Read Nhengatu Filipuwaraita 3 Bible Online

Filipuwaraita 3 - Nhengatu bible

Filipuwaraita 3

¹Asui semuita, peyumusuuri yaneruixawa rese. Timaa yatima ixe hampinima penye arama yawete yuiri, nyãse uajudari penye peiku arama santa.

²Pemaa pesui kuaita yawara, pemaa pesui kuaita umunyawaita puxuwerawa, pemaa pesui kua sirkunsizão retentuwaa.

³Nyãse yandete kua sirkunsizão supiwa, yandete upuranduwaa Deus irumu Espiritu irumu, yandete umeewaita purangawaa Kristu Jesus supe nyãse timaa yaxari yanepia yanepira resepawantu.

⁴Maa ixe hapuderi maa haxari sepia sepira resepawantu. Amu umanduari rame upuderi uxari ipia ipira resepawate, ixe hapuderipiri isui.

⁵Nyãse uitu ara hanaseri rire ixe aintausirkunsidari ixe. Israel rimiariru ixe, Benjamĩ suiwara ixe, ebreu ixe, ebrewita raira ixe; asui Deus nyenga kuximawara resewara farizeu ixe.

⁶Asui sepia sui hamuruanyana kua ingreja, nyãse Deus nyenga kuximawara uxari hakuawa purangawaa ixe, nyãse timaa hariku serese puxuwerawa.

⁷Maa Kristu resewara haxari ukanyemu sesui panye kua hamanduariwaa kuera.

⁸Nyãse hayumaa panye kuaye ukanyemuwaa yawe, nyãse puranga piri hakuawa arama seruixawa Kristu Jesus, haxari aintaukanyemu panye kuaita haganyariwaita hagustari resewara ae, asui tenyuntuwara yawe hamaa panye semaa haganyari arama Kristu.

⁹Haputari haiku ipia upe, nyãse timaa hariku purangawaa serese uriwaa Deus nyenga kuximawara sui, anyunte hariku purangawaa serese uriwaa Deus sui haruyari resewara ae haxari resewara sepia sese.

¹⁰Haputari maa hakuawa ae, haputari yuiri hakuawa ikirimbawasawa upuamu resewara manusawa sui, haputari hapurara yepewasute irumu, asui haputari haiku iyawe umanu irumu ae.

¹¹Haputari yuiri hapuderi rame hapuamu manusawa sui.

¹²Tire hapuderi, tire purangawaa ixe, maa kutara haputari purangawaa ixe nyãse sesewara Kristu Jesus uputari ixe iyara arama.

¹³Semuita, timaa hamanduari seresepawa purangawaa ixepawa, maa yawe hamunya; timaarese ixe isui kua uikuwaa serakuera kiti hasu arama serunde kiti piri ipiri kua uikuware serunde.

¹⁴Maa hasu serunde kiti ipiri kua sikuyaraimawaa Deus uxariwaa yande arama usenui resewara yande irumu kua Kristu Jesus.

¹⁵Purangate yamanduari kuaye hambeuwaa panye yande uikuwaita santa, aikue rame ita umanduariwaita amu kiti isui, Deus uxari aintaukuawa puranga uyukuawa.

¹⁶Maa yarikute yawata supiwa ipupe kua uxariwaa yakuawa.

¹⁷Semuita, pemunya kuaye yamunyawaa yawe, pemaa ainta supe puranga kuaita umunyawaita kuaye aintaumaawaa yawe yamunya.

¹⁸Nyãse siya yanepiterupi aintauwata kuaye umuruanyanaita Kristu kurusa, hambeuwana penye arama aintaresewara siya viaji, hambeu yuiri mukuĩsawa penye arama kuiri hayaxiu aintaresewara.

¹⁹Aintausu ukanyemusawa kiti, aintamarika aete aintaDeus, aintaumbeu puranga aintaresepawa aintapuxuwerasawa resewara; anyunte aintaumanduari kua mundu rese.

²⁰Maa yaneretama uiku iwaka kiti, asui yasaru uwiye iwaka sui kua umukaturuwaa yande, yaneruixawa Jesus Kristu.

²¹Utrukari kuri yanepira purangawaa yepewasu ipira purangawaa iyawe, ikirimbawasawa irumu uxari umuserana ixupe arama panye maantu.