Read Nhengatu Filipuwaraita 4 Bible Online

Filipuwaraita 4 - Nhengatu bible

Filipuwaraita 4

¹Ape, semuita hagustariwaita haputariwaita hamaa, penyete pemusuuriwaa ixe, penyete sekurua, peiku kuri santa yaneruixawa rese, penye haputariwaita.

²Hapurandu Evudia, Sintike yuiri yepewasu arama kuri aintaumanduari yaneruixawa rese.

³Asui hapurandu inde yuiri inde reajudariwaa ixe supiwa, reajudari kuaita kunyaita upurakiwaita seruaki nyenga purangawaa rese, Klementi yuiri, asui panye kuaita amuita uajudariwaita ixe kuaita urikuwaita aintarera livru upakawaa upe.

⁴Peyumusuuri yaneruixawa rese yawewarawate, asui hambeu mukuĩsawa yuiri peyumusuuri.

⁵Pexari panye apigawaita ukuawa maitaa pemunya puranga ainta supe panye.

⁶Tepeyuka pepia maa resentu, maa yawewarawate pepurandu Deus irumu pembeu Deus pemee ixupe purangawaa, pembeu usendu arama panye.

⁷Asui Deus timaaresesawa purangawaa panye ukuawasawa sui umukaturu kuri pepia panye pemanduarisawa yuiri Kristu Jesus rese.

⁸Asui anyu aramawaa hambeu penye arama penye semuita, pemanduari panye sese kua supiwa, pemanduari panye sese kua purangawaa yamaawaa, pemanduari panye sese kua purangawaa, pemanduari panye sese kua tiwa ikia, pemanduari panye sese kua yagustariwaita, pemanduari panye sese kua purangawaa peresewara, aikue rame kua purangawaa, aikue rame kua uxariwaa pemee purangawaa, pexari aintaumuteresemu pemanduarisawa panye.

⁹Asui kua peyumbuewaa seirumu, kua perikuwaa seirumu, kua pesenduwaa seirumu, kua pemaawaa seirumu, pemunya kuri ainta; ape kuri kua Deus uxariwaa timaarese penye uiku kuri peirumu.

¹⁰Suuri ixe turusu yaneruixawa rese nyãse pemanduari ixe mukuĩsawa puranga, kuxima pemanduari ixe, maa timaa pepuderi peajudari ixe.

¹¹Yawe hanyee seresepawa maa tipirasua resewara ixe, nyãse hakuawa timaarese ixe panye mairamentu.

¹²Nyãse hakuawate timaarese ixe aintauxari rame ixe aintawira kiti, hakuawate timaarese ixe aintaumbeu serese purangawaa, nyãse hakuawana timaarese ixe mairamentu, seapu rame ixe u sasi rame yumãsi, u hariku rame turusu semaa u watari rame ixe arama maa.

¹³Hapuderi panye maantu irumu kua umukirimbawa ixe.

¹⁴Maa pemunyana ixe arama puranga peajudari resewara ixe puxuwera irumu hasasawa.

¹⁵Maa pekuawate penye Filipuwaraita hayupiru rame hambue kua nyenga purangawaa hasu irumu Masedunia sui nẽ yepe ingreja uajudari ixe kua watariwaa ixe arama anyunte penyepawate peajudari ixe.

¹⁶Asui hasu irumu Tesalunika kiti pemundu ixe arama kua watariwaa ixe arama timaa yepe viaji, maa mukuĩ, asui usika ixe arama.

¹⁷Timaa haputari resewara semaa arama, maa haputari supiwa iya arama penye irumu periku arama kuri pemaa arama.

¹⁸Harikuana turusu kua pemunduwaa ixe arama, harikuana turusu Epafruditu uxari rire ixe arama kua pemunduwaa ixe arama, usemu penye arama kuaye sakuenawaa yawe pexariwaa yawe Deus supe kuaye uputariwaa yawe, suuri umaa ae.

¹⁹Asui seDeus uxari kuri penye arama panye kua watariwaa penye arama, kuaye urikuwaa yawe imaa iwaka kiti Kristu Jesus irumu.

²⁰Yamee purangawaa yanepaya Deus supe yawewarawate, amem.

²¹Kuekatu ainta supe arama aintayaweyawe kuaita uruyariwaita Kristu Jesus. Asui kuaita uruyariwaita seirumu aintaumundu penye arama kuekatu.

²²Panye kuaita uruyariwaita aintaumundu kuekatu penye arama, aintayuiri kuaita Sezar ruka puraita.

²³Kuiri yaneruixawa Jesus Kristu purangasawa uiku pepia upe panye.