Read Nhengatu Filipuwaraita 2 Bible Online

Filipuwaraita 2 - Nhengatu bible

Filipuwaraita 2

¹Kristu uxari rame yayumusuuri, uxari rame yayugustari, uxari rame yepewasu yariku kua Espiritu, uxari rame puranga yayumaa pirasua yuiri yayumaa,

²Ape, pemusuuri ixe yepewasu resewara pemanduarisawa, peyugustari resewara yepewasu, yepewasu arama kuri pepia, yepewasu yuiri kuri pemanduarisawa.

³Tepemunya penye aramapawantu pemanduari resewara purangawaita penye aintasui, maa pirasua penye pemanduari purangawaita ainta pesui

⁴Tepemanduari peyaraita resepawantu, maa pemanduari yuiri amuita yaraita rese.

⁵Pesikari kuri pemanduarisawa kuaye Kristu umanduarisawa yawe.

⁶Uiku rameana yepewasute Deus irumu timaa umanduari sesepawantu yepewasu ae Deus irumu.

⁷Asui uxari isui panye ipurangasawa, uiku arama kuaye upurakiwaa yawe amu supe arama, asui unaseri ae kuaye mira yawentu, asui aintaukuawa ae kuaye apigawa yawe.

⁸Asui uyuxariwaa aintawira kiti aepawate, asui uruyari ipaya nyenga ate umanu ae, umanu ae kurusa rese.

⁹Sesewara Deus usupiri ae aintaara kiti piriwaa, asui uxari sera puranga piri panye aintarera sui.

¹⁰Aintaumunya arama benditu ixupe panye aintausenduwaa irumu Jesus rera, panye iwaka kiti, panye kua mundu upe yuiri, panye iwi wira kiti yuiri.

¹¹Aintaumbeu arama aintaapeku irumu panye aintaruixawa Jesus Kristu, aintaumee arama purangawaa yanepaya Deus supe.

¹²Ape hagustariwaita, peruyari puranga kuaye peruyariwaa yawe yawewarawate haiku rame peirumu; maa kuiri kirimbawa piri peruyari tirame haiku peirumu; kuiri pexari uyukiriari puranga perese kua salvasão pemanduari resewara ae puranga, pesikie resewara isui yuiri.

¹³Nyãse Deus upuraki pepia upe, uxari suuri penye pemunya arama kuaye uputariwaa yawe.

¹⁴Tepepurupurungita penye pemunya irumu panye maantu, tiyuiri peyuyakawa.

¹⁵Tiarama periku perese puxuwerasawa, supiwa arama penye ikiaimawaita arama penye, Deus rairaita penye aintapiterupi kuaita miraita puxuwerawaita ugananiwaita, pemuturi arama kua mundu upe kuaye turi yawe.

¹⁶Peiku santa sese kua nyenga upakawaa hambeu arama kuri purangawaa seresewara nyã ara Kristu uri rame, tiarama hambeu retentu hayana retentu hapuraki yuiri pepiterupi.

¹⁷Maa aintauyuká rame ixe sesewara kua hapurakiwaa pepiterupi peruyari arama, suuri kuri ixe peresewara.

¹⁸Yawete yuiri penye, perikute peyumusuuri seirumu.

¹⁹Hasaru yaneruixawa Jesus uxari kuri hamundu pepiri kutara kua Timuteu suuri arama kuri ixe hasendu irumu kuri peresewara.

²⁰Nyãse timaa hariku amu isui umanduariwaa penye puranga kuaye iyawe.

²¹Anyunte aintaumanduari aintayara rese, timaa aintaumanduari Kristu Jesus yaraita rese.

²²Maa pekuawate Timuteu resewara, pekuawate mayetaa uajudari ixe puranga sese kua nyenga, purangawaa kuaye taina uajudariwaa yawe ipaya.

²³Haputari kuri hamundu pepiri ae hakuawa irumu kuri maye hasasawa.

²⁴Haxari sepia yaneruixawa rese uxari arama kutara kuri hasu hamaa pepiri ixepawate.

²⁵Asui hamanduari harikute hamundu pepiri kua semu Epafruditu kua upurakiwaa seirumu, upurara yuiri seirumu, kua pemunduwaa ixe arama uajudari arama ixe watari ramere ixe arama maantu.

²⁶Nyãse kirimbawa uputari umaa penye panye, asui sasiyara ipia pesendu resewara imãsi.

²⁷Nyãse imãsi turusu kuaji umanu ae, maa pirasua Deus umaa ae ixe yuiri, kuaji umusasiyara ixe, sasiyara rireana ixe.

²⁸Ape turusu haputari hamundu penye arama ae kutara pemusuuri arama kuri pemaa rame ae mukuĩsawa, asui ixe kuaira xinga kuri hayuka sepia sese.

²⁹Ape kuri suuri pesuanti ae yaneruixawa rese, puranga kuri pemaa kuaita apigawaita kuaye iyawe.

³⁰Nyãse kuaji umanu ae sesewara kua yapurakiwaa Kristu rese, asui suuri ipia upurara seresewara, nyãse penye timaa pepuderi peajudari ixe.