakiwaa timaa ikuere yaneruixawa supe, umbeu kuri pesendu panye serese umbeu yuiri maataa hamunyawaa.

²²Sesewara hamundu pepiri ae pekuawa arama mayetaa yande umusuuri arama yuiri pepia.

²³Yanepaya Deus, ae yuiri yaneruixawa Jesus Kristu, uxari timaarese, uxari yuiri pegustari uruyarisawa irumu.

²⁴Ipurangasawa uiku aintairumu panye kuaita ugustariwaita supiwa kua yaneruixawa Jesus Kristu.