Read Nhengatu Filipuwaraita 1 Bible Online

Filipuwaraita 1 - Nhengatu bible

Filipuwaraita 1

¹Ixe Paulu Timuteu yuiri Kristu Jesus supe aramawaita, penye arama panye penye uruyariwaita puranga Kristu Jesus uikuwaita Filipu upe, ainta supe yuiri kuaita usaruwaita ingreja diakunuita yuiri;

²Yanepaya Deus ae yuiri yaneruixawa Jesus Kristu uxari penye arama ipurangasawa, timaaresesawa yuiri.

³Hamee purangawaa Deus supe perese hamanduari irumu penye.

⁴Yawewarawate hapurandu perese suuri hapurandu perese.

⁵Nyãse suuri peajudari ixe sese kua nyenga purangawaa, hayupiru rame kuera ate kuiri.

⁶Nyãse hakuawate supiwa, kua uyupiruwaa upuraki pepia upe umbawa yuiri kuri imuraki uri rame kuri Kristu Jesus.

⁷Nyãse puranga hamanduari yawe perese panye penye, nyãse sepia sui hamaa penye semuita yawe sese kua ipurangasawa, aintaumprezu rame yuiri ixe, hambeu irumu yuiri seresewara sese yuiri kua nyenga purangawaa supiwa ae.

⁸Nyãse Deus ukuawa serese, timaa sekuere haputari hamaa penye, nyãse hagustari penye kuaye Kristu Jesus uxariwaa yawe.

⁹Hapurandu yuiri perese gustarisawa uyukiriari pepia upe, pekuawa arama pemunya panye purangawaa.

¹⁰Pesikari arama yawewarawate panye purangawaa supiwa arama yuiri pepia tiarama kuri puxuwera uiku perese nyã ara Kristu Jesus uri rame.

¹¹Teresemu arama penye purangawaita iya irumu Jesus Kristu resewara, pemee arama kuri purangawaa Deus supe.

¹²Penye semuita; haputari pekuawa panye kua puxuwerawa usikawaa serese uajudarite kua Nyenga purangawaa uyumusaĩ arama.

¹³Ape aintaukuawate panye kuaita suraraita preturiu upe kuaita amuita yuiri aintaumprezu ixe Kristu resewara.

¹⁴Asui panye kuaita uruyariwaita kirimbawa piri aintauiku yaneruixawa rese prezu resewara ixe, kuiri timaa aintausikie aintaumbeu Deus nyenga.

¹⁵Yepeyepe aintaumbue Kristu rese aintaumuasi resewara ixe, aintaumuruanyana resewara ixe yuiri, maa kuaita amuita suuri aintapia sui aintaumbue.

¹⁶Kuaita suuriwaita aintaumbue gustarisawa resewara nyãse aintaukuawa haikure ike ixe hambeu arama sese kua nyenga purangawaa.

¹⁷Maa kuaita amuita aintaumbue Kristu rese aintaumuruanyana arama ixe, timaa supiwa ainta, nyãse aintaumanduari aintauxari hapurara ike prezu ramere ixe.

¹⁸Ape maitaa. Suuri sepia aintaumbue resewara Kristu rese mayentu u aintaumuruanyana arama ixe u supiwa irumu aintapia, yawewarawate hayumusuuri,

¹⁹Nyãse kua yawewaa uxari kuri aintauyurawa ixe pepurandu resewara serese, Jesus Kristu Espiritu uajudari resewara yuiri ixe.

²⁰Nyãse kirimbawa haputari hasaru yuiri Deus rese tiarama kuri hatiĩ ixe, maa haputari timaa hasikie yawewarawate, kuiri yuiri haputari hamuturusu Kristu sepira rupi u hapaka rame ixe u hamanu rame ixe.

²¹Nyãse hapaka rame ixe hapaka ixe Kristu supe arama, asui hamanu rame ixe anyunte haganyari turusu purangawaa.

²²Uputari rame hapaka ixe sepira upe ape iya puranga kua hapurakiwaa ixupe, maa tihakuawa maataa haputari piri kuiri.

²³Mukuĩ hamanduarisawa kirimbawa haputari hasu sepira sui haiku arama Kristu irumu, nyãse puranga piri ae panye sui.

²⁴Maa peresewara haputarire haiku sepira upe.

²⁵Yawewaa resewara haputarire haiku pepiterupi panye peruyari arama perunde kiti piri, suuri arama peruyari.

²⁶Pepuderi arama kuri pemee purangawaa Kristu Jesus supe arama hayuiri resewara pepiri mukuĩsawa.

²⁷Kuiri pewata puranga kua mundu upe kuaye uputariwaa yawe kua nyenga purangawaa Kristu rese, asui hasu rame hamaa pepiri u tirame hamaa penye hasendu kuri peresewara peiku santa yepenyu pemanduarisawa, kuaye yepenyu pemanduarisawa pepurara yepewasu sesewara kua nyenga purangawaa supiwa.

²⁸Asui tikuri pesikie aintasui kuaita umuruanyanawaita penye. Ape yawewaa irumu pexari aintaukuawa aintaukanyemu kuri, maa irumu kua Deus uxari pekuawa umukaturu kuri penye.

²⁹Nyãse Kristu resewara uxari pepurara yuiri sesewara yawaite maa peruyari retentu.

³⁰Nyãse pepurara kuaye pemaawaa kuera yawe hapurara, kuaye pesenduwaa yawe yuiri hapurara kuiri.